Read Biblia Revisión Chuya Qellqa 1992 – Chuya Qellqa 1992 2 Reyes 24 Bible Online

2 Reyes 24 - Biblia Revisión Chuya Qellqa 1992 – Chuya Qellqa 1992 bible

2 Reyes 24

¹Rey Joacimpa tiemponpim Babilonia nacionpa reynin Nabucodonosor, Judá nacionpa contranpi hamurqa. Venceruptinmi kimsa wata Joacim servirqa, chaymantam Nabucodonosorpa contranpi hoqarikururqa.

²Tayta Diosmi Joacimpa contranpi kachamurqa Caldea, Siria, Moab hinaspa Amón tropakunata. Paykunatam Tayta Dios kachamurqa serviqnin profetakunawan nisqanpi hina Judá nacionta chinkachinanpaq.

³Cheqaptapunipas chay castigokunataqa Tayta Diosmi Judá nacionta qayllanmanta chinkachinanpaq kacharimurqa. Kacharimurqaqa Manasespa huchanmantawan tukuy mana allinkuna ruwasqanmantam,

⁴chaynataq Jerusalén llaqtapipas mana huchayuq runakunapa yawarnin chaqchusqanmantam. Chayraykum Tayta Diosqa mana pampachayta munarqachu.

⁵Rey Joacimpa imaynam kawsasqanwan imakunam ruwasqanpas Judá nacionpi reykunapa ruwasqanmanta willakuq libropim qellqasqa kachkan.

⁶Joacim wañukuptinmi, paypa rantinpi churin Joaquinña munaychakurqa.

⁷Chaymantapunim Egipto nacionpa reyninqa manaña haykapipas llaqtanmanta lloqsirqañachu, allpankunata Babilonia nacionpa reynin Egipto mayumanta qallaykuspa Eufrates mayukama hapikuykusqanrayku.

⁸Rey Joaquinmi chunka pusaqniyuq watanpi munaychakuyta qallaykurqa. Kimsa killallam Jerusalén llaqtapi munaychakurqa. Mamanmi karqa Jerusalén llaqtayuq Elnatanpa churin Nehusta.

⁹Rey Joaquinqa taytan hinam Tayta Diospa qayllanpi mana allinkunata ruwarqa.

¹⁰Chay tiempopim Babilonia nacionpa reynin Nabucodonosorpa capitanninkuna Jerusalén llaqtapa contranpi hamururqaku, hinaspam atacanankupaq llaqtapa muyuriqninpi churakururqaku.

¹¹Capitanninkuna llaqtata atacachkaptinkum Nabucodonosor chayaramurqa.

¹²Hinaptinmi Judá nacionpa reynin Joaquinqa, mamanpiwan, serviqninkunapiwan, kamachikuqkunapiwan hinaspa palacionpi serviqkunapiwan Babilonia reypa makinman churakuykurqaku. Nabucodonosorqa presocharurqa Babilonia nacionpi pusaq wataña munaychakuchkaspanmi.

¹³Nabucodonosormi hurqorurqa, Tayta Diospa templonmanta chaynataq rey Joaquinpa palacionmanta, qorimanta qollqemanta kaqkunata. Pakiparurqataqmi Tayta Diospa nisqanman hina, Tayta Diospa templonpaq Israel nacionpa reynin Salomonpa ruwachisqan qorimanta serviciokunatapas.

¹⁴Chaymantam Jerusalén llaqtapi yachaqkunata, capitankunata, soldadokunata, tukuy oficio yachaq runakunata chaynataq herrerokunatapas presocharuspan aparurqa. Apasqankunaqa chunka waranqa runakunam karqaku. Wakchakunallatañam qeparurqaku.

¹⁵Rey Nabucodonosorqa, rey Joaquintawan, mamanta, warminkunata, palacionpi serviqninkunata chaynataq llaqtapi ancha reqsisqa runakunatapas presocharuspam Babiloniaman aparqa.

¹⁶Aparqataqmi guerrapi peleaq qanchis waranqa allinnin qari-qari soldadokunata, oficioyuq runakunata, herrerokunata chaynataq waranqa runakunatapas.

¹⁷Chaymantam Babilonia nacionpa reyninqa, Jerusalén llaqtapi rey kananpaq Joaquinpa rantinpi tion Mataniastaña churarurqa. Mataniaspa sutintam Sedequiasman tikrarurqa.

¹⁸Rey Sedequiasmi iskay chunka hukniyuq watanpim munaychakuyta qallaykurqa. Chunka hukniyuq watam Jerusalén llaqtapi munaychakurqa. Mamanmi karqa Libna llaqtayuq Jeremiaspa churin Hamutal.

¹⁹Rey Sedequiasqa, rey Joacimpa ruwasqanta hinam Tayta Diospa qayllanpi tukuy mana allinkunata ruwarqa.

²⁰Chayraykum Jerusalén llaqtapa chaynataq Judá nacionpa contranpi Tayta Dios piñakuruspan qayllanmanta wischururqa. Chaymantam rey Sedequiasqa Babilonia reypa contranpi hoqarikururqa.