Read Biblia Revisión Chuya Qellqa 1992 – Chuya Qellqa 1992 2 Crónicas 22 Bible Online

2 Crónicas 22 - Biblia Revisión Chuya Qellqa 1992 – Chuya Qellqa 1992 bible

2 Crónicas 22

¹Jerusalén llaqtapi yachaqkunam Jorampa rantinpi munaychakunanpaq sullka churin [3]Ocoziasta churarurqaku. Jorampa mayor churinkunataqa Arabia runakunawan kuska hamuq salteaqkunam campamentoman yaykuruspanku wañurachirqaku. Chaynapim Judá nacionpiqa rey Jorampa churin Ocoziasña munaychakurqa.

²Ocoziasqa iskay chunka iskayniyuq watanpim munaychakuyta qallaykurqa, huk watallam Jerusalén llaqtapi munaychakurqa. Mamanpa sutinmi karqa Atalía, Ataliaqa karqa rey Omripa willkanmi.

³Rey Ocoziaspas, Acabpa ayllunkunapa mana allinkuna ruwasqanta hinam ruwarqa, mamanpunim mana allinkunata ruwananpaq umacharqa.

⁴Acabpa mirayninkuna hinam mana allinkunata ruwarqa Tayta Diospa qayllanpi. Taytan wañukuptinmi Acabpa mirayninkuna mana allinkunata ruwananpaq consejarqaku.

⁵Chaynapim Ocoziasqa paykunapa umachasqanta ruwaspan, Israelpa reynin Acabpa churin Joramwan hukllawakururqa, Galaad law Ramot llaqtapi Siria nacionpa reynin Hazaelpa contranpi peleananpaq. Chaypi peleachkaptinkum Siria tropakuna Joramta heridaramurqaku.

⁶Chaymi rey Joramqa Siria nacionpa reynin Hazaelwan peleachkaspan Ramot llaqtapi heridachikusqanta hampichikunanpaq Jezreel llaqtaman kutikurqa. Jezreelpi Joram onqochkaptinmi rey Ocozías watukuq rirqa.

⁷Diosmi munarqa rey Joramta watukusqanpi rey Ocozías wañunanta. Chaymi Ocoziasqa chayaruspallan Joramwan kuska Nimsipa churin Jehupa contranpi peleaq lloqsirqa. Jehutam Tayta Dios akllarqa Acabpa ayllunkunata chinkachinanpaq.

⁸Chaymi Jehuqa Acabpa ayllunkunata wañuchichkaspan Judá nacionpi kamachikuqkunatawan rey Ocoziaspa wawqenkunata tarirurqa, paykunaqa rey Ocoziaspa serviqninkunam karqaku. Paykunatam Jehú wañurachirqa.

⁹Chaymantam Ocoziasta maskachimurqa, payqa Samaria llaqtapim pakarayachkarqa. Tariruspanku Jehupa kasqanman pusaramuptinkum wañurachirqa, hinaptinmi pamparurqaku, “kayqa Josafatpa willkanmi, Josafatqa tukuy sonqonwanmi Tayta Diosta maskarqa”, nispanku. Ocozías wañuruptinmi ayllunmantaqa manaña pipas Judá nacionpi munaychakunanpaq karqañachu.

¹⁰Rey Ocoziasta wañurachisqankuta maman Atalía yacharuspanmi, Judá nacionpi reypa mirayninkunata lliwta wañurachirqa.

¹¹Ichaqa rey Jorampa warmi churin Josabam, rey Ocoziaspa churinkunata wañuchichkaptinku Joasta lluptirachispan Atalía mana tarinanpaq, uywaqnin warmitawan puñunan cuartopi pakarurqa. Chaynapim mana wañurachirqakuchu. Josabaqa karqa Ocoziaspa paninmi hinaspa sacerdote Joiadapa warminmi.

¹²Paykunawanmi Joasqa soqta wata Diospa templonpi pakasqa karqa. Ataliañataqmi nacionpi munaychakurqa.