Read Biblia Revisión Chuya Qellqa 1992 – Chuya Qellqa 1992 2 Reyes 22 Bible Online

2 Reyes 22 - Biblia Revisión Chuya Qellqa 1992 – Chuya Qellqa 1992 bible

2 Reyes 22

¹Josiasqa pusaq watanpim munaychakuyta qallaykurqa. Kimsa chunka hukniyuq watam Jerusalenpi munaychakurqa. Mamanmi karqa Boscat llaqtayuq Adaiapa churin Jedida.

²Josiasqa Tayta Diospa qayllanpim allinkunata ruwaspan mana ichoqmanpas nitaq alleqmanpas muyuspa ñawpaq taytan David hina kawsarqa.

³Chunka pusaqniyuq wataña munaychakuchkaspanmi rey Josiasqa, Mesulampa willkan, Azaliapa churin secretario Safanta Tayta Diospa templonman kacharqa kaynata nispan:

⁴Sumo sacerdote Hilciasta kaynata nimuy: Runakunapa temploman apamusqanku qollqeta punkukunawan cuentallikuq runakunapa chaskisqanta hoqarimuchun,

⁵hinaspa Tayta Diospa templon allichaypi llamkachiqkunaman qochun, chaynapi templo allichaypi llamkaqkunaman,

⁶carpinterokunaman, albañilkunaman, rumi labraqkunaman paganankupaq. Chay qollqewantaqyá qerukunatapas, labrasqa rumikunatapas rantichunku, Diospa templonta allichanankupaq.

⁷Llamkachiqkuna gastananpaq qollqe qosqankumantaqa amam cuentata mañanqakuchu, paykunaqa allin sonqoyuq runakunam, nispa.

⁸Chaymi secretario Safanta sumo sacerdote Hilcías nirqa: Tayta Diospa templonpim kamachikuy librota tariruni, nispa. Hinaspanmi sacerdote Hilciasqa chay librota Safanman haywaykuptin leerqa.

⁹Leeruspanmi Safanqa kutirispan reyman kaynata nimurqa: Templopi huñusqanku qollqetaqa serviqnikikunam Tayta Diospa templon allichachiqkunaman qoykamunkuña, nispa.

¹⁰Chaymantapas Safanqa nirqataqmi: Sacerdote Hilciasmi kay librota qoykamuwan, nispa. Hinaspam reypa qayllanpi chay librota leerqa.

¹¹Kamachikuy libropa imam nisqanta uyariykuspanmi reyqa pachankunata llikipakurqa.

¹²Chaymantam sacerdote Hilciasta, Safanpa churin Ahicamta, Micaiaspa churin Acborta, secretario Safanta hinaspa serviqnin Asaiasta kaynata kamachirqa:

¹³Rispaykichik Tayta Diosta tapumuychik kay tarisqaykichik libropi imam willakusqanmanta. Tapumuychiktaqyá ñoqapaqpas chaynataq Judá nacionpi yachaq runakunapaqpas Tayta Diospa imam nisqanta. Ñawpaq taytanchikkuna kay libropa nisqanta mana kasukusqankuraykum chaynataq mana ruwayman churasqankuraykum Tayta Diospa piñakuynin contranchikpi kachkan, nispa.

¹⁴Hinaptinmi sacerdote Hilciaswan, Ahicam, Acbor, Safán hinaspa Asaías tapumunankupaq Harhaspa willkan hinaspa Ticvapa churin Salumpa warmin profetisa Huldaman rirqaku. Salumqa karqa Diospa templopi pachakunawan cuentallikuqmi. Huldaqa Jerusalén llaqtapa musoq barrionpim yacharqa. Chayaruspankum paywan rimarqaku.

¹⁵Chaymi Huldañataq paykunata nirqa: Israelpa yupaychasqan Tayta Diospa nisqantam kachamusuqnikichik runaman kaynata ninkichik:

¹⁶Tayta Diosmi kaynata nin: Kay llaqtapi yachaq runakunamanmi Judá nacionpi reypa leesqan libropi tarikuq tukuy mana allinkunata chayachimusaq.

¹⁷Ñoqata saqeruwaspanku huk rikchaq dioskunamanña inciensota kañasqankuraykum piñakuyniy nina hina kay sitiopa contranpi ruparispan mana taninqachu.

¹⁸Chaynaqa, ñoqa Tayta Diosta tapuwanaykichikpaq kachamusuqnikichik Judá nacionpa reynintam kaynata nimunkichik: Kay libropi kaqkunata uyariykuspayki,

¹⁹kay llaqtatapas chaynataq runankunatapas ñakasqa kaspanku chinkachisqa kanankupaq rimasqayta uyariykuspayki sonqoykipi llakikuspa ñoqapa qayllaypi uchuychakuspayki pachaykikunatapas llikipaspa waqasqaykiraykum ñoqapas uyariykuyki.

²⁰Chayraykum ñawpaq taytaykikuna hina wañukuspaqa hawkayaypim pampasqa kanki. Kay llaqtapa contranpi castigo apachimusqaytaqa manam rikunkichu, nispa. Chaymi kutirispanku chaynata reyman willamurqaku.