Read Biblia Revisión Chuya Qellqa 1992 – Chuya Qellqa 1992 2 Crónicas 5 Bible Online

2 Crónicas 5 - Biblia Revisión Chuya Qellqa 1992 – Chuya Qellqa 1992 bible

2 Crónicas 5

¹Chaynatam rey Salomonqa, Tayta Diospa templonpaq obrakuna ruwachisqanta tukurachirqa, hinaspam taytan Davidpa sapaqchasqan qori-qollqetawan llapa serviciokunata Diospa templonpi kaq tukuy ima waqaychana cuartoman churarqa.

²Salomonmi Jerusalén llaqtapi huñurachirqa Israelpa ancianokunata, sapa ayllupi kamachikuqkunata hinaspa ayllukunapi ancha reqsisqa runakunatapas, “Davidpa Llaqtanwan” sutichasqanku Sión llaqtamanta Tayta Diospa pacto ruwasqan Arcata apamunankupaq.

³Qanchis kaq killa fiestapim Israelpi runakuna rey Salomonwan huñunakurqaku.

⁴Maypacham Israelpa ancianonkuna chayaramuptinkum, Arcata llapa levitakuna aparqaku.

⁵Aparqakutaqmi Diosman asuykuna carpatawan Diospaq sapaqchasqa serviciokunatapas, chaykunataqa sacerdotekunawan levitakunam aparqaku.

⁶Rey Salomonwan Israelpa llapallan mirayninkunañataqmi Arcapa ñawpaqninpi huñunakuruspanku, manaña yupay atina ovejakunatawan torokunata Tayta Diosman ofrecerqaku.

⁷Llapa sacerdotekunam Tayta Diospa pacto ruwasqan Arcata templopa ukun lawninpi kaq “chuyay-chuyay” sutiyuq cuartoman churaykurqaku, querubinkunapa rapranpa ukunman.

⁸Chay querubinkunapa rapranmi Arcapa hawanman kicharisqa karqa, hinaspam Arcatawan hombronanku varillakunata taparqa.

⁹Ichaqa Arcata hombronanku varillakunam hatun kasqanrayku “chuya” sutiyuq cuartomanta rikukurqa, templopa hawa lawninmantam ichaqa mana rikukurqachu, chaynam kachkan kunankamapas.

¹⁰Arcapa ukunpiqa manam imapas hukqa karqachu, aswanqa Horeb orqopi Moisespa churasqan iskay tabla rumikunallam. Chay tabla rumikunapim Egiptomanta lloqsiramuptinku Israelpa mirayninkunawan Tayta Diospa pacto ruwasqan qellqasqa karqa.

¹¹Sacerdotekunam Diospa templonmanta lloqsiramurqaku. Paykunaqa llapallankum chuyanchasqaña karqaku, ichaqa turnonpi llamkayninkutam saqerurqaku.

¹²Llapallan takiq levitakunam karqaku: Asaf, Hemán, Jedutún, sapakama churinkupiwan hinaspa ayllunkuwan kuska fino linowan pachasqakama platillokunata, cimbalokunata hinaspa arpakunata tocaspanku Arcapa waqtan intipa qespimunan lawninpi sayarqaku. Paykunawantaqmi pachak iskay chunka sacerdotekunapas trompetakunata tocarqaku.

¹³Trompetakunata tocaspankum llapallanku huklla takispanku Tayta Diosta hatunchaspa graciasta qorqaku. Trompetakunata, platillokunata hinaspa huk rikchaq tocanakunata tocaspankum kaynata takirqaku: “Kuyakuq kasqanraykuyá Tayta Diosta yupaychaychik, kuyakuyninqa wiña-wiñaypaqmi”, nispanku. Hinaptinmi Tayta Diospa templonman puyu huntaykurqa.

¹⁴Puyu huntarusqanraykum llapa sacerdotekunapas imam ruwanankutapas mana ruwayta atirqakuchu, temploman Tayta Diospa kanchariynin huntarusqanrayku.