Read Biblia Revisión Chuya Qellqa 1992 – Chuya Qellqa 1992 Esdras 5 Bible Online

Esdras 5 - Biblia Revisión Chuya Qellqa 1992 – Chuya Qellqa 1992 bible

Esdras 5

¹ Profeta Hageowan Iddopa churin profeta Zacariasmi, Judá nacionpiwan Jerusalén llaqtapi yachaq judiokunaman, Israelpa yupaychasqan paykunawan kaq Tayta Diospa sutinpi willarqaku.

²Chaymi Salatielpa churin Zorobabelwan Josadacpa churin Josué, kaqllamanta Jerusalenpi Tayta Diospa templon ruwayta qallaykurqaku, paykunatam llapa profetakunapas yanaparqaku.

³Chay tiempopim, Eufrates mayupa waklawninpi kamachikuq Tatnaiwan Setar-boznai hinaspa paykunawan kaqkuna rispanku nirqaku: ¿Pitaq kay templota kaqllamanta hatarichinaykichikpaq hