Read Biblia Revisión Chuya Qellqa 1992 – Chuya Qellqa 1992 1 Crónicas 14 Bible Online

1 Crónicas 14 - Biblia Revisión Chuya Qellqa 1992 – Chuya Qellqa 1992 bible

1 Crónicas 14

¹Tiro llaqtapa reynin Hiranmi runankunata Davidman kacharqa, kacharqataqmi albañilkunatawan carpinterokunatapas cedromanta qerukunata apachispan, Davidpa palacionta ruwamunankupaq.

²Chaywanmi Davidqa yachakururqa Israelpi rey kananpaq Tayta Diospa churasqanta chaynataq Israel nacionpi munaychakuynin hatunchasqantapas.

³Davidmi Jerusalén llaqtapi warmikunawan casarakuruspan qarikunata warmikunata churyakurqa.

⁴Davidpa Jerusalenpi naceq churinkunam karqa: Samúa, Sobab, Natán, Salomón,

⁵Ibhar, Elisúa, Elpelet,

⁶Noga, Nefeg, Jafía,

⁷Elisama, Beeliada hinaspa Elifelet.

⁸Israel nacionpi rey kananpaq David churasqa kasqanta yacharuspankum llapa Filisteokuna paypa contranpi hamurqaku. Chayta yacharuspanmi Davidpas paykunapa contranpi lloqsirqa.

⁹Filisteokunam Refaim qechwaman chayaruspanku chayninta qespimurqaku.

¹⁰Hinaptinmi Diosta David tapurqa: ¿Risaqchu filisteokunapa contranpi? ¿Makiymanchu paykunata churaykamunki? nispa. Chaymi Tayta Dios nirqa: Riypuni, filisteokunataqa makikimanmi churamusaq, nispa.

¹¹Chaymi Baal-perazim sitiokama chayaruspan filisteokunata David vencerurqa, chayraykum nirqa: Lloqllapa wayqosqanta hinam Tayta Diosqa enemigoykunapa chawpinta ñanta kichaykapuwan, nispa. Chayraykum chay sitiota suticharqa “Baal-perazim” nispa.

¹²Filisteokuna llapa idolonkuta chaypi saqeruptinkum David kañarachirqa.

¹³Filisteokunam kaqllamanta Refaim qechwapi yachaqkunata salteanankupaq hamururqaku.

¹⁴Chaymi David huktawan Diosta tapurqa, hinaptinmi Dios nirqa: Ama riychu paykunapa ñawpaqninmanqa, aswanqa muyuriruspaykichik bálsamo sachakunapa ñawpaqninmanta atacaychik.

¹⁵Bálsamo sachakunapa hawanpi tropakunapa kallpasqanta hina uyarispaykim atacayta qallaykunki, ñoqa Diosñataqmi qampa ñawpaqnikita risaq Filistea tropakunata wañuchinaypaq, nispa.

¹⁶Diospa kamachisqanman hina ruwaspanmi Filistea tropakunata David vencerurqa, Gabaón llaqtamanta Gezer llaqtapa hichpankama.

¹⁷Davidpa tukuy ima ruwasqankunam llapa nacionkunapi uyarikurqa, Tayta Diosñataqmi chay nacionkunaman manchakuyta qoykurqa Davidta manchakunankupaq.