Read Biblia Revisión Chuya Qellqa 1992 – Chuya Qellqa 1992 1 Crónicas 12 Bible Online

1 Crónicas 12 - Biblia Revisión Chuya Qellqa 1992 – Chuya Qellqa 1992 bible

1 Crónicas 12

¹Cispa churin Saulpa qayllanmanta David hinallaraq qarqosqa kachkaptinmi, achka allinnin qari-qari soldadokuna guerrapi yanapanankupaq Davidman Siclag llaqtapi hukllawakuykurqaku.

²Chay tropakunam flechakunawan armasqa karqaku, iskaynin makinkuwanmi warakaqkupas hinaspa flechaqkupas. Paykunam karqaku: Benjamín ayllumanta kaq Saulpa castankunamantam,

³Ahiezer kamachiqninku karqa, qepanmanmi qatirqa Joás, paykunam karqaku Gabaa llaqtayuq Semaapa churinkuna; Azmavetpa churinkuna Jezielwan Pelet; Anatot llaqtayuq Beracawan Jehú,

⁴Gabaón llaqtayuq Ismaías, payqa karqa kimsa chunka allinnin qari-qari runakunapa kamachiqninmi; Jeremías, Jahaziel, Johanán, Geder llaqtayuq Jozabad,

⁵Eluzai, Jeremot, Bealías, Semarías, Haruf llaqtayuq Sefatías.

⁶Coré ayllunmanta kaq Elcana, Isías, Azareel, Joezer, Jasobeam;

⁷hinaspa Gedor llaqtayuq Jerohampa churin Joelwan Zebadías.

⁸Gad ayllumanta kaqkunapas wakinmi rakikuruspanku Davidman hukllawakururqaku chunniqpi pakakusqan sitiopi kachkaptin; paykunaqa karqaku guerrapaq allinnin qari-qari soldadokunam, escudokunawan hinaspa lanzakunawan armasqam karqaku; rikchayninkupas leonkunapa rikchaynin hinaraqmi karqa, kallpaqkupas orqopi luwichukuna hinaraqmi.

⁹Kamachikuqkunam karqaku: Ezer, Obadías, Eliab,

¹⁰Mismana, Jeremías,

¹¹Atai, Eliel,

¹²Johanán, Elzabad,

¹³Jeremías hinaspa Macbanai.

¹⁴Paykunam karqaku Gadpa mirayninmanta kaq tropakunapa kamachiqninkuna. Wakiqmi pachak soldadokunata kamachirqa, wakiqñataqmi waranqa soldadokunata.

¹⁵Paykunam Jordán mayuta punta kaq killapi chimparurqaku, mayupas kuchun-kuchun llimparichkaptin, hinaspam qechwapi yachaqkunata intipa qespimunan lawman hinaspa intipa seqaykunan lawman cheqerachirqaku.

¹⁶Chaynataqmi Benjaminpa hinaspa Judapa wakin mirayninkunapas Davidpa maymi pakakusqanman rirqaku.

¹⁷Chaymi hamuqkunaman taripaykuspan David nirqa: Sichum allin sonqowan yanapawanaykichikpaq hamuchkankichik hinaptinqa tukuy sonqoywanmi chaskisqaykichik, sichum mana huchayuq kachkaptiy enemigoykunaman qoykuwanaykichikpaq hamuptikichikqa, ñawpa taytaykichikkunapa Diosninyá juzgaspa castigasunkichik, nispa.

¹⁸Hinaptinmi kimsa chunka soldadokunapa kamachiqnin Amasaiman Tayta Diospa Espiritun huntaykurqa, chaymi pay nirqa: ¡David, ñoqaykuqa qampam kaniku! ¡Isaipa churin, ñoqaykuqa qanwanmi kachkaniku! ¡hawkayay qanwan kachun! ¡Yanapaqnikikunawanpas hawkayay kachun! ¡Diosnikim yanapasuqnikiqa! nispa. Chaymi paykunata David chaskiykuspan tropankunata kamachinankupaq churaykurqa.

¹⁹Manasespa wakin mirayninkunapas Davidmanmi hukllawakururqaku, Filistea tropakunawan Saulpa contranpi peleananpaq riptin. Chaywanpas Davidqa manam filisteokunataqa yanaparqachu, Filistea tropakunapi kamachikuqkuna Davidmanta rimanakuspanku “traicionaruwaspanchikmi reynin Saulman hukllawakuykunman” nispa qarqorusqankurayku.

²⁰Qarqoruptinku Siclag llaqtaman David kutiruptin, Manasespa mirayninkunamanta hukllawakuqkunam karqaku: Adnas, Jozabad, Jediael, Micael, Jozabad, Eliú hinaspa Ziletai. Paykunaqa karqaku Manasespa tropankunapi kamachikuqkunam.

²¹Paykunam salteaqkunapa contranpi Davidta yanaparqaku, llapallankum allinnin qari-qari soldadokuna karqaku hinaspam tropakunapa kamachiqnin rikurirurqaku.

²²Sapa punchawmi Davidta yanapanankupaq achka-achka tropakuna hukllawakamuqku, chaynapim nana-nanaq tropakuna rikurirurqaku.

²³Hebrón llaqtapi David kachkaptinmi, guerrapaq hina tropakuna payman hukllawakurqaku, chay tropakunam hamurqaku Tayta Diospa prometesqanman hina Saulpa rantinpi Davidtaña rey kananpaq churanankupaq. Chay hamuqkunam karqaku:

²⁴Judá ayllumanta soqta waranqa pusaq pachaknin runakuna, paykunaqa guerrapaq hinam escudoyuqkama lanzayuqkama karqaku.

²⁵Simeón ayllumantam qanchis waranqa pachaknin qarikuna, paykunaqa guerrapaq hina allinnin qari-qari kallpasapakunam karqaku.

²⁶Leví ayllumantam tawa waranqa soqta pachaknin qarikuna.

²⁷Aaronpa mirayninkunapi kamachikuq Joiadapas kimsa waranqa qanchis pachaknin qarikunawanmi hamurqa.

²⁸Hamurqataqmi guerrapi puriq allinnin qari-qari joven Sadocpas, ayllunmanta iskay chunka iskayniyuq kamachikuqkunapiwan.

²⁹Benjamín ayllumanta kaq Saulpa castankunamantam hamurqaku kimsa waranqa qarikuna. Chaywanpas Benjaminpa mirayninkunaqa yaqa llapallankum Saulman sayapakurqaku.

³⁰Efraín ayllunmantam hamurqaku iskay chunka waranqa pusaq pachaknin allinnin qari-qari runakuna, ayllunku ukupi ancha reqsisqa qarikuna.

³¹Manasespa wakin ayllunmantam hamurqaku chunka pusaqniyuq waranqa qarikuna. Paykunam Davidta reyta churamunankupaq kachasqa karqaku.

³²Isacar ayllumantam hamurqaku iskay pachak kamachikuqkuna, paykunaqa tiempokuna qawayta allinta yacharqaku, yacharqakutaqmi Israelpa mirayninkunapa imam ruwanantapas.

³³Zabulón ayllumantam hamurqaku pichqa chunka waranqa runakuna chaylla guerraman lloqsiqkuna, tukuy rikchaq armakuna aparisqa, chaynapi mana iskayrayaspa guerrapi peleanankupaq.

³⁴Neftalí ayllumantam hamurqaku waranqa kamachikuqkuna, paykunawanmi hamurqa kimsa chunka qanchisniyuq waranqa qarikuna, sapakama escudoyuqkama hinaspa lanzayuqkama.

³⁵Dan ayllumantam hamurqaku iskay chunka pusaqniyuq waranqa soqta pachaknin guerrapaq qarikuna.

³⁶Aser ayllumantam hamurqaku tawa chunka waranqa guerrapaq qarikuna.

³⁷Jordán mayupa waklaw chimpanpi Rubén ayllumanta, Gad ayllumanta chaynataq Manasespa wakin ayllumanta kaqkunapas, pachak iskay chunka waranqa qarikunam hamurqaku, guerrapi peleanankupaq tukuy rikchaq armakuna aparisqa.

³⁸Kay llapallankum guerraman richkaq hina allin armasqakama Hebrón llaqtaman rirqaku, chaynapi Israel nacionpi rey kananpaq Davidta churanankupaq. Israel nacionpi wakin runakunapas huk sonqollam karqaku rey kananpaq Davidta churanankupaq.

³⁹Hinaspam Davidwan kimsa punchaw mikuspa tomaspa karqaku, chaynataqa ruwarqaku casta masinkuna tukuy imata apamuspa qosqankuraykum.

⁴⁰Hichpanpi yachaqkunapas, Isacar aylluwan, Zabulón aylluwan hinaspa Neftalí aylluwan kuskam, asnokunapi, camellokunapi, mulakunapi hinaspa torokunapi mikuyta apamurqaku. Apamurqakutaqmi harinatapas, higosmanta tortillatapas, uvas pasastapas, vinotapas, aceitetapas, torokunatapas hinaspa ovejakunatapas achkanpi. Chaykunataqa apamurqaku Israelpi hatun kusikuy kasqanraykum.