Read Biblia Revisión Chuya Qellqa 1992 – Chuya Qellqa 1992 2 Crónicas 35 Bible Online

2 Crónicas 35 - Biblia Revisión Chuya Qellqa 1992 – Chuya Qellqa 1992 bible

2 Crónicas 35

¹Rey Josiasmi Tayta Diospa Pascua fiestanta Jerusalén llaqtapi ruwachirqa; punta kaq killapa chunka tawayuq punchawninpim Pascua carnerota nakachirqa.

²Sacerdotekunatapas imam ruwanankupi churaspanmi Tayta Diospa templonpi llamkanankupaq kallpancharqa.

³Israel runakunata yachachiq levitakunatapas otaq Tayta Diospaq sapaqchasqa kaqkunatapas kaynatam nirqa: Tayta Diospa Arcanta Israelpa reynin Davidpa churin Salomonpa ruwachisqan temploman churamuychik, chaynapi amaña hombronaykichikpaq. Kunanqa Tayta Diostawan Israel llaqtantañayá serviychik.

⁴Taytaykichikkunapa mirayninman hinayá ruwanaykichikpaq alistakuychik, chaynapi Israelpa reynin Davidpa chaynataq churin Salomonpa kamachikusqanman hina muyuyninpi llamkanaykichikpaq.

⁵Israelpa mirayninkunaman hinayá, levitakunamanta ayllun-ayllun rakinakusqaykichikman hina, wakiqnikichik santuariopi kaychik.

⁶Pascua carnerotayá wañuchiychik, hinaspayá chuyanchakuspa Israel aylluykichikkunapaqpas alistaychik, chaynapi Moisesnintakama Tayta Diospa kamachisqanman hina ruwanankupaq, nispa.

⁷Rey Josiasmi kikinpa animalninkunamanta qorqa, chaypi tarikuq runakunaman Pascua fiestata ruwanankupaq: Carnerokunata chivatokunata llapanta kimsa chunka waranqata chaynataq kimsa waranqa torokunatapas.

⁸Munaychakuyninpi reyta yanapaqkunapas kikillankumantam runakunaman, sacerdotekunaman hinaspa levitakunaman qorqaku. Diospa templonta nanachikuq Hilciaswan, Zacarías hinaspa Jehielpas, iskay waranqa soqta pachaknin carnerokunatawan kimsa pachak torokunatam sacerdotekunaman Pascua fiestata ruwanankupaq qorqaku.

⁹Conaniaswan wawqen Semaías, Natanael, Hasabías, Jehiel hinaspa Josabadpas llapa levitakunamanmi qorqaku pichqa waranqa ovejakunatawan pichqa pachak torokunata Pascua fiestata ruwanankupaq. Paykunaqa levitakunapa kamachiqninkunam karqaku.

¹⁰Fiestapaq lliw alistasqa karuptinmi, llapa sacerdotekuna maymi kanankupi churakuykurqaku, llapa levitakunapas ruwanankupaqmi muyuyninpi churakuykurqaku; chaynataqa ruwarqaku reypa kamachisqanman hinam.

¹¹Chaynatam Pascua fiestapaq animalkunata wañuchirqaku; llapa levitakuna nakaspanku yawarta haywaptinkum sacerdotekunañataq altarman challarqaku.

¹²Chaymantam lliw kañanapaq animalkunata hapiykuspanku, sapa llaqtapi runakunaman ayllunkuman hina rakinarqaku, Moisespa kamachisqanman hina Tayta Diosman ofrecenankupaq; llapa torokunawanpas chaynallatam ruwarqaku.

¹³Hinaspam Pascua fiestata ruwanankupaq llapa animalkunapa aychanta kankarqaku, chaytaqa ruwarqaku kamachikuyman hinam. Diospaq sapaqchasqa kaqkunatam ichaqa mankakunapi, perolkunapi hinaspa sartenkunapi yanurqaku, hinaspankum llapallan runakunaman utqayman aypurqaku.

¹⁴Chaymantam llapa levitakunaqa kikinkupaqwan llapa sacerdotekunapaqpas mikunankuta ruwarqaku; chaynataqa ruwarqaku Aaronpa mirayninmanta kaq sacerdotekuna tutaykuqkama lliw kañana sacrificiokunatawan wirakunata kañaypi mana haypakusqankuraykum.

