Read Biblia Revisión Chuya Qellqa 1992 – Chuya Qellqa 1992 2 Reyes 19 Bible Online

2 Reyes 19 - Biblia Revisión Chuya Qellqa 1992 – Chuya Qellqa 1992 bible

2 Reyes 19

¹Chayta uyariruspanmi rey Ezequías pachanta llikiparurqa, hinaspam qachqa pachawan churakuruspan Tayta Diospa templonman yaykurqa.

²Chaymantam kacharqa mayordomo Eliaquimta, secretario Sebnata hinaspa yuyaq sacerdotekunata, qachqa pachawan pachasqatakama Amozpa churin profeta Isaiasman.

³Paymanmi rey Ezequiaspa nisqanta kaynata nirqaku: Kunan punchawqa ancha llakisqa, qaqchasqa, insultasqam kachkanchik. Wachakunanpaq kachkaspan manaña kallpayuq warmi hinañam kachkanchik.

⁴Ichapas Tayta Dios uyarirqa chay kamachikuqpa rimasqankunata. Paytam Asiria nacionpa reynin kachamurqa kawsaq Diosta kaminanpaq, allinchá kanman chay rimasqankunamanta Tayta Dios puchukachiptinqa. Chaynaqa, Diostayá mañakuy puchuq kaqkunapaq, nispanku.

⁵Rey Ezequiaspa serviqninkuna Isaiaspaman chayaruptinkum

⁶Isaías nirqa: Tayta Diospa nisqanta reynikichikman kaynata willamuychik: “Asiria reypa serviqninkunapa kamiwasqanwanqa ama manchakuychu.

⁷Kunanmi Asiria nacionpa reyninta llaki willakuywan hukmanyarachisaq, hinaptinmi nacionninman kutispan hukkaqninpa wañuchisqan kanqa”, nispa.

⁸Asiria tropakuna kamachiqmi uyarirurqa Laquis llaqtamanta Asiria nacionpa reynin asurikusqantaña. Kutispanmi reyninta tarirurqa Libna llaqtapa contranpi peleachkaqta.

⁹Chaypim rey Senaqueribqa uyarirurqa contranpi peleananpaq Etiopía nacionpa reynin Tirhaca hamusqanta, chaymi rey Senaqueribqa runankunata huktawan kacharqa Judá nacionpa reynin Ezequiasman

¹⁰kaynata nimunankupaq: “Hapipakusqayki Diosnikim nichkan Asiria nacionpa reyninqa manam Jerusalén llaqtataqa munaychakunqachu”, nispa. Chay nisusqaykiwanqa ama engañachikuychu.

¹¹Qamqa uyarirqankim Asiria reykunapa llapa nacionkuna tuñichisqantaqa ¿chaychu qamñataq ayqewaq?

¹²Ñawpaq taytaykunapa tuñichisqan Gozán llaqtata, Harán llaqtata, Resef llaqtata chaynataq Telasar llaqtapi yachaq Edenpa mirayninkunata ¿yaqachu diosninku librarqa?

¹³¿Maypitaq kachkan Hamat llaqtapa, Arfad llaqtapa, Sefarvaim llaqtapa, Hena llaqtapa hinaspa Iva llaqtapa reyninkunaqa? nispa.

¹⁴Rey Ezequiasñataqmi cartata chaskiruspan leeykurqa, hinaspam Tayta Diospa templonman apaykuspan Diospa qayllanpi kicharayachkaqta churaykuspan,

¹⁵Tayta Diospa qayllanpi kaynata mañakurqa: Querubinkunapa chawpinpi yachaq Israelpa Tukuy Atiyniyuq Diosnin, qamllam kanki kay pachapi llapallan nacionkunapi munaychakuq Diosqa. Qanmi ruwarqanki hanaq pachatapas hinaspa kay pachatapas.

¹⁶Dios Taytalláy kumuykamuspa uyariykullaway, ñawillaykiwan qawariykullaway, hinaspayá rey Senaqueribpa qam kawsaq Diosta kamisusqaykita uyariykuy.

¹⁷Dios Taytalláy, cheqaptam Asiria reykunaqa llapallan nacionkunapa allpankuta purmachirqaku.

¹⁸Idolonkunatapas ninamanmi wischuykurqaku, chaykunaqa manam dioschu karqaku, aswanqa kullumanta otaq rumimanta runakunapa ruwasqallanmi, chayraykum chinkarachirqaku.

¹⁹Dios Taytalláy mañakuykim, qamlla Dios kasqaykita kay pachapi llapallan nacionkuna reqsinankupaq rey Senaqueribmanta salvaykullawayku, nispa.

²⁰Hinaptinmi Amozpa churin Isaiasqa rey Ezequiasman kaynata nichimurqa: Israelpa yupaychasqan Tayta Diosmi kaynata nin: Asiria nacionpa reynin Senaqueribmanta mañakuwasqaykitaqa uyariykuykim.

²¹Chaymi Asiria reypa contranpi ñoqa Tayta Dios kaynata nini: Yaw, rey Senaquerib, Sión llaqtaqa sipas hinam qanmanta asikun, Jerusalén llaqtaqa qepaykipim umanta aywin.

²²¿Pitataq kamirqanki? ¿Pitataq ñakarqanki? ¿Pipa contranpitaq qaparispa rimarqanki? ¿Pitataq hatunchakuspa qawarqanki? ¡Israel nacionpa chuya Diospa contranpim chaykunataqa ruwarqanki!

²³Willakuqkunata kachaspaykim Tayta Diosta insultarqanki, hinaspam nirqanki: “Achka-achka carretaykunawanmi orqopa puntankunaman qespirusaq, mana yaykuy atina Líbano orqomanmi yaykurusaq, hatun cedronkunatawan sumaq cipresninkunatam kuchurusaq. Karu-karu sitiokunamanmi chayarusaq, huerta kaqlla montekunamanmi chayarusaq.

²⁴Huklaw nacionpim pozokunata toqospay yakunta tomarqani, sarupaspaymi Egiptopa mayunkunatapas chakichirqani”, nispa.

²⁵¿Manachum uyarirqanki ñawpaqmantaraq ñoqa Tayta Dios chaykuna ruwasqayta? ¿Wiñaymantaraq ñoqa Tayta Dios chaykuna tanteasqayta? Kunanmi chaykunata ruwachkani. Chaymi murallasqa llaqtakunata tuñichirqanki, hinaspam rumikunata monturqanki.

²⁶Runankunapas mana kallpayuqmi rikurirqaku, manchakuymantam hukmanyarurqaku, purunpi qorakuna hinam rikurirurqaku, chakrapi llullu pastokuna hinam tarikurqaku, wasi hawanpi wiñachkaspa chakiruq qora hinam karqaku.

²⁷Yachanim tukuy ima ruwasqaykitapas, imapim purisqaykitapas, chaynataq contraypi piñakusqaykitapas.

²⁸Uyarinim ñoqapa contraypi piñakusqaykitapas, hatun tukuspa kamiwasqaykitapas, chayraykum argollata senqaykiman churasaq, simikimanñataqmi bozalta churasaq, hinaspaymi maymi hamusqayki ñanninta kutichisqayki, nispa.

²⁹Rey Ezequiastam Isaías nirqa: Kaykunam imam pasakunanmanta señal kanqa: Kay watapiwan hamuq watapim kikinmanta wiñaq trigota mikunkichik. Kimsa kaq watapiñataqmi tarpuspa cosechankichik, uvastapas plantaspam rurunta mikunkichik.

³⁰Judá llaqtapi puchuqkunam takyasqa sachakuna hina kanqaku, sapichakuspam allinta rurunqaku,

³¹Jerusalén llaqtamantam miranqaku, Sión moqopi kawsaqkunam qepanqaku. Tukuy Atiyniyuq Tayta Diospa kuyakuyninmi chaynata ruwanqa, nispa.

³²Asiriapa reyninmantam Tayta Dios kaynata nin: “Jerusalenmanqa manam yaykumunqachu, flechankunatapas manam kacharimunqachu, escudotapas manam hapinqakuchu, allpatapas murallapa qepanmanqa manam montochinqachu.

³³Maymi hamusqan ñanllantam kutinqa, kay llaqtamanqa manam yaykumunqachu. Ñoqa Tayta Diosmi chaynata nini.

³⁴Ñoqam kay llaqtata waqaychaspay salvasaq, kikiyraykum chaynataqa ruwasaq, serviqniy Davidta kuyasqayraykum chaynata ruwasaq”, nispa.

³⁵Chay tutam, Tayta Diospa angelnin lloqsiramuspan Asiria campamentopi pachak pusaq chunka pichqayuq waranqa soldadokunata wañurachirqa. Achikyaruptinmi llapallanku wañusqaña kachkasqaku.

³⁶Hinaptinmi Asiria nacionpa reynin Senaqueribqa Nínive llaqtanman kutispan chaypi yacharqa.

³⁷Huk punchawmi, Senaqueribqa Nisroc idolota templopi yupaychachkarqa, hinaptinmi churin Adramelecwan churin Sarezer wañurachirqaku, hinaspam Ararat lawman lluptikurqaku. Rey Senaqueribpa rantinpim churin Esar-hadonña munaychakurqa.