Read Biblia Revisión Chuya Qellqa 1992 – Chuya Qellqa 1992 2 Reyes 7 Bible Online

2 Reyes 7 - Biblia Revisión Chuya Qellqa 1992 – Chuya Qellqa 1992 bible

2 Reyes 7

¹Chaymi Eliseo nirqa: Uyariychik Tayta Diospa nisqanta: “Paqarinmi kunan hina horata Samaria llaqtapa punkunpi qanchis kilo harina yaqa media onza qollqellaña valenqa, chunka tawayuq kilo cebadañataqmi yaqa media onza qollqellaña valenqa”, nispa.

²Chaymi profeta Eliseota reypa yanapaqnin nirqa: Hanaq pachapa ventanankunataña Tayta Dios kichaykuptinpas manam chay nisqaykiqa cumplikunmanchu, nispa. Hinaptinmi Eliseo nirqa: Qamqa rikunkim ichaqa manam mikunkichu, nispa.

³Llaqtapa punkunpa hawa lawninpim lepra onqoyniyuq tawa runakuna kachkarqaku. Paykunam ninakurqaku: ¿Imatataq kaypi ruwanchik wañuyta suyaspanchikqa?

⁴Llaqta ukuman yaykuspaqa wañurusunmi, llaqta ukupiqa yarqaymi kakuchkan, kaypi qepaspapas wañurusuntaqmi; kaypi kananchiktaqa Siria nacionpa campamentonman hakuchik. Paykuna llakipayariwaptinchikqa kawsasunmi, wañurachiwaptinchikqa wañusuntaqchiki, nispanku.

⁵Chaymi tutaykuchkaptinña hatarispanku Siria nacionniyuq tropakunapa campamentonman pasarqaku. Ichaqa campamentoman chayaruspankum mana pitapas tarirqakuchu.

⁶Tayta Diosmi Siria tropakunapa campamentonpi uyarirachirqa carretakunapa caballokunapa kallpayninta hinaspa nana-nanaq tropakunapa sinchi qapariyninta. Chayraykum ninakurqaku: Israelpa reyninmi qollqewan contrataramun Het castakunapa reyninkunatawan Egipto lawpi reykunata hamuspa contranchikpi peleanankupaq, nispanku.

⁷Chaynapim yaqa qaspaykuchkaqtaña carpankuta, caballonkuta, asnonkuta hinaspa campamentonkuta maymi kasqanpi saqeruspanku vidankurayku lluptikurqaku.

⁸Lepra onqoyniyuq runakunam campamentoman chayaruspanku huk carpaman yaykuruspa mikurqaku hinaspa upyarqaku. Qollqeta, qorita hinaspa pachakunata apaspankum pakaramurqaku. Huktawan kutirispankum huk carpamanpas yaykuspa chaymantapas tukuy imata apaspa pakaramurqaku.

⁹Chaymantam ninakurqaku: Kay ruwasqanchikqa manam allinchu. Kunanqa allin noticia willakuna kachkaptinmi ñoqanchikqa upallakuykunchik. Achikyanankama suyaspaqa castigasqam kachwanchik. Kunanpuni llaqtaman rispanchik reypa wasinman yaykuspa willakamusunchik, nispanku.

¹⁰Chayaruspankum llaqtapa punkun waqaychaqkunata kaynata qayaykacharqaku: Siria nacionniyuq tropakunapa campamentonmanmi rirqaniku chaymi mana ima runapas kanchu, nitaqmi rimasqankupas uyarikunchu. Caballokunawan asnokunallam watarayachkan. Carpankupas imam kaqllam kachkanku, nispanku.

¹¹Punku waqaychaqkunañataqmi qayaykachakuspanku reypa wasinman chay willakuyta chayachirqaku.

¹²Chay tutam rey hatarispan serviqninkunata nirqa: Siria nacionniyuq tropakunapa imam ruwawasqanchikta nisqaykichik. Yarqaymanta kasqanchikta yachaspankum campamentonkumanta lloqsiruspanku chakrakunapi pakakurunku kaynata nispanku: “Llaqtamanta lloqsiramuptinkum kawsachkaqllata hapirusunchik, hinaspam llaqtaman yaykurusunchik”, nispanku.

¹³Chaymi huknin serviqnin nirqa: Kay llaqtapi puchuq pichqa caballokunapi silladakunata kacharusun imaynam kasqanta yacharamunankupaq. Paykunapas Israel nacionpi runakuna hinallam kawsanqaku otaq wañunqakupas, nispa.

¹⁴Chaynapim iskay carretakunaman caballokunata wataruptinku rey kacharqa, Siria nacionniyuq tropakunata qawamunankupaq.

¹⁵Rispankum Jordán mayukama chayarurqaku, hinaspam Siria tropakuna lluptispa wichichisqanku pachakunatawan llapa imakunata ñanpi tarirqaku. Chaymi kutiramuspanku reyman willaykurqaku.

¹⁶Hinaptinmi llaqtamanta runakuna lloqsispanku Siria nacionniyuq tropakunapa campamentonmanta tukuy imata apakamurqaku. Chay punchawpim Tayta Diospa nisqanpi hina, qanchis kilo harinapas chaynataq chunka tawayuq kilo cebadapas yaqa media onza qollqellaña valerqa.

¹⁷Reymi yanapaqninta kamachirqa llaqtapa punkunta cuidananpaq, ichaqa runakunam tanqanakuspanku payta wañunankama saruparurqaku, chaynaqa pasakurqa reywan tupasqan punchawpi profeta Eliseopa nisqanpi hinam.

¹⁸Chaykunaqa pasakurqa profeta Eliseopa imaynam reyman kayna willasqanman hinam: “Paqarinmi kunan hina horata Samaria llaqtapa punkunpi qanchis kilo harina chaynataq chunka tawayuq kilo cebada yaqa media onza qollqellaña valenqa”, nispa.

¹⁹Chaynata profeta Eliseo niptinmi reypa yanapaqnin soldado nirqa: Hanaq pachapa ventanankunataña Tayta Dios kunan kichaykamuptinpas manam chaynaqa pasakunmanchu, nispa. Hinaptinmi Eliseo nirqa: Qamqa rikunkim ichaqa manam mikunkichu, nispa.

²⁰Nisqanpi hinam chayna pasakurqa, runakunam wañunankama saruparurqaku.