Read Biblia Revisión Chuya Qellqa 1992 – Chuya Qellqa 1992 2 Crónicas 36 Bible Online

2 Crónicas 36 - Biblia Revisión Chuya Qellqa 1992 – Chuya Qellqa 1992 bible

2 Crónicas 36

¹Jerusalenpi munaychakunanpaqmi llapa runakuna rey Josiaspa rantinpi churin Joacaztaña churarurqaku.

²Rey Joacazqa iskay chunka kimsayuq watanpim munaychakuyta qallaykurqa. Kimsa killallam Jerusalenpi munaychakurqa.

³Ichaqa Egipto nacionpa reyninmi Jerusalén llaqtapi rey kayninmanta qarqoruspan Judá nacionwan impuestota pagachikurqa kimsa waranqa kimsa pachaknin kilo qollqetawan kimsa chunka kimsayuq kilo qorita.

⁴Chaywanpas Egipto nacionpa reyninqa Judá nacionpa chaynataq Jerusalenpa reynin kananpaqmi Joacazpa wawqen Eliaquimta churarqa. Rey Eliaquimpa sutintam Joacinman tikrarurqa. Rey Necaoqa Joacimpa wawqen Joacaztapas Egipto nacionmanmi aparqa.

⁵Rey Joacimqa iskay chunka pichqayuq watanpim munaychakuyta qallaykurqa, chunka hukniyuq watam Jerusalén llaqtapi munaychakurqa. Payqa Tayta Diospa qayllanpim mana allinkunata ruwarqa.

⁶Chaymi Babilonia nacionpa reynin Nabucodonosor paypa contranpi hamuruspan Babilonia llaqtaman bronce cadenakunawan watasqata aparqa.

⁷Tayta Diospa templonpi serviciokunatapas aparuspanmi Babilonia llaqtapa templonman churarurqa.

⁸Rey Joacimpa imakunam ruwasqanwan, millakuypaq kaqkuna ruwasqan hinaspa imakunam pasasqanpas Judá nacionpi hinaspa Israel nacionpi reykunamanta willakuq libropim qellqasqa kachkan. Paypa rantinpim churin Joaquinña munaychakurqa.

⁹Rey Joaquinqa chunka pusaqniyuq watanpim munaychakuyta qallaykurqa. Payqa kimsa killa chunka punchawllanmi Jerusalenpi munaychakurqa. Hinaspanmi Tayta Diospa qayllanpi tukuy mana allinkunata ruwarqa.

¹⁰ Musoq wata chayaramuptinmi rey Joaquinta Babilonia llaqtaman rey Nabucodonosor presota apachirqa, paywan kuskatam apachirqa Tayta Diospa templonpi qorimanta qollqemanta serviciokunatapas; paypa rantinpim wawqen Sedequiastaña Judá nacionpi hinaspa Jerusalenpi munaychakunanpaq churarurqa.

¹¹Rey Sedequiasqa iskay chunka hukniyuq watanpim munaychakuyta qallaykurqa. Chunka hukniyuq watam Jerusalenpi munaychakurqa.

¹²Rey Sedequiasqa Tayta Diospa qayllanpim mana allinkunata ruwarqa, Tayta Diospa nisqanta profeta Jeremías rimapayachkaptinpas payqa manam uchuychakurqachu.

¹³Rey Nabucodonosormi Sedequiasta Diospa sutinpi jurachirqa payta kasunanpaq, ichaqa Sedequiasmi paypa contranpi hatarirurqa. Sonqonta rumiyarachispanmi Israelpa yupaychasqan Tayta Diosmanpas mana kutirikurqachu.

¹⁴Judapi kamachikuqkunawan llapa sacerdotekunapa kamachiqninkuna hinaspa llapa runakunapas huchamanmi qokururqaku. Wakin llaqtakunata qatipakuspankum Jerusalenpi Tayta Diospa chuyanchasqan templontapas pasaypaqta qachacharurqaku.

¹⁵Chaymi ñawpaq taytankupa yupaychasqan Tayta Diosqa sapa kutilla paymanta willakuqkunata kacharqa, chaynataqa ruwarqa runankunatawan yachanan templota llakipayasqanraykum.

¹⁶Paykunam ichaqa Diospa kachasqan runakunamanta asikurqaku, profetakunapa willakusqankutapas mana uyariq tukuspankum burlakurqaku. Chayraykum runankunapa contranpi Tayta Dios piñakururqa manaña ima ruwaytapas atinankukama.

¹⁷Paykunapa contranpim Caldea nacionpa reyninta Tayta Dios kachamurqa, hinaptinmi jovenkunata espadawan templo ukupi wañurachirqa, sipaskunatawan yuyaqkunata hinaspa eqoyasqakunatapas manam llakipayarqachu. Llapallankutam paypa makinman Tayta Dios churaykurqa.

¹⁸Tayta Diospa templonpi kaq serviciokunatapas hatunta taksatam lliwta apakurqa; Tayta Diospa templonpi qori-qollqetawan reypa palacionpi chaynataq kamachikuqkunapa wasinpi qori-qollqetapas llapallantam Babiloniaman apakurqa.

¹⁹Tayta Diospa templontapas kañaykuspankum Jerusalén llaqtapa murallantapas taqmarurqaku. Llaqtapa palacionkunatapas kañaykuspankum llapa valorniyuq kaqkunatapas ñutuparurqaku.

²⁰Wañuymanta puchuqkunatañataqmi Babilonia nacionman presota aparqaku, hinaptinmi reypa chaynataq churinkunapa esclavonkunaña karqaku; chaynaqa karqaku Babilonia nacionpi Persia nación munaychakuyta qallarinankamam.

²¹Chaynapim Jeremiasnintakama Tayta Diospa rimarisqan cumplikurqa. Preso apasqa kasqankukamam allpapas samarqa, qanchis chunka wata cumplikunankamam purmarqa.

²²Profeta Jeremiasnintakama Tayta Diospa nisqan cumplikunanpaqmi, Persia nacionpi rey Ciropa munaychakusqan punta kaq watapi, rey Ciropa sonqonman kay munakuyta Tayta Dios churarqa, lliw munaychakuyninpi runakunaman kay decretota simiwan hinaspa cartakunawan kaynata nimunankupaq:

²³Persiapa reynin Cirom kaynata nin: Hanaq pachapi Tayta Diosmi kay pachapi nacionkunata qowarqa, hinaspam Judá nacionpi kaq Jerusalén llaqtapi templota hatarichipunaypaq kamachiwarqa. Chaynaqa, qamkuna ukupi pipas Tayta Diospa llaqtan kaspaqa kutikuchun, Tayta Diosmi paywan kanqa, nispa.