Read Biblia Revisión Chuya Qellqa 1992 – Chuya Qellqa 1992 2 Crónicas 21 Bible Online

2 Crónicas 21 - Biblia Revisión Chuya Qellqa 1992 – Chuya Qellqa 1992 bible

2 Crónicas 21

¹Rey Josafat wañukuptinmi “Davidpa Llaqtan” nisqankupi pamparurqaku, paypa rantinpim churin Joramña munaychakurqa.

²Jorampa wawqenkunam karqa: Azarías, Jehiel, Zacarías, Azarías, Micael hinaspa Sefatías. Paykunam Judá nacionpa reynin Josafatpa churinkuna karqaku.

³Josafatmi churinkunaman regalarqa qorita, qollqeta, alhajakunata, regalarqataqmi Judá nacionpi murallasqa llaqtakunatapas. Joramtam ichaqa piwi churin kasqanrayku munaychakunanpaq churarqa.

⁴Rey Jorammi taytanpa rantinpi munaychakuyta qallaykurqa. Munaychakuyninpi allinta takyaykuspanmi, llapallan wawqenkunata wañurachirqa, wañurachirqataqmi Israelpi wakin kamachikuqkunatapas.

⁵Joramqa kimsa chunka iskayniyuq watanpim munaychakuyta qallaykurqa, pusaq watam Jerusalén llaqtapi munaychakurqa.

⁶Ichaqa Israel nacionpi reykunapa kawsasqanta hinam kawsarqa, Acabpa ruwasqankunata hinam ruwarqa. Acabpa warmi churinwan casarakuruspanmi Tayta Diospa qayllanpipas millakuypaq kaqkunata ruwarqa.

⁷Chaywanpas Davidwan pactota ruwasqanraykum Tayta Diosqa mana munarqachu Davidpa ayllunkuna chinkarachiyta. Chaynataqa ruwarqa wiñaypaq ratachkaq achkiyta hina Davidmanwan mirayninkunaman qonanpaq prometesqanraykum.

⁸Rey Jorampa tiemponpim, Edom nacionpas Judá nacionpa munaychakusqan kachkaspan contranpi hoqarikururqa, hinaspam reyninkuta churakururqaku.

⁹Chayraykum rey Joramqa soldadokunapa kamachiqninkunawan hinaspa carretankunawan pasarqa. Chaymi paywan llapa carretakunapa capitanninkuna tuta hatariruspanku muyuriruqninku Edom runakunata atacarurqaku.

¹⁰Chaywanpas Edom nacionqa Judá nacionpa munaychakuyninmantam librakururqa, chaynam kachkan kunankamapas. Chay tiempopitaqmi Libna llaqtapas Judá nacionpa munaychakuyninmanta librakururqa. Chaykunaqa pasakurqa rey Joram ñawpaq taytankunapa yupaychasqanku Tayta Diosta qepanchakurusqanraykum.

¹¹Rey Joramqa Judá nacionpi kaq moqokunapipas capillakunatam ruwachirqa, chaykunawanmi Jerusalenpi yachaqkunata chuchumika warmita hinaña huchallirachirqa, hinaspam Tayta Diosmanta karuncharachirqa.

¹²Chayna kachkaptinmi profeta Eliaspa cartan chayaramurqa, chay cartam kaynata nirqa: Ñawpaq taytayki Davidpa yupaychasqan Tayta Diosmi kaynata nin: “Qamqa manam kawsachkanki taytayki Josafatpa chaynataq taytayki Asapa kawsasqanman hinachu,

¹³aswanqa Israelpi reykunapa mana allin kawsasqanman hinam. Acabpa mana allin ruwasqankunata hina ruwaspaykim Judá nacionpi kaqkunatawan Jerusalén llaqtapi kaqkunata huchallirachinki. Wañurachinkitaqmi wawqekikunatapas, paykunaqa qanmantapas aswan allin ruwaqkunam karqaku.

¹⁴Chayraykum hatun ñakariyta Tayta Dios kacharimunqa llaqtaykiman, churikikunaman, warmikikunaman hinaspa tukuy kapuqnikikunaman.

¹⁵Qanmanpas tukuy rikchaq onqoykunatam kacharimunqa. Manaña hampiy atina wiksa nanaywanmi onqonki chunchulnikipas lloqsimunankama”, nispa.

¹⁶Tayta Diosmi filisteokunata, Siria lawpa hichpanpi yachaq Arabia runakunata, rey Jorampa contranpi hatarirachirqa.

¹⁷Chaymi Judá nacionman yaykuruspanku reypa palacionpi tukuy ima kapuqninkunata, churinkunata hinaspa warminkunata apakurqaku, rey Jorampa sullka churin [2]Joacazllañam puchururqa.

¹⁸Tukuy chaykunapa qepantañataqmi manaña hampiy atina wiksa nanayta Joramman Tayta Dios qoykurqa.

¹⁹Iskay wata pasaruptinmi, llumpayta onqosqanrayku chunchulninkuna lloqsiramurqa, hinaptinmi llumpa-llumpayta ñakarispan wañururqa. Wañukuptinpas manam ninallatapas rataykachipurqakuchu ñawpaq taytankunapaq hinaqa.

²⁰Joramqa kimsa chunka iskayniyuq watanpim munaychakuyta qallaykurqa, Jerusalén llaqtapim pusaq wata munaychakurqa, payqa mana pipapas llakipayasqanmi wañukurqa, hinaptinmi “Davidpa Llaqtanwan” sutichasqankupi pamparurqaku, ichaqa manam reykunapa pampakunanpichu.