Read Biblia Revisión Chuya Qellqa 1992 – Chuya Qellqa 1992 2 Crónicas 28 Bible Online

2 Crónicas 28 - Biblia Revisión Chuya Qellqa 1992 – Chuya Qellqa 1992 bible

2 Crónicas 28

¹Acazqa iskay chunka watanpim munaychakuyta qallaykurqa. Chunka soqtayuq watam Jerusalén llaqtapi munaychakurqa. Ichaqa manam taytan David hinachu Tayta Diospa qayllanpi allinta ruwarqa.

²Aswanqa Israel nacionpi reykunapa kawsasqanta hinam kawsarqa. Metalkunata fundichispam Baal idolokunata ruwachirqa.

³Ben-hinom wayqopipas inciensota kañaspanmi churinkunatapas sacrificaspa kañarqa, chaynataqa ruwarqa, Israelpa qayllanmanta Tayta Diospa qarqosqan nacionkunapa millakuypaq costumbrenkunata qatipakuspanmi.

⁴Alto moqo capillakunapipas hinaspa hatun sachakunapa sikinpipas sacrificiokunata ofrecespanmi inciensokunata kañarqa.

⁵Chayraykum Siria nacionpa reyninman Tayta Dios qoykurqa. Siria runakunam venceruspanku achka-achkata presocharuspa Damasco llaqtaman aparqaku. Tayta Diosqa qoykurqataqmi Israel nacionpa reyninmanpas, hinaptinmi paypas pasaypaqta vencerurqa.

⁶Ñawpaq taytankupa yupaychasqan Tayta Diosta saqerusqankuraykum, Remaliaspa churin rey Pekapas, huk punchawllapi pachak iskay chunka waranqa allinnin qari-qari soldadokunata Judá nacionpi wañurachirqa.

⁷Efraín ayllumanta kaq allinnin qari-qari Zicripas reypa churin Maasiastam wañurachirqa, wañurachirqataqmi palaciopi mayordomo Azricamtawan reyta kamachikuyninpi yanapaqnin Elcanatapas.

⁸Israel tropakunam Judá ayllunkunata presota hapispanku, iskay pachak waranqa runakunata, qarita, warmita hinaspa warmakunatapas Samaria llaqtaman aparqaku. Tukuy imankutapas qechuspam achka-achkata Samaria llaqtaman aparqaku.

⁹Israel tropakuna Samaria llaqtaman kutichkaptinkum, profeta Obed taripaykuspan paykunata nirqa: Ñawpaq taytaykichikkunapa yupaychasqan Tayta Diosmi Judá nacionpa contranpi piñakuspan makikichikman churaykurqa, ichaqa qamkunam piñakuyllawanña wañurachinkichik, chay ruwasqaykichiktaqa Tayta Diosqa qawachkanmi.

¹⁰Kunanmi Judá runakunapas chaynataq Jerusalén llaqtapi yachaqkunapas esclavoykichik kanankupaq tanteanakurunkichik, ichaqa ¿manachum chaykunata ruwaspa qamkunapas Tayta Diospa contranpi huchallikuchkanchik?

¹¹Chaynaqa, uyariwaspaykichikyá preso pusamusqaykichik wawqekichikkunata kutichiychik, Tayta Diosmi qamkunapaq sinchi piñasqa kachkan, nispa.

¹²Hinaptinmi Efrainpa mirayninkunamanta wakin kamachikuqkuna hatarirqaku chay guerramanta kutimuqkunapa contranpi. Paykunam karqaku Johananpa churin Azarías, Mesilemotpa churin Berequías, Salumpa churin Ezequías hinaspa Adlaipa churin Amasa.

¹³Hinaspankum nirqaku: Chay presokunataqa ama kaymanqa pusaykamuychikchu, Tayta Diospa contranpi huchallikusqaykichikmi ñoqaykupa hawaykupi karunman. Hatu-hatun huchayuq hinaspa huchasapa kachkaptiykupas aswan yapaytaraqmi munachkankichik, Diospa piñakuyninqa nina hinam kachkan Israel nacionpa contranpi, nispanku.

¹⁴Chaymi llapa soldadokunaqa chay kamachikuqkunapa hinaspa huñunasqa runakunapa qayllanpi apamusqanku presokunata kachaykurqaku, churaykurqakutaqmi qechumusqanku kaqkunatapas.

¹⁵Chay kamachikuqkunañataqmi llapa presokunata atiendespanku, mana pachayuq kaqkunatapas qechumusqanku pachawan pachaykachispa usutaykachirqaku, mikuytapas qoykuspam yakutapas tomaykachirqaku, heridayuq kaqkunatapas hampiykuspankum manaña kallpayuqkunatapas asnokunapi sillaykachispanku Jericó llaqtakama otaq “Palmerakunapa kananwan” sutichasqanku llaqtakama aparuspanku ayllunkuman saqeykamurqaku, hinaspam Samaria llaqtaman kutikamurqaku.

¹⁶Chay tiempopim rey Acazqa yanapachikunanpaq Asiria nacionpa reyninman runankunata kacharqa.

¹⁷Chaynataqa ruwarqa Edom runakuna kaqmanta hamuruspanku Judá nacionpi kaqkunata atacaruspa achkaqta presocharuspa aparusqankuraykum.

¹⁸Chaynataqmi filisteokunapas Sefela lawpi llaqtakunatawan Judá nacionpi Neguev lawpi llaqtakunatapas saquearqaku. Bet-semes, Ajalón, Gederot, Soco, Timna hinaspa Gimzo llaqtakunatapas llaqtachakunatawan kuskatam hapikuykurqaku, hinaspam paykunaña yachakurqaku.

¹⁹Tayta Diosmi Judá nacionta penqayman churarqa reynin Acazpa huchanmanta, paymi Tayta Diospa contranpi llumpayta huchallikururqa, Judá runakunatapas payraqmi Tayta Diospa contranpi huchallichirqa.

²⁰Asiria nacionpa reynin Tiglat-pileserpas hamuruspanmi mana yanapaspan aswanqa rey Acaztaraq atacarqa.

²¹Hinaptinmi rey Acazqa Tayta Diospa templonmantawan kikinpa palacionmanta hinaspa kamachikuqkunapa wasinmantapas valorniyuq kaqkunata hurqomuspan, Asiria nacionpa reyninman qorqa, chaywanpas manam yanaparqachu.

²²Rey Acazqa chay ñakariypi kachkaspanpas aswanraqmi Tayta Diospa contranpi huchallikurqa.

²³Guerrapi venceqnin Damasco llaqtapa idolonkunaman sacrificiokunata ofrecespanmi kaynata nirqa: Siria nacionpa diosninkunaqa chay nacionpa reyninkunatam yanapan, chaynaqa ñoqapas sacrificiotayá ofrecesaq yanapawananpaq, nispa. Ichaqa chaykuna ruwasqanraykum wichirurqa, wichirqataqmi Israel runakunapas.

²⁴Rey Acazqa Diospa templonpi kaq serviciokunatapas hurqoruspanmi pakiparurqa, Tayta Diospa templonpa punkuntapas wichqarurqa hinaspam Jerusalén callekunapa esquinankunapipas altarkunata ruwarurqa.

²⁵Judá nacionpi kaq llaqtakunapa orqonkunapipas capillakunatam ruwachirqa, idolonkunaman inciensota kañananpaq; chay ruwasqanwanmi ñawpaq taytankunapa yupaychasqan Tayta Diosta piñachirqa.

²⁶Rey Acazpa imaynam kawsasqanwan imakunam ruwasqanpas, qallariyninmanta tukupayninkamam, Israel nacionpi reykunapa hinaspa Judá nacionpi reykunapa vidanmanta willakuq libropi qellqasqa kachkan.

²⁷Rey Acaz wañuruptinmi Jerusalén llaqtapi pamparurqaku, ichaqa manam Israelpi reykunapa pampakunan sepulturapichu. Paypa rantinpim churin Ezequiasña munaychakurqa.