Read Biblia Revisión Chuya Qellqa 1992 – Chuya Qellqa 1992 2 Crónicas 6 Bible Online

2 Crónicas 6 - Biblia Revisión Chuya Qellqa 1992 – Chuya Qellqa 1992 bible

2 Crónicas 6

¹Hinaptinmi Salomón nirqa: Dios Taytalláy, qanmi nirqanki tutayay ukupim yachani nispa.

²Ichaqa yachanayki templotam ruwarapuyki, chaypi wiñaypaq yachanaykipaq, nispa.

³Chaymantam rey Salomonqa, Israelpa mirayninkuna huñunasqa sayachkaptinku, paykuna lawman muyuriykuspan kaynata bendeciykurqa:

⁴Israelpa yupaychasqan Tayta Diosninyá bendecisqa kachun, payqa taytay Davidman prometekuspan kayna nisqantam cumplirun:

⁵“Israelpa mirayninkunata Egipto nacionmanta hurqomusqay punchawmantapunim, Israel ayllukunapa mayqan llaqtantapas mana akllarqanichu chaypi wasiyta ruwaptinku sutiy hatunchasqa kananpaqqa, Israel llaqtaypi munaychakunanpaqpas manataqmi pitapas akllarqanichu.

⁶Ichaqa Jerusalén llaqtatam akllarqani chaypi sutiy reqsisqa kananpaq, Davidtañataqmi akllarqani Israel llaqtaypi munaychakunanpaq”, nispa.

⁷Taytay Davidmi tukuy sonqonwan munarqa Israelpa yupaychasqan Tayta Diospaq huk templo ruwayta.

⁸Ichaqa Tayta Diosmi taytay Davidta nirqa: “Temploy ruwayta sonqoykipi munasqaykiqa allinmi,

⁹ichaqa manam qamchu temploytaqa ruwapuwanki, aswanqa churikim chay templotaqa ruwapuwanqa”, nispa.

¹⁰Tayta Diosmi chay prometekusqanta cumplirun. Nisqanpi hinam taytay Davidpa rantinpi Israel nacionpi munaychakuchkani, hinaspaymi Israelpa yupaychasqan Tayta Diospa templontapas ruwarachini.

¹¹Chaypim Israel llaqtawan Tayta Diospa pacto ruwasqan Arcata churaruni, nispa.

¹²Chaymantam rey Salomonqa, Tayta Diospa altarninpa ñawpaqninpi sayaykuspan, lliw Israel runakunapa qayllanpi makinkunata hoqarirqa.

¹³Salomonmi broncemanta altarta ruwachirqa, iskay metro cuarton largoyuqta, iskay metro cuarton anchoyuqta, huk metro kimsa chunka pichqayuq centímetro altoyuqta, hinaspam patiopa chawpinman churarqa. Chay altarman seqaruspanmi, huñunasqa Israel casta runakunapa qayllanpi qonqorakuykuspan makinkunata altoman hoqarispan nirqa:

¹⁴Israelpa yupaychasqan Dios Taytalláy, qam hina Diosqa manam kanchu hanaq pachapipas nitaq kay pachapipas, qamqa pacto ruwasqaykita cumpliqmi kanki, tukuy sonqonkuwan kasukuspa serviqnikikunatam kuyanki.

¹⁵Serviqniki taytay Davidman prometesqaykitam cumplirunki, rimasqaykita ruwayman churaspam cumplirunki.

¹⁶Chaynaqa, Israelpa yupaychasqan Dios Taytalláy, kunanyá serviqniki taytay Davidman prometesqaykita cumpliy, qanmi nirqanki: Ñoqapa ñawpaqniypiqa mana tukuytam qampa miraynikimanta Israel nacionpi munaychakunqa, ichaqa churikikunayá qampa kawsasqaykiman hina, kamachikuyniykunata kasukuspa kawsachunku, nispa.

¹⁷Israelpa yupaychasqan Dios Taytalláy, kunanyá serviqniki taytay Davidman nisqayki cumplikuchun.

¹⁸Ichaqa Dios Taytalláy, ¿yaqachu kay pachapi runakunawan yachawaq? Cielokunapas manam kamasunkichu, ¿imaynataq kay wasi ruwasqaypiqa yachawaq?

¹⁹Ichaqa Dios Taytalláy, kay mañakuyniytayá uyariykullaway, ñawpaqnikipi qayakusqaytayá uyariykullaway.

²⁰Tuta punchawyá kay temploykita qawarimuy, qanmi nirqanki: “Chaypim sutiy reqsisqa kanqa”, nispayki. Chaynaqa kay serviqnikipa kaymanta mañakamusqantayá uyariykullaway.

²¹Mañakuykim kay serviqnikiwan Israel runaykikuna kaymanta mañakamuptiyku uyariykullawanaykikupaq, mañakuykim maymi yachasqaykimanta uyariykamuspa pampachaykuwanaykikupaq.

²²Sichum pipas runamasinpa contranpi huchallikuruptin chay runata kay templopi altarnikipa ñawpaqninpi jurachiptinkuqa,

²³qanmi hanaq pachamanta uyariykamuspa serviqnikikunata juzganki, mana allin ruwaqtapas castigaspaykim mana allin ruwasqanman hina pagapunki, allin ruwaq runamanmi ichaqa allin ruwayninman hina pagapunki.

²⁴Contraykipi huchallikusqanrayku Israel llaqtaykita enemigonkuna venceruptin qanman kutirikamuspa sutikita yupaychaspa kay temploykimanta qayakamusuptikiqa,

²⁵qanmi hanaq pachamanta uyariykamuspa Israel llaqtaykipa huchanta pampachaykunki, hinaspam paykunamanwan taytankuman qosqayki allpaman kutichimunki.

²⁶Sichum llaqtayki contraykipi huchallikurusqanrayku, mana para kanqachu hinaptin huchankumanta ñakarichiptiki, huchankumanta wanakuspa kay temploykimanta qayakamusuptikiqa,

²⁷qanmi hanaq pachamanta uyariykamunki hinaspam Israel llaqtaykipa huchankunata pampachaykunki, munasqaykiman hina kawsayta yachachispaykim runaykikunaman herencia qosqayki allpaman paraykita kacharimunki.

²⁸Sichum kay nacionpi yarqayña, peste onqoyña karuptinpas, kawsaykuna rupaywan chakiptinpas, atupa onqoywan ismuptinpas, aqaruwaywan piki-piki tukuptinpas, nacionniykuta enemigo muyuruptinpas, onqoykunawan sasachakuykunaña hamuptinpas,

²⁹Israelpa mirayninkunamanta pipas ñakariyninpi huchanta reqsikuspa kay temployki lawman makinta hoqarispa qayakamusuptikiqa,

³⁰hanaq pacha yachasqaykimanta uyariykamuspam, pampachaykuspayki imam ruwasqankuman hina qoykapunki, qamllam llapa runakunapa sonqontaqa reqsinki.

³¹Chaynapim paykunaqa manchakusunki ñawpaq taytankuman qosqayki allpapi kawsananku punchawkama.

³²Sichum huklaw llaqtayuqkunapas, mana Israelpa miraynin kachkaspanku, sutikirayku hinapas atiynikirayku karu llaqtakunamantaraq hamuspanku makinkuta hoqarispa kay temploykipi mañakamusuptikiqa,

³³hanaq pacha yachasqaykimantam uyariykamunki, hinaspam mañakusqanta ruwaykunki, hinaptin kay pachapi llaqtakuna reqsisuspayki Israel llaqtayki hina hatunchasunaykipaq, chaynapim yachanqaku kay ruwapusqay templopi sutiki hatunchasqa kasqanta.

³⁴Sichum llaqtaykita kamachiptiki enemigonkuwan peleaq rispanku maymantapas kay akllakusqayki llaqta lawman qawamuspanku, chaynataq kay ruwapusqay templo lawman qawamuspanku qayakamusuptikiqa,

³⁵qanmi mañakuyninkuta hanaq pachamanta uyarimunki, hinaspam enemigonkuta vencenankupaq yanapaykunki.

³⁶Dios Taytalláy, lliwpas huchallikuqmi kallaniku. Sichum contraykipi huchallikurusqankurayku paykunapaq piñakuruspayki enemigonkunaman qoykuptiki, karumanpas otaq hichpamanpas preso apasqa kaspanku,

³⁷chay preso kasqanku allpamanta huchankuta reqsikuspanku, qanman kutirikamuspanku kaynata qayakamusunkiman: “Huchallikurunikum, mana allintam contraykipi ruwaruniku” nispanku.

³⁸Chaynataq, preso kasqanku allpapi qanman kutirikamuspanku, tukuy sonqonkuwan, tukuy vidankuwan, ñawpaq taytankuman qosqayki allpa lawman qawamuspanku, kay akllakusqayki llaqta lawman qawamuspanku, kay ruwachisqay templo lawman qawamuspanku mañakamusuptikiqa,

³⁹mañakamusqankutawan ruegakamusqankutayá hanaq pacha yachanaykimanta uyariykamuy, hinaspayá allin arreglota paykunapaq ruwaykuy contraykipi huchallikusqankutapas pampachaykuyá.

⁴⁰Chaynaqa, Dios Taytalláy, kaymanta mañakamusqaykutamá uyariykamullawankiku.

⁴¹Dios Taytalláy, atiyniyuq Arcaykiwan hatariy, kay samanayki sitioman hamuy; Dios Taytalláy, sacerdotekikunayá salvacionnikiwan pachallikuchunku, qanman hapipakuqkunayá kuyakuynikipi kusikuchunku.

⁴²Dios Taytalláy, akllakusqayki reytaqa amayá qepanchaychu, Serviqniki Davidpaq kuyapayakuynikitayá yuyariy.