Read Biblia Revisión Chuya Qellqa 1992 – Chuya Qellqa 1992 1 Crónicas 19 Bible Online

1 Crónicas 19 - Biblia Revisión Chuya Qellqa 1992 – Chuya Qellqa 1992 bible

1 Crónicas 19

¹Chaykunapa qepantam Amonpa mirayninkunapa reynin Nahas wañukurqa, chaymi paypa rantinpi churin Hanunña munaychakurqa.

²Hinaptinmi David nirqa: Nahaspa churin Hanuntaqa kuyapayasaqmi, imaynam taytanpas kuyapayawasqanta hina, nispa. Chaynapim Taytanpa wañukusqanmanta Hanunta consuelananpaq, serviqninkunata David kacharqa. Ichaqa Davidpa serviqninkuna Amonpa mirayninkunapa allpanman chayaruptinkum,

³Amonpa kamachiqninkuna Hanunta nirqaku: ¿Creenkichu taytaykita kuyasqanrayku consuelasunaykipaq serviqninkunata David kachamusqanta? ¿Manachum kay runakunataqa kachamusuchkanki llaqtata wateqaspa puchukarachinankupaq? nispanku.

⁴Chaymi rey Hanunqa, Davidpa serviqninkunata hapiruspa barbankuta ruturuspa pachankutapas siki patankama kuchururqa, chaymantañam kachaykurqaku.

⁵Paykunata imam pasarusqanta Davidman willaykuptinkum, paykuna llumpayta penqakusqankurayku, runankunata kachaspan kaynata nichimurqa: Barbaykichik wiñanankamayá Jericó llaqtapi qepaychik, chaymantañam kutimunkichik, nispa.

⁶Amonpa mirayninkunam yacharurqaku Davidpa cheqnipakurusqanta, chaymi Hanunwan Amonpa mirayninkuna apachirqaku kimsa chunka kimsayuq waranqa kilo qollqeta, chaynapi guerrapaq carretakunatawan sillada soldadokunata Mesopotamiapi, Maacapi hinaspa Sobapi yachaq Siria runakunamanta alquilamunankupaq.

⁷Chaynapim alquilaramurqaku guerrapaq kimsa chunka iskayniyuq waranqa carretankunatawan Maaca nacionpa reynintapas tropantinta. Paykunam hamuruspanku Medeba llaqtapa chimpanpi campamentonkuta sayachirqaku. Amonpa mirayninkunapas llaqtankumanta lloqsiramuspankum guerraman rinankupaq huñunakururqaku.

⁸Chayta David yacharuspanmi Joabtawan llapallan allinnin qari-qari soldadonkunata kacharqa.

⁹Amonpa mirayninkunam peleanankupaq llaqta punkunpi tropa-tropa kinrayninman churakururqaku. Hamuq reykunañataqmi campopi sapaq churakururqaku.

¹⁰Joabñataqmi Siria tropakuna kaylawninmanta atacamunanta Amón tropakunañataq waklawninmanta atacamunanta qawakuykuspan, Israelpa alli-allinnin qari-qari soldadonkunata akllakuspan Siria tropakunawan peleananpaq churakuykurqa.

¹¹Wakiqnin tropankunatañataqmi wawqen Abisaiman saqeykurqa chaynapi Amonpa tropakunawan peleananpaq,

¹²kaynata nispan: Siria tropakuna vencemuwaptinqa yanapaqniymi hamunki, Amonpa tropakuna vencemusuptikiñataqmi yanapaqniki hamusaq.

¹³Kallpanchakuyá nacionninchikrayku chaynataq Diosninchikpa llaqtankunaraykuyá peleasun. ¡Tayta Diosyá munasqanta ruwachun! nispa.

¹⁴Chaynata nispanmi Joabqa soldadonkunawan Siria tropakunata atacarqa, Siria tropakunam ichaqa lluptikurqaku.

¹⁵Siria tropakunapa lluptisqanta rikuruspankum Amón tropakunapas Joabpa wawqen Abisaimanta lluptispanku llaqtaman yaykururqaku. Joabñataqmi Jerusalén llaqtaman kutikurqa.

¹⁶Siria tropakunam Israel tropankunapa vencerusqanta qawakuykuspanku, runakunata kacharqaku Eufrates mayupa waklaw chimpanpi kaq Siria runakunata pusamunankupaq, paykunapa capitanninmi karqa Sofac. Payqa Hadad-ezerpa llapallan tropankunapa kamachiqninmi karqa.

¹⁷Chayta Davidman willaykuptinkum, Israelpa tropankunata huñuruspan Jordán mayuta chimparurqaku Siria tropakunawan peleanankupaq. Davidmi tropankunata kamachirqa Siria tropakunawan peleanankupaq, chaymi paykuna pelearqaku.

¹⁸Ichaqa Siria tropakunam Israelmanta ayqekurqaku; chaymi Davidqa Siria tropakunata carretawan peleaqkunata qanchis waranqa soldadokunata wañurachirqa, chakiwan riqkunatañataqmi tawa chunka waranqa soldadokunata. Siria tropakunapa kamachiqnin Sofactapas wañurachirqam.

¹⁹Hadad-ezerpa yanapaqnin reykunañataqmi Israel tropakunapa vencerusqanta qawakuykuspanku, Davidwan hawkayayman yaykuspanku paytaña servirqaku. Chaymantam Siria runakunaqa Amonpa mirayninkuna yanapayta manchakururqaku.