Read Biblia Revisión Chuya Qellqa 1992 – Chuya Qellqa 1992 1 Reyes 8 Bible Online

1 Reyes 8 - Biblia Revisión Chuya Qellqa 1992 – Chuya Qellqa 1992 bible

1 Reyes 8

¹Salomonmi Israelpa ancianonkunata, sapa ayllupa kamachiqninkunata hinaspa sapa ayllumanta ancha reqsisqa runakunata Jerusalén llaqtaman huñurachirqa, “Davidpa Llaqtan” nispa sutichasqa Sión llaqtamanta Tayta Diospa pacto ruwasqan Arcata apamunankupaq.

²Rey Salomonmi Israelpi runakunawan hatun fiestata ruwanankupaq huñunakururqa Etanim sutiyuq qanchis kaq killapi.

³Maypacham Israelpa ancianonkuna chayaramuptinkum Arcata hoqarispa llapa sacerdotekuna aparqaku.

⁴Aparqakutaqmi Tayta Diosman asuykuna carpatawan Diospaq sapaqchasqa serviciokunatapas. Chaykunataqa sacerdotekunawan Levitakunam aparqaku.

⁵Rey Salomonwan Israelpa mirayninkunañataqmi Arcapa ñawpaqninpi huñunakuruspa nana-nanaq ovejakunata hinaspa torokunata Tayta Diosman ofrecerqaku.

⁶Llapa sacerdotekunam Tayta Diospa pacto ruwasqan Arcanta apaspanku templopa ukun lawpi kaq “Chuyay-chuyay” sutiyuq cuartopi kaq querubinkunapa rapranpa ukunman churaykurqaku.

⁷Chay querubinkunam kicharisqa raprankunawan Arcatawan hombronanku varillakunata taparqaku.

⁸Chaywanpas Arcata hombronanku varillakunaqa hatun kasqanraykum hawa law “Chuya” sutiyuq cuartomanta rikukurqa, templopa hawa lawninmantam ichaqa mana rikurqakuchu, chaynam kachkan kunankamapas.

⁹Arcapa ukunpiqa manam imapas hukqa karqachu, aswanqa Horeb orqopi Moisespa churaykusqan iskay tabla rumikunallam. Chay tabla rumikunapim, Egiptomanta lloqsiramuptinku Israelpa mirayninkunawan Tayta Diospa pacto ruwasqan qellqaspa karqa.

¹⁰Templomanta llapa sacerdotekuna lloqsimuptinkum, Tayta Diospa wasinman puyu huntaykurqa.

¹¹Temploman chay puyum huntarusqanraykum llapa sacerdotekunapas imam ruwanankuta saqerurqaku, Tayta Diospa atiynin chay wasiman huntaykusqanrayku.

¹²Hinaptinmi Salomón nirqa: Dios Taytalláy, qanmi nirqanki: “Tutayay puyu ukupim yachasaq”, nispa.

¹³Ichaqa yachanayki wasitam ruwapuyki, chaypi wiñaypaq yachanaykipaq, nispa.

¹⁴Hinaspam muyuriykuspa Israelpa mirayninkunata huñunasqa sayachkaptinku kaynata bendeciykurqa.

¹⁵Israelpa yupaychasqan Tayta Diosyá qapaqchasqa kachun, payqa taytay Davidman prometekuspan kayna nisqantam cumplirun.

¹⁶“Israelpa mirayninkunata Egipto nacionmanta hurqomusqay punchawmantapunim Israel ayllukunapa mayqan llaqtantapas wasiyta ruwaptinku chaypi sutiy hatunchasqa kananpaqqa mana akllarqanichu, Israelpa mirayninkunata kamachinanpaqmi ichaqa Davidta akllarqani”, nispa.

¹⁷Taytay Davidmi tukuy sonqonwan munarqa Israelpa yupaychasqan Tayta Diospaq huk templo ruwayta.

¹⁸Ichaqa Tayta Diosmi taytay Davidta nirqa: “Tukuy sonqoykiwan huk templota ruwapuway munasqaykiqa allinmi,

¹⁹ichaqa manam qamchu chay templotaqa ruwapuwanki, qampa churikim ruwapuwanqa”, nispa.

²⁰Tayta Diosmi chay prometekusqanta cumplirun. Tayta Diospa nisqanpi hinam, taytay Davidpa rantinpi Israel nacionpi ñoqa munaychakuchkani, chaynallataqmi Israelpa yupaychasqan Tayta Diospa wasintapas ruwarachini.

²¹Arcapaqpas sitiotam alistaruni, chay Arcapim kachkan Egipto nacionmanta hurqomuspa ñawpaq taytanchikkunawan Tayta Diospa pacto ruwasqan, nispa.

²²Chaymantam rey Salomonqa, Tayta Diospa Arcanpa ñawpaqninpi sayaykuspan, lliw Israelpa mirayninkuna qawasqanta, makinkunata hoqarispa

²³nirqa: Israelpa yupaychasqan Dios Taytalláy, qam hina Diosqa manam kanchu hanaq pachapipas nitaq kay pachapipas, qamqa tukuy sonqonwan kasukuspa serviqnikikunata kuyaspam pactoykita cumplinki.

²⁴Serviqniki taytay Davidman prometesqaykitam cumplirunki, kunan punchawmi imam nisqaykita ruwaspayki cumplirunki.

²⁵Chaynaqa, Israelpa yupaychasqan Dios Taytalláy, kunanyá cumpliy serviqniki taytay Davidman prometesqaykita, qanmi payta nirqanki: “Ñoqapa ñawpaqniypiqa mana tukuytam qampa miraynikimanta Israel nacionpi munaychakuq kanqa, ichaqa churikikunayá munasqayman hina kawsachun, qampa kawsasqaykiman hinayá paykunapas kawsachunku”, nispa.

²⁶Kunanyá Israelpa yupaychasqan Dios Taytalláy, serviqniki taytay Davidman nisqayki cumplikuchun.

²⁷Ichaqa Dios Taytalláy, ¿cheqaptachu kay pachapi qam yachawaq? Cielokunapas hatu-hatun kachkaspapas manam kamasunkimanchu, chaynaqa ¿imaynataq kay wasi ruwasqaypiqa yachawaq?

²⁸Chaywanpas yupaychasqay Dios Taytalláy, kay serviqnikipa mañakusqantayá uyariykullaway, ñawpaqnikipi qayakusqaytayá kunanpuni uyariykullaway.

²⁹Tuta punchawyá kay templota qaway, kay templomantam nirqanki: “Chaypim sutiy reqsisqa kanqa”, nispa. Chaynaqa, serviqnikipa kay lugarmanta mañakusqantayá uyariykullaway.

³⁰Kay serviqnikipa chaynataq Israelpa mirayninkunapa mañakusqaykutayá uyariykullawayku. Kay wasikimanta mañakamuptiykumá hanaq pacha wasikimanta uyariykamullawankiku hinaspa pampachaykullawankiku.

³¹Sichum pipas runamasinpa contranpi huchallikuruptin chay runata kay templopi kaq altarnikipa ñawpaqninpi jurachiptinkuqa,

³²qanmi hanaq pachamanta uyariykamuspa serviqnikikunata juzganki, mana allin ruwaqtapas castigaspaykim mana allin ruwasqanman hina pagapunki, mana huchayuqmanmi ichaqa allin ruwasqanman hina pagapunki.

³³Sichum Israel llaqtayki qampa contraykipi huchallikurusqanrayku enemigonkunawan vencerachikunqa, ichaqa qanman kutirikamuspa, sutikita yupaychaspa kay templopi qayakamusunki , hinaptinqa

³⁴qanmi hanaq pachamanta uyariykamuspa Israel llaqtaykipa huchanta pampachaykunki, hinaspam ñawpaq taytankuman qosqayki allpaman kutichimunki.

³⁵Sichum qampa contraykipi huchallikurusqankurayku mana para kanqachu, ichaqa huchankumanta ñakarichiptiki kay temploman qawarimuspa sutikita yupaychaspanku huchankumanta wanakuptinkuqa

³⁶qanmi hanaq pachamanta uyariykamuspa, Israel llaqtaykipa huchankunata pampachanki, munasqaykiman hina kawsanankupaq yachachispaykim parata kacharimunki, runaykikunaman herencia qosqayki allpaman.

³⁷Sichum nacionpi yarqaypas, peste onqoypas, sinchi rupaywan kawsaykuna chakiptinpas, ismuptinpas, atuparuptinpas, aqaruwaywan puyu tukuptinpas, nacionniykuta enemigo muyuruspa atacamuptinpas, huk rikchaq onqoykunapas otaq sasachakuykuna hamuptinpas,

³⁸huchankumanta sonqonkupi ñakakuspa mayqan runapas otaq Israelpa lliw mirayninkunapas kay temployki lawman makinkuta hoqarispa qayakamuptinkuqa,

³⁹hanaq pachapi wasikimanta uyariykamuspa pampachaykuy. Hinaspayá sapakamaman imaynam kawsasqankuman hina pagaykapuy, qamllam llapa runapa sonqontaqa reqsinki.

⁴⁰Chaynapim paykunaqa manchakusunki ñawpaq taytankuman qosqayki allpapi kawsananku punchawkama.

⁴¹Sichum huklaw llaqtayuqkunapas, mana Israelpa miraynin kachkaspanku, sutikirayku hamuspa

⁴²(paykunapas hatun sutikimantawan hatun atiynikimantam uyarinqaku) kay temploykimanta qayakamusuptikiqa,

⁴³hanaq pachapi wasikimanta uyariykamuy, hinaspayá chay runapa mañakususqaykiman hina ruwaykuy, chaynapi kay pachapi llapallan runakuna sutikita reqsispanku Israel runaykikuna hina manchakusunaykipaq, chaynapim kay ruwachipusqay templopi sutiki hatunchasqa kasqanta yachanqaku.

⁴⁴Sichum runaykikuna qam kamachiptiki enemigonpa contranpi guerrapi peleaq risqanku lawmanta qam Tayta Diosta qayakamusunki kay Jerusalenpi temployki lawman qawamuspanku,

⁴⁵hinaptinqa mañakuyninkutawan qayakuyninkutam hanaq pachamanta uyariykamunki hinaspam vencenankupaq yanapaykunki.

⁴⁶Dios Taytalláy lliwpas huchallikuqmi kallaniku. Sichum qampa contraykipi huchallikurusqankurayku piñakuruspayki enemigonkunaman qoykunki hinaptin karumanpas otaq hichpamanpas preso apasqa kaspanku,

⁴⁷chay preso kasqanku allpapi qanman kutirikamuspa qayakamusunkiman kaynata: “Mana allinkunata ruwaspam qampa contraykipi huchallikuruniku”, nispanku.

⁴⁸Sichum preso kasqanku allpamanta tukuy sonqonkuwan, tukuy almankuwan qanman kutirikamuspanku, ñawpaq taytankuman qosqayki allpaman, akllasqayki llaqtaman chaynataq qampaq ruwachisqay temploman qawamuspanku mañakamusuptikiqa,

⁴⁹hanaq pachapi wasikimantayá uyariykamuy, hinaspayá allin arreglota paykunapaq ruwaykuy.

⁵⁰Contraykipi huchallikusqankutawan mana allin ruwayninkutayá pampachaykuspa preso apaqnin runakunawanpas kuyapayariykachiy.

⁵¹Chaynataqa ruwaykuy runaykikunaqa herenciayki hina kasqanraykuyá. Paykunataqa fierro chulluchina hornomanta hurqochkaq hinam Egipto nacionmanta hurqomurqanki.

⁵²Kay serviqnikipa mañakuynintawan Israel runaykikunapa qayakuynintayá uyariykuy. Dios Taytallayku qamllatam qayakamullaykiku.

⁵³Señorllayku, Dios Taytallayku, qanmi kay pachapi llaqtakunamanta paykunata herenciayki kananpaq rakirqanki. Chaynatam serviqniki Moisesnintakama nirqanki ñawpaq taytaykuta Egipto nacionmanta hurqomuspayki, nispa.

⁵⁴Tayta Diospa altarninpa ñawpaqninpi altoman makinkunata hoqarispa qonqoranpa mañakusqanta tukuruspanmi Salomón sayarirurqa.

⁵⁵Hinaspanmi hatunmanta qaparispan Israelpa llapallan mirayninkunata kaynata bendeciykurqa:

⁵⁶Tayta Diosyá bendecisqa kachun, paymi nisqanman hina hawkayayta qoykun Israel llaqtanman. Serviqnin Moisesnintakama rimarisqan promesankunataqa lliwtam ruwarun, manam hukllapas faltanchu.

⁵⁷Señorninchik Tayta Diosyá ñoqanchikwan kachun imaynam ñawpaq taytanchikkunawan kasqanta hina, amayá payqa wischuruwasunchu nitaq saqeruwasunchu.

⁵⁸Sonqonchiktayá payman kutirichichun, chaynapi munasqanman hina kawsananchikpaq chaynataq kamachisqankunata, yachachikuyninkunata hinaspa decretonkunata kasukunanchikpaq, chaykunatam ñawpaq taytanchikkunaman kamachirqa.

⁵⁹Kay mañakusqayyá Señorninchik Tayta Diospa qayllanpi tuta punchaw kachun, chaynapi kay serviqninpaqpas chaynataq Israelpa mirayninkunapaqpas sapa punchaw necesitasqankuman hina allin arreglota ruwananpaq.

⁶⁰Chaynapim kay pachapi llapallan runakuna, Señorninchik Tayta Diosqa sapallan Dios kasqanta yachanqaku.

⁶¹Chaynaqa, kunan punchawpi hinayá sonqoykichikpas Señorninchik Tayta Diosllapaqña kachun, yachachikuyninkunata ruwayman churaspa kamachikuyninkunata kasukunaykichikpaq, nispa.

⁶²Chaymantam reywan Israelpa llapallan mirayninkuna Tayta Diosman sacrificiokunata ofrecerqaku.

⁶³Rey Salomonmi Tayta Diosman ofrecerqa iskay chunka iskayniyuq waranqa torokunata hinaspa pachak iskay chunka waranqa ovejakunata. Chay animalkunataqa ofrecerqa Dioswan allinlla kasqankumantam. Chaynatam reywan llapallan Israel mirayninkunapas Tayta Diospa wasinta dedicarqaku.

⁶⁴Reyqa hina chay punchawllapim Tayta Diospa wasinpa ñawpaqninpi kaq pationtapas Diosllapaqña sapaqcharqa, chaypim ofrecerqa lliw kañana sacrificiota, kawsay ofrendakunata hinaspa Dioswan allinlla kasqanmanta animalkuna ofrecesqanpa wirankunatapas. Chaynataqa ruwarqa Tayta Diospa templonpa ñawpaqninpi kaq broncemanta altar taksalla kaspa, lliw kañana sacrificiopaqpas, kawsay ofrendakunapaqpas chaynataq Dioswan allinlla kasqankumanta ofrenda animalkunapa wirankunapaqpas mana haypasqanraykum.

⁶⁵Chay punchawpim rey Salomón llapallan Israelpa mirayninkunawan Tayta Diospa qayllanpi qanchis punchawpuni hatun fiestata ruwarqaku, hinaspam qanchis punchawtawanraq ruwarqaku. Chaynapim chunka tawayuq punchaw hatun fiestata ruwarqaku. Chaypaqmi Israelpa mirayninkuna hamurqaku Hamat llaqtaman yaykuna qasamanta qallaykuspa Egipto wayqokama.

⁶⁶Fiesta tukuypa paqarinnintin punchawtam llapa runakunata rey Salomón aviarurqa, chaymi llapa runakunaqa kusisqallaña sapakama wasinkuman ripukurqaku. Paykunaqa kusikurqaku serviqnin Davidpaqpas chaynataq Israelpa mirayninkunapaqpas Tayta Dios tukuy allinkuna ruwasqanrayku.