Read Biblia Revisión Chuya Qellqa 1992 – Chuya Qellqa 1992 1 Crónicas 21 Bible Online

1 Crónicas 21 - Biblia Revisión Chuya Qellqa 1992 – Chuya Qellqa 1992 bible

1 Crónicas 21

¹Satanasmi Israelpa contranpi hatarispan, Israel nacionpi runakunata yupachinanpaq Davidta kallpancharurqa.

²Chaymi Joabtawan llaqtapi kamachikuqkunata David kaynata kamachirqa: Rispayá Israel nacionpi runakunata yupamuychik Beerseba llaqtamanta qallaykuspa Dan llaqtakama, chaynapi guerrapaq hina runakuna haykam kasqanta yachanaypaq, nispa.

³Joabñataqmi reyta nirqa: Tayta Diosyá kay nacionpi runakunata kunan kasqankumantapas pachak kuti mastaraq mirachichun. Reynilláy ¿manachum paykunaqa llapallankupas serviqnikikuna? ¿Imapaqtaq runakuna yupachiyta munanki, chaynapi Israelta huchallichinaykipaq? nispa.

⁴Ichaqa reypa kamachisqanmi Joabpa nisqanmantapas aswan atiyniyuq karqa. Chaymi Joabqa Israelpi puriramuspan Jerusalén llaqtaman kutimurqa.

⁵Hinaspanmi reyman Joab willarqa guerrapaq hina runakuna haykam kasqanta. Lliw Israel nacionpim karqa huk wara-waranqa pachak waranqan runakuna, Judá lawpiñataqmi karqa tawa pachak qanchis chunka waranqa runakuna. Paykunam karqaku guerraman rinankupaq hina qarikuna.

⁶Leví ayllutawan Benjamín ayllutam ichaqa mana yuparqakuchu, reypa kamachikuynin Joabman mana allinpaq rikchakapusqanrayku.

⁷Diospaqqa reypa kamachikusqanqa manam allinchu karqa, chayraykum Israel nacionta castigarqa.

⁸Hinaptinmi Diosta David nirqa: Hatuntam huchallikuruni kaykunata ruwaruspay, kunanmi mañakuyki kay serviqnikita mana allin ruwasqanmanta pampachaykuwanaykipaq, mana yachayniyuq hinam kaykunata ruwaruni, nispa.

⁹Chaymi Davidpa tapukunan profeta Gadta Tayta Dios nirqa:

¹⁰Davidman rispayki kaynata nimuy: Tayta Diosmi kaynata nin: “Kay kimsa castigokunamanta hukninta akllakuykuy, chay akllakusqaykiman hina qamta castiganaypaq”, nispa.

¹¹Chaymi Davidpa kasqanman rispan profeta Gad nirqa: Tayta Diosmi kaynata nin: Mayqantataq akllakunki,

¹²kimsa wata muchuy kanantachu, kimsa killapuni enemigoykikunapa guerrapi vencesqan kaytachu, icha kimsa punchawpuni peste onqoywan kay nación castigasqa kanantachu, chay peste onqoywanmi Tayta Diospa angelnin Israelpi runakunata wañuchinqa. Chaynaqa, allinta tanteaykuspa akllakuykuy, chaynapi kutispay kachamuwaqniyman willamunaypaq, nispa.

¹³Hinaptinmi David nirqa: Hatun sasachakuypim rikuriruni. Tayta Diospa makinman wichiykuymi aswan allinqa runakunapa makinman wichiykuymantaqa. Paypa kuyapayakuyninqa ancha hatunmi, nispa.

¹⁴Chaymi peste onqoyta Israel runakunaman Tayta Dios kachaykamuptin qanchis chunka waranqa runakuna wañururqaku.

¹⁵Tayta Diosmi huk angelta kamachimurqa Jerusalén llaqtapi runakunata wañuchinanpaq. Ichaqa llapa runakunata wañuchichkaptinmi, Tayta Dios qawariykuspan sinchita llakikururqa, chaymi wañuchiq angelta nirqa: Amaña masta wañuchiyñachu, nispan. Tayta Diospa angelninmi Jebús llaqtayuq Ornanpa trigo trillasqan erapa patanpi kachkarqa.

¹⁶Davidñataqmi qawarispan Tayta Diospa angelninta rikururqa kay pachapa altonpi kaspan espadanta hapiykuspan Jerusalén llaqtaman haywarayachkaqta. Chaymi Davidwan llapa ancianokuna, qachqa pachawan pachakuruspanku qonqoranpa pampaman kumuykurqaku.

¹⁷Hinaptinmi Diosta David nirqa: Runakuna yupasqa kananpaqqa ñoqam kamachirqani, ñoqam huchallikuruniqa, ñoqataqmi mana allintapas ruwaruniqa, ichaqa ¿imatataq kay mana huchayuq runakuna ruwarunku? Dios Taytalláy, ruegakuykim ñoqatawan ayllunkunata castigawanaykikupaq, llaqtaykitaqa amayá imanaychu, nispa.

¹⁸Chaymi profeta Gadta Tayta Diospa angelnin nirqa: Davidta kamachiy chaynapi Jebús llaqtayuq Ornanpa eranpi Tayta Diospaq altarta hatarichimunanpaq, nispa.

¹⁹Chaymi profeta Gadnintakama Tayta Diospa kamachisqanman hina David ruwarqa.

²⁰Ornanñataqmi trigota trillachkaspan angelta rikururqa, paywan tarikuq tawan churinkunañataqmi pakakururqaku.

²¹Ornanpa kasqanman David chayaruptinmi, Ornanqa erapi trigota trillasqanmanta lloqsispan Davidpa qayllanpi qonqorakurqa.

²²Chaymi Ornanta David nirqa: Tayta Diospaq altarta ruwanaypaq kay eraykita rantikuruway. Imam mañakusqayki preciotam pagasqayki, chaynapi runakunata wañuchiq peste onqoy taninanpaq, nispa.

²³Hinaptinmi Davidta Ornán nirqa: Reynilláy, kayqaya eraqa makikipi munasqaykiman hina ruwanaykipaq, lliw kañana sacrificiota ofrecenaykipaqpas ñoqam torokunata qosqayki, trillanakunatapas yantapaq, trigotapas ofrendapaq. ¡Reynilláy lliwtam qoyki! nispa.

²⁴Chaymi rey David nirqa: Manapunim chaynaqa kanmanchu, ñoqaqa cabal precionwanmi rantisqayki; Tayta Diospaqqa manam qampa kaqtaqa imatapas hapisaqchu, nitaqmi mana qollqeypa chanintaqa lliw kañana sacrificiotapas ofrecesaqchu, nispa.

²⁵Chaynapim Davidqa chay eranmanta Ornanman pagapurqa qanchis kilo qorita.

²⁶Hinaspanmi Tayta Diospaq altarta hatarichispan lliw kañana sacrificiotawan Dioswan allinlla kasqanmanta ofrendakunata ofrecerqa. Chaymantam Tayta Diosta mañakuptin payñataq nimurqa, hanaq pachamanta lliw kañana sacrificiota churasqan altarpa hawanman ninata kacharimuspan.

²⁷Hinaptinmi angelta Tayta Dios kamachirqa espadanta vainanman kutiykachinanpaq.

²⁸Davidqa Jebús llaqtayuq Ornanpa eranpi mañakusqanta Tayta Dios uyarisqanta qawaykuspanmi, sacrificiokunata chaypi ofrecerqa.

²⁹Moisespa chunniqpi Tayta Diospaq carpa ruwasqanwan animalkuna ofrecenapaq altar Gabaón moqopi kachkaptinpas,

³⁰Davidqa manam Diosta tapukamunanpaq Gabaón lawman riyta atirqachu, Tayta Diospa angelninpa espadanta rikuruspan llumpayta mancharikusqanrayku.