Read Biblia Revisión Chuya Qellqa 1992 – Chuya Qellqa 1992 Esdras 4 Bible Online

Esdras 4 - Biblia Revisión Chuya Qellqa 1992 – Chuya Qellqa 1992 bible

Esdras 4

¹Babiloniaman apasqa kasqankumanta kutimuqkuna, Israelpa yupaychasqan Tayta Diospa templon ruway qallaykusqankuta, Judapa chaynataq Benjaminpa enemigonkuna yacharuspankum,

²Zorobabelman, Josueyman hinaspa ayllukunapi kamachikuqkunaman rispanku kaynata nirqaku: Kuskanchikyá llamkasunchik, ñoqaykupas qamkuna hinam Diosnikichikta maskaniku, Asiria nacionpa reynin Esar-hadonpa kayman pusamuwasqanku punchawmantaraqmi lliw kañana sacrificiotapas payman ofreceniku, nispanku.

³Chaymi Zorobabelwan Josué hinaspa Israel ayllukunapi kamachikuqkuna nirqaku: Qamkunawanqa manam hukllawakuymankuchu Diosniykupa templon hatarichinaykupaqqa. Israelpa yupaychasqan Tayta Diospa templontaqa ñoqallaykum hatarichisaqku, imaynam Persia nacionpa reynin Ciropa kamachimuwasqankuman hina, nispanku.

⁴Chaynata niruptinkum, chaylawpi llaqtayuqkunaqa tukuy imaymanata nispanku manchachirqaku, chaynapi Judá runakuna manaña llamkanankupaq.

⁵Reypa wakin consejaqninkunamanpas pagarurqakutaqmi chaynapi llamkanankuta harkakunankupaq. Chaykunam pasakurqa Persia nacionpa reynin Ciropa munaychakuyninmanta Persia nacionpa reynin Dariopa munaychakusqan tiempokama.

⁶Rey Asuero munaychakuyta qallaykuptinmi cartata apachirqaku Judá nacionpi chaynataq Jerusalenpi yachaqkunapa contranpi yanqakunamanta cargochaspanku.

⁷Rey Artajerjespa tiemponpipas Bislamwan Mitrídates, Tabeel hinaspa paykunawan kaqkunam Persia nacionpa reynin Artajerjesman qellqarqaku. Chay cartaqa Arameo rimaypim qellqasqa karqa hinaspa persakunapa rimayninman tikrasqa.

⁸Kamachikuq Rehumwan secretario Simsaimi Jerusalén llaqtapa contranpi huk cartata rey Artajerjesman qellqarqaku.

⁹Kay cartatam qellqamurqaku kamachikuq Rehum, secretario Simsai, paykunawan kaq juezkuna, gobernadorkuna, capitankuna hinaspa Erec lawpi, Babiloniapi, Elam lawpi otaq Susa lawpi kamachiqkuna,

¹⁰chaynataq hatun munayniyuq Asnaparpa Samariaman astachisqan llaqtakunawan Eufrates mayupa waklawninpi kaq llaqtakuna.

¹¹Kaymi chay carta apachisqankupa copian: “Reynillayku Artajerjes, Eufrates mayupa kaylawninpi kaq serviqnikikunam rimaykamuykiku.

¹²Reynillayku, kaytam willamuykiku: Babilonia nacionmanta ñoqaykupa kasqaykuman kutichimusqayki judiokunam Jerusalenman chayaramuspanku kay mana allin hinaspa mana kasukuq llaqtata kaqmanta hatarichichkanku. Cimientonkunata churaruspankum murallankunatapas hatarichichkanku.

¹³Reynillayku yachaytaqyá, sichum chay llaqtata kaqmanta hatarichispanku murallankunatapas ruwaruspankuqa, manam ni ima impuesto churasqaykitapas paganqakuchu, chaynapim munaychakuynikipi qori-qollqepas menosyarunqa.

¹⁴Ñoqaykuqa qampa serviqnikikunam kaniku, manam allinpaqchu rikchakapuwanku mana kaqpaq hina hapisqa kaynikiqa. Reynillayku, chayraykum yachanaykipaq qellqamuykiku,

¹⁵chaynapi ñawpaq taytaykikunamanta rimaq librokunapi maskachinaykipaq, chay librokunapim tarinki kay runakunaqa mana kasukuq llaqta kasqanta, reykunatapas chaynataq wakin llaqtakunapas sasachakuyman churaq kasqanta; paykunaqa ñawpaq tiempomantaraqmi hoqarikuq runakuna karqaku, chayraykum kay llaqtaqa purmachisqa karqa.

¹⁶Reynillayku, sichum kay llaqtata musoqmanta hatarichispa murallankunatapas ruwaruptinkuqa, Eufrates mayupa intipa seqaykunan lawninpi llaqtakunatapas manam qampañachu kanqa”, nispanku.

¹⁷Hinaptinmi rey Artajerjes kaynata cartarqa: Kamachikuq Rehum, secretario Simsai, Samaria lawpi yachaqkuna hinaspa Eufrates mayupa waklawninpi kaqkuna, qamkunatam rimaykamuykichik.

¹⁸Apachimusqaykichik cartam qayllaypi leespa rimayniykuman tikrasqa karqa.

¹⁹Kamachisqayman hinam librokunapi maskaspanku tarirunku chay llaqtaqa ñawpaqmantaraq reykunapa contranpi hoqarikuq kasqanta hinaspa ñataq-ñataq hoqarikuyllapi kasqankuta.

²⁰Jerusalén llaqtapiqa atiyniyuq reykunam kasqa, paykunam munaychakusqaku Eufrates mayupa tukuy waklawninkamaraq, hinaptinmi paykunaman tukuy rikchaq impuestokunata pagasqaku.

²¹Chaynaqa, kunanyá paykunata kamachiychik chay llaqtata musoqmanta ama hatarichinankupaq; ñoqa kamachimuptiyñam musoqmanta hatarichisqa kanqa.

²²Ama qonqaspam kay kamachimusqaytaqa cumplinkichik, chaynapi munaychakuyniy ama sasachakuypi kananpaq, nispa.

²³Rey Artajerjespa carta apachimusqanta Rehumpa, secretarion Simsaipa hinaspa paykunawan kaqkunapa qayllanpi leeruptinkum, Jerusalenman utqayllamanña kallpaspanku llapa judiokunata amaña llamkanankupaq sinchi piñakuywan harkakururqaku.

²⁴Chaynapim Jerusalén llaqtapi Tayta Diospa templon hatarichiyninku sayarurqa, Persia nacionpi rey Dariopa iskay wata munaychakuyninkama.