Read Biblia Revisión Chuya Qellqa 1992 – Chuya Qellqa 1992 2 Reyes 21 Bible Online

2 Reyes 21 - Biblia Revisión Chuya Qellqa 1992 – Chuya Qellqa 1992 bible

2 Reyes 21

¹Chunka iskayniyuq watanpim Manasés munaychakuyta qallaykurqa, pichqa chunka pichqayuq watam Jerusalén llaqtapi munaychakurqa. Mamanpa sutinmi karqa Hepsiba.

²Payqa Tayta Diospa qayllanpim mana allinkunata ruwarqa. Israelpa mirayninkunapa qayllanmanta Tayta Diospa qarqosqan runakunapa millakuypaq ruwasqankunata hina ruwaspam huchallikurqa.

³Taytan Ezequiaspa tuñichisqan capillakunatapas musoqmanta hatarichispanmi, Baal idolopaqña altarkunata ruwarqa. Israelpa reynin Acab hinam Asera idolotapas ruwarqa. Cielokunapi chaskakunatapas yupaycharqam.

⁴“Jerusalén llaqtapim sutiyta churasaq” nispa Tayta Dios nichkaptinpas Manasesqa Tayta Diospa templonpim altarkunata hatarirachirqa.

⁵Templopa iskaynin pationkunapipas cielokunapi kaq llapa chaskakunata yupaychananpaqmi altarkunata ruwarachirqa.

⁶Churintapas idolokunapaqmi kañapurqa. Layqayayman qokuruspanmi kikinpuni hatarichirqa qatipaqkunatawan alma qayaqkunata. Chay millakuypaq mana allin kaqkunata ruwaspanmi Tayta Diosta piñachirqa.

⁷Tayta Diospa templonpipas kikinpa ruwasqan Asera idolotam churarurqa. Chay templomantam Davidmanwan churin Salomonman Tayta Dios kaynata nirqa: Israelpi llapallan ayllukunamanta akllasqay Jerusalén llaqtapi kaq templopim wiñaypaq sutiyta churasaq.

⁸Chaynataqa ruwasaq kamachisqaykunata kasukuspanku serviqniy Moiseswan willachisqay yachachikuykunaman hina kawsaptinkum, ñawpaq taytankuman qosqay allpamantaqa manañam Israelpa mirayninkunataqa maylawmanpas yanqaqa purichisaqchu, nispa.

⁹Israelpa mirayninkunam ichaqa mana kasukurqakuchu. Rey Manasesqa, paykunapa qayllanmanta Tayta Diospa chinkachisqan nacionkunamantapas aswantaraqmi mana allinkunata ruwachirqa.

¹⁰Chayraykum profetankunatakama Tayta Dios nirqa:

¹¹Judá nacionpa reynin Manasesmi ñawpaq amorreokunapa millakuypaq ruwasqankumantapas aswan mana allinkunataraq ruwarqa hinaspam idolokunawan Judá nacionpi runakunatapas huchallichirqa,

¹²Israelpa yupaychasqan Tayta Diosmi kaynata nin: “Kunanmi Jerusalenmanwan Judá nacionman hatun sasachakuyta chayachimusaq, chay sasachakuymanta uyariqkunaqa muspaypi hinaraqmi rikurinqaku.

¹³Samaria llaqtatawan Acabpa mirayninkunata castigasqayta hinam Jerusalén llaqtatapas castigasaq, mayllasqa platota pakchachkaq hinam Jerusalén llaqtatapas mana imayuqta saqerusaq.

¹⁴Puchuq runaykunatañataqmi saqeruspay enemigonkunaman qoykusaq, hinaptinmi llapa imankutapas qechuspa apakunqaku.

¹⁵Chaynataqa ruwasaq, qayllaypi tukuy mana allinkunata ruwasqankuraykum. Paykunaqa Egipto nacionmanta ñawpaq taytankupa lloqsimusqanku punchawmantapunim kunankama piñachiwarqaku”, nispa.

¹⁶Rey Manasesqa millakuypaq ruwasqankunawan Judá nacionta huchallichichkaspapas, mana huchayuq runakunata wañuchispanmi Jerusalén llaqtapi kuchun-kuchun yawarta chaqchurqa.

¹⁷Rey Manasespa imaynam kawsasqanwan imakunam ruwasqanpas chaynataq millakuypaqta huchallikusqankunapas Judá nacionpi reykunapa ruwasqanmanta willakuq libropim qellqasqa kachkan.

¹⁸Manasés wañukuptinmi wasinpa huertanpi pamparurqaku, Uza sutiyuq runapa huertanpi. Paypa rantinpim churin Amonña munaychakurqa.

¹⁹Rey Amonmi iskay chunka iskayniyuq watanpi munaychakuyta qallaykurqa. Jerusalén llaqtapim iskay wata munaychakurqa. Mamanmi karqa Jotba llaqtayuq Haruzpa churin Mesulemet.

²⁰Amonpas taytan Manasés hinam Tayta Diospa qayllanpi mana allinkunata ruwarqa.

²¹Taytanpa tukuy mana allinkuna ruwasqanta hinam ruwarqa. Taytanpa yupaychasqan idolokunatam paypas yupaycharqa.

²²Ñawpaq taytankunapa yupaychasqan Tayta Diosta saqeruspanmi kikinpa munasqanman hinaña kawsakurqa.

²³Rey Amonpa serviqninkunam paypa contranpi hoqarikuruspanku hina palaciollanpi wañurachirqaku.

²⁴Llapa runakunañataqmi rey Amonpa contranpi hatarispa wañuchiq runakunata wañurachirqaku, hinaspankum rey Amonpa rantinpi churin Josiastaña munaychakunanpaq churarurqaku.

²⁵Amonpa imaynam kawsasqanwan imakunam ruwasqankunapas Judá nacionpi reykunapa ruwasqanmanta willakuq libropim qellqasqa kachkan.

²⁶Rey Amontam kikinpa sepulturanpi pamparurqaku Uza sutiyuq runapa huertanpi. Paypa rantinpim churin Josiasña munaychakurqa.