¹⁵Asafpa mirayninmanta kaq takiqkunapas, Davidpa, Asafpa, Hemanpa hinaspa reypa tapukunan profeta Jedutunpa kamachisqanman hinam maymi kanankupi sayarqaku; punkukuna nanachikuqkunapas maymi nanachikusqanku punkupim sayarqaku. Paykunaqa manam chaymanta kuyurirqakuchu, ayllunkumanta kaq levitakuna mikunankuta ruwamusqankurayku.

¹⁶Chaynatam alistakurqaku chay punchawpi Tayta Diospaq Pascua fiestata ruwanankupaq chaynataq Tayta Diospa altarninpi lliw kañana sacrificiokunata ofrecenankupaqpas; chaynataqa ruwarqaku rey Josiaspa kamachikusqanman hinam.

¹⁷Chaypi kaq Israelpa mirayninkunam chay punchawpi Pascua fiestata ruwarqaku, mana levadurayuq tanta fiestatapas qanchis punchawnintinmi ruwarqaku.

¹⁸Israel nacionpiqa, profeta Samuelpa tiemponmantaraqmi mana kayna Pascua fiestataqa ruwarqakuchu. Manataqmi Israel nacionpa mayqan reyninpas kayna pascua fiestataqa ruwarqachu rey Josiaswan sacerdotekuna, levitakuna, Israel runakuna, Judá runakuna hinaspa Jerusalén llaqtapi yachaqkunapa ruwasqanta hinaqa.

¹⁹Chay Pascua fiestataqa ruwarqaku chunka pusaqniyuq wataña rey Josías munaychakuchkaptinmi.

²⁰Tayta Diospa templonta rey Josías allichachiyta tukurusqanpa qepantam, Egipto nacionpa reynin Necao, Eufrates mayupa hichpanpi kaq Carquemis llaqtapi guerra ruwaq hamurqa. Josiasñataqmi paypa contranpi lloqsirqa.

²¹Hinaptinmi rey Necaoqa runankunawan kaynata nichimurqa: Judá nacionpa reynin ¿imanachkaykitaq qamtaqa? Ñoqaqa manam qampa contraykipichu hamuni, aswanqa guerrata ruwaqniy nacionpa contranpim, Diostaqmi kamachiwan utqayman rinaypaq; chaynaqa amayá yanapaqniy Diospa contranpiqa hatariychu, yanqañataq chinkarachisunkiman, nispan.

²²Rey Josiasmi ichaqa Necaonintakama Tayta Diospa nisqanta mana kasukuspan pantachikunanpaq huk pachawan churakururqa, hinaspanmi rey Necaowan peleananpaq Meguido qechwaman pasarqa.

²³Hinaptinmi flechawan peleaqkuna rey Josiasta flecharurqaku, chaymi serviqninkunata nirqa: ¡Hurqowaychik kaymanta llumpay heridasqam kachkani! nispa.

²⁴Chaymi serviqninkunaqa carretamanta hurqoruspanku huk carretanman hinaykuspanku Jerusalén llaqtaman aparuptinku chaypiña wañukurqa. Hinaptinmi ñawpaq taytankunapa sepulturanpi pamparurqaku. Chaymi Judá nacionpi chaynataq Jerusalén llaqtapi yachaqkuna paymanta llumpayta waqarqaku.

²⁵Rey Josiasta yuyarinapaqmi profeta Jeremías huk aya takita qellqarqa, chay takitam llapallan takiqkuna qaripas warmipas Josiasta yuyarispanku kunankama takinku. Chay takikunam Israel nacionpi costumbre hinaña karqa. Chay aya takiqa Lamentaciones libropim qellqasqa kachkan.

²⁶Rey Josiaspa imaynam kawsasqanwan Tayta Diospa kamachikuyninman hina imakunam ruwasqanpas,

²⁷qallariyninmanta tukupayninkamam Israelpi reykunamanta chaynataq Judá nacionpi reykunamanta willakuq libropi qellqasqa kachkan.