Read Biblia Revisión Chuya Qellqa 1992 – Chuya Qellqa 1992 1 Reyes 7 Bible Online

1 Reyes 7 - Biblia Revisión Chuya Qellqa 1992 – Chuya Qellqa 1992 bible

1 Reyes 7

¹Salomonmi kikinpa palacionta ruwachispan chunka kimsayuq watapi qespirachirqa.

²Ruwarqataqmi [1]“Líbano monte” sutiyuq palaciontapas. Chay palaciopa largonmi karqa tawa chunka pichqayuq metro, anchonñataqmi iskay chunka iskayniyuq metro parten, sayayninñataqmi chunka kimsayuq metro parten. Pilarninkunam karqa cedro qerukunamanta tawa seqe. Chay pilarkunam takyachirqa cedromanta chakakunata.

³Tawa chunka pichqayuq chakakunam karqa, chunka pichqayuqtakama kimsa seqeman rakisqa; chay chakakunatam tawa seqe pilarkuna takyachirqa. Chay chakakunapa hawantam cedro tablakunawan qatarqaku.

⁴Karqataqmi ventanakunapas kimsa seqe, chay ventanakunaqa kimsa-kimsakamam qawanakurqa.

⁵Punkunkunapas chaynataq ventanankunapas cuadradokamam karqa, chaykunam kimsa-kimsa qawanakurqaku.

⁶Ruwachirqataqmi pilarsapallaña hatun cuartotapas, iskay chunka iskayniyuq metro parten largoyuqta hinaspa chunka kimsayuq metro parten anchoyuqta. Chaypa ñawpaqninpipas tablawan qatasqa pilarsapallaña corredortam ruwachirqa.

⁷Chaynataqmi reypa tiyanan otaq reypa juzganan cuartotapas ruwachirqa, hinaspam cedro tablakunawan kuchun-kuchun tableachirqa.

⁸Salomonpa yachasqan palaciopa qepa lawninpim huk patio karqa, karqataqmi huk cuartopas reypa wasin kaqlla. Salomonqa warminpaqpas huk palaciotam ruwachirqa kikinpa wasinman rikchakuqta. Chay warmiqa karqa Faraonpa churinmi.

⁹Chaykunataqa lliwtam cimientonkunatapas perqankunatapas uku lawmanta hawa pationkunakamam akllasqa rumikunamanta ruwachirqa; chay rumikunaqa medidaman hinam hawanpas ukunpas sierrakunawan kuchuspa labrasqa karqa.

¹⁰Cimientonmi karqa akllasqa hatun rumikunawan ruwasqa. Wakin rumikunam tawa metro parten sayayniyuq karqa, wakinñataqmi kimsa metro soqta chunka centímetro sayayniyuq.

¹¹Perqankunapas medidaman hina labrasqa ancha valorniyuq rumikunawan hinaspa cedro qerukunawan ruwasqam karqa.

¹²Hatun patiopa muyuriqninpiñataqmi karqa kimsa seqe labrasqa rumikuna, chaypa hawanmanmi yaykurqa huk seqe cedromanta chakakuna. Chaykunaqa Tayta Diospa templonpa uku law pationman chaynataq corredorninman rikchakuqmi karqa.

¹³Rey Salomonmi Tiro llaqtapi yachaq Hiramta qayachimurqa.

¹⁴Payqa Neftalí ayllumanta kaq viudapa wawan hinaspa Tiro llaqtayuq runapa churinmi karqa. Taytanmi karqa broncemanta imapas ruway yachaq runa. Hiramqa allin yuyayniyuq hinaspa yachayniyuq kasqanraykum broncemanta tukuy imata ruwaq. Chaymi rey Salomonpa kasqanman rispan mañakusqanta ruwarqa.

¹⁵Bronceta chulluchispanmi iskay pilarkunata ruwarurqa, sapa pilarpa sayayninmi karqa pusaq metro, muyuqninñataqmi karqa pichqa metro parten.

¹⁶Ruwarqataqmi bronceta chulluchispa adornonkunatapas chay pilarkunapa puntanpi churananpaq. Sapa adornopa sayayninmi karqa iskay metro cuarton.

¹⁷Chay adornokunapaqmi ruwarqa broncemanta simpasqa mallakunata hinaspa cadenaman rikchakuq cordonkunata; sapa pilarpaqmi qanchis mallakuna karqa.

¹⁸Chay mallapa muyuriqninpipas iskay seqe granadakunatam ruwarqa; chaykunawanmi chay columnakunapa adornonta taparqa. Chaynatam iskaynin columnapaq ruwarqa.

¹⁹Corredorpa pilarninkunapa puntanpi adornokunam amanqay waytaman rikchakuq adornoyuq karqa, chay adornokunapa sayayninmi karqa yaqa iskay metro.

²⁰Sapa pilarpa puntanpi kaq adornopa muyuriqninpim karqa iskay pachak granadakuna, chaykunaqa karqa iskay seqepim ruyru adornopa hawanpi, chay ruyru adornoqa mallawanmi tupanakurqa.

²¹Chay pilarkunatam templopa hawa law corredorninpi sayarachirqa. Alleq lawpi pilartam suticharqa [2]“Jaquín” nispa, ichoq lawpi kaqtañataqmi “[3]Boaz” nispa.

²²Pilarkunapa puntanmi amanqay wayta hina ruwasqa karqa. Chaynatam pilarkuna ruwayta tukururqa.

²³Ruwarqataqmi bronceta chulluchispa hatun ruyru estanquetapas. Huknin patanmanta huklawnin patankamam karqa tawa metro parten, sayayninñataqmi karqa iskay metro cuarton, muyuriqninmi chunka kimsayuq metro parten karqa.

²⁴Chay estanquepa patanpa tumpa urayninpim purun calabazata hina ruyru adornokunata iskay seqeta ruwarqa. Sapa tawa chunka pichqayuq centimetropim karqa calabazaman rikchakuq chunka adornokuna, chay calabazakunaqa estanquewan kuskam chulluchisqa karqa.

²⁵Chay estanquem tiyarqa broncemanta ruwasqa chunka iskayniyuq torokunapa hawanpi. Chay torokunamantam norte lawman kimsa qawarqa, intipa seqaykunan lawman kimsa, sur lawman kimsa, intipa qespimunan lawman kimsa. Chay torokunapa qepa atakanpa hawanpim estanque tiyarqa.

²⁶Chay estanquepa raktanmi karqa pusaq centímetro, patanñataqmi panchiq amanqay waytaman rikchakurqa. Chay estanquemanmi huntaq tawa chunka tawayuq waranqa litro yaku.

²⁷Ruwarqataqmi broncemanta chunka tiyanakunatapas, sapa tiyanapa largonwan anchonmi karqa huk metro pusaq chunka centímetro, sayayninñataqmi huk metro kimsa chunka pichqayuq centímetro.

²⁸Chay tiyanakunam kayna ruwasqa karqa: Waqtankunapi tablerokunam marcoyuqkama karqa.

²⁹Chay marcoyuq tablerokunapim dibujasqa karqa leonkuna, torokuna hinaspa querubinkuna. Torokunapa, leonkunapa hawanpas chaynataq ukunpas arwi-arwi waytawan adornasqam karqa.

³⁰Sapa tiyanam karqa broncemanta tawa ruedayuqkama, ruedapa hapiqninkunapas broncemantam karqa. Sapa tiyanapa uray law tawa esquinankunapiñataqmi rinrinkuna otaq patarayaqninkuna karqa lavatoriokunata hapinanpaq, sapa chakinpim dibujasqa karqa arwi-arwi waytaman rikchakuq adornokuna.

³¹Chay lavatoriopa tiyananmi uku lawninmanta siminkama karqa tawa chunka pichqayuq centímetro, chay siminqa karqa ruyru toqom, chay toqota takyachiqñataqmi karqa soqta chunka pusaqniyuq centímetro altoyuq; siminpipas tallasqa dibujokunam karqa, chay dibujokunapa marconkunaqa cuadradom karqa, manam ruyruchu.

³²Tawa ruedakunam karqa marcoyuq tablerokunapa ukunpi; ruedakunapa hapiqninkunaqa karqa tiyanakunawan hukllam, sapa ruedapa sayayninmi karqa soqta chunka pusaqniyuq centímetro.

³³Chay ruedakunam rikchakurqa guerra carretakunapa ruedanman, ruedapa hapiqninkunapas, aronkunapas, rayonkunapas chaynataq tamborninkunapas broncemantam karqa.

³⁴Tawan esquinakunapi rinrinkunapas otaq patarayaqninkunapas sapakamam tiyanakunawan huk piezallamanta karqa.

³⁵Tiyanakunapa hawanpi ruyruñataqmi karqa iskay chunka iskayniyuq centímetro parten altoyuq, tiyanakunapa hawanpi kaq tablerokunawan marconkunapas huk piezallamantam karqa.

³⁶Hiram sutiyuq runam tablerokunapipas, marcokunapipas querubinkunata tallarurqa, leonkunata hinaspa palmerakunata; muyuriqninpiñataqmi arwi-arwi waytaman rikchakuq adornokunata tallarurqa.

³⁷Chaynatam ruwarqa broncemanta chunka kaqkamalla tiyanakunata, chaykunataqa chay sayayniyuqllata hinaspa chayna rikchayniyuqllatam ruwarqa.

³⁸Ruwarqataqmi broncemanta chunka hatun lavatoriokunatapas, chay lavatoriokunamanmi yaykuq pusaq pachak pusaq chunka litro yaku. Sapa lavatoriom karqa huk metro pusaq chunka centímetro anchoyuq, chay lavatoriokunatam churarqa sapakamata chunkantin tiyanakunaman.

³⁹Templopa alleq lawninmanmi pichqa tiyanakunata churachirqa, wakin pichqatañataqmi ichoq lawninman; estanquetañataqmi templopa sur lawninpa intipa qespimunan lawman churachirqa.

⁴⁰Ruwarqataqmi mankakunatapas, palakunatapas chaynataq tazonkunatapas. Hiranmi tukuy chaykunata ruwarqa Tayta Diospa wasinpaq. Rey Salomonpa kamachisqanman hinam ruwarqa:

⁴¹Iskay pilarkunata, puntanpi ruyru adornokunata, tapaq mallakunata;

⁴²chay iskay mallakunapaq tawa pachak granadakunata, sapa mallapaqmi karqa iskay seqe granadakuna, chay mallakunam pilarkunapa puntanpi ruyru adornokunata taparqa;

⁴³chunka tiyanakunatapas, chay tiyanakunapa hawanpi churasqa chunka lavatoriokunatapas,

⁴⁴estanquetapas, chay estanquepa tiyanan torokunatapas,

⁴⁵mankakunatapas, palakunatapas chaynataq tazonkunatapas. Tukuy chaykunatam Hiram ruwarqa Tayta Diospa wasinpaq, imaynam rey Salomonpa mañakusqanman hina. Chaykunataqa llipipipiq broncemantam ruwarqa.

⁴⁶Reymi kamachikurqa bronceta chulluchispa llinkumanta ruwasqa moldekunapi tukuy chaykunata ruwanankupaq. Chaykunataqa ruwarqaku Jordán mayupa patan pampakunapim Sucotmanta Saretanman rinapi.

⁴⁷Salomonqa broncemanta ruwachisqankunataqa llumpay achkallaña kasqanraykum manaña pesachirqachu.

⁴⁸ Salomonqa ruwachirqataqmi Tayta Diospa templonpi kaq tukuy imakunatapas, chaykunam karqa: Qorimanta altar, Tayta Diospa tantanta churanapaq qorimanta mesata,

⁴⁹hinaspa sumaq qorimanta candelabrokunata. Chaykunatam churachirqa “Chuyay-chuyay” sutiyuq cuartopi; pichqatam churachirqa alleq lawninman, pichqatañataqmi ichoq lawninman. Ruwachirqataqmi candelabrokunapa waytankunatapas, mecheronkunatapas, qorimanta tenazankunatapas,

⁵⁰copankunatapas, mecha kaptanapaq tijerakunatapas, tazonkunatapas, wisllakunatapas chaynataq incienso qontichinakunatapas. “Chuyay-chuyay” sutiyuq cuartopa chaynataq “Chuya” sutiyuq cuartopa punkunkunatapas qorimantam ruwachirqa.

⁵¹Chaynatam rey Salomonqa, Tayta Diospa templonpaq obrakuna ruwasqanta tukurachirqa, hinaspam taytan Davidpa sapaqchasqan qorimanta qollqemanta serviciokunata Tayta Diospa templonpi kaq tukuy ima waqaychana cuartokunaman churarqa.