Read Biblia Revisión Chuya Qellqa 1992 – Chuya Qellqa 1992 1 Crónicas 13 Bible Online

1 Crónicas 13 - Biblia Revisión Chuya Qellqa 1992 – Chuya Qellqa 1992 bible

1 Crónicas 13

¹Waranqapi kamachiqkunawan, pachakpi kamachiqkunawan hinaspa wakin kamachikuqkunawan David rimanakuruspanmi,

²Israelpa mirayninkunata nirqa: Qamkunapaq allin rikchakapusuptikichikqa chaynataq Tayta Diospaqpas allin kaptinqa, willakuqkunatayá kachasunchik tukuy hinastin Israel nacionpi yachaq ayllunchikkunaman, llapa sacerdotekunaman chaynataq llaqtakunapi hinaspa echaderokunapi yachaq Levitakunamanpas willamuptinku ñoqanchikman hukllawakamunankupaq.

³Chaynapi llapallanchik Diosninchikpa Arcanta kayman apamunanchikpaq. Diospa Arcantaqa Saulpa tiemponmantaraqmi qonqaykurqanchik, nispa.

⁴Hinaptinmi huñunasqa runakuna “Allinmi” nirqaku, llapallankupaq allin rikchakapusqanrayku.

⁵Chaymi Davidqa, llapallan Israelpa mirayninkunata huñurachirqa, Egipto nacionwan tupanakuqpi Sihor llaqtamanta qallaykuspa Hamat lawman yaykunakama, Quiriat-jearim llaqtamanta Diospa Arcanta apamunankupaq.

⁶Chaymantam Israelpi llapallan runakunawan kuska Quiriat-jearim llaqtaman David rirqa, Tayta Diospa Arcanta apamunankupaq. Chay Arcantakamam querubinkunapa chawpinpi yachakuq Tayta Diosta qayakuqku. Quiriat-jearim llaqtapa huknin sutinmi karqa Baala, Judá lawpim tarikurqa,

⁷hinaspankum Tayta Diospa Arcanta musoq carretaman churaykuspanku Abinadabpa wasinmanta aparqaku. Uzawan Ahioñataqmi carretata pusarqaku.

⁸Davidwan llapa runakunañataqmi Diospa ñawpaqninta rispa anchata kusikurqaku, tukuy sonqonkuwan takispam arpakunapa, tinyakunapa, platillokunapa hinaspa trompetakunapa waqayninwan tusurqaku.

⁹Quidonpa eranman chayaruptinkum torokuna mitkaruptin Diospa Arcanta mana wichiykunanpaq Uza sutiyuq runa Arcata hapirurqa.

¹⁰Chaymi Uzapa contranpi Tayta Dios piñakururqa, Arcata makinwan hapirusqanrayku, chaynapim Diospa qayllanpi wañururqa.

¹¹Davidñataqmi Uzata Tayta Dios wañurachisqanrayku piñakuruspan chay lugarta “Pérez-uzawan” suticharurqa. Kunankamapas chaynam sutin.

¹²Chay punchawmi Davidqa Tayta Diosta manchakuspan kaynata nirqa: “Diospa Arcantaqa manam apachiymanchu”, nispa.

¹³Diospa Arcanta “Davidpa Llaqtanwan” sutichasqa llaqtaman manaña apayta munaspanmi Gat llaqtayuq Obed-edompa wasinmanña aparachirqa.

¹⁴Kimsa killam Diospa Arcan Obed-edompa wasinpi karqa, chayraykum Obed-edompa ayllunkunata chaynataq tukuy ima kapuqnintapas Tayta Dios bendecirqa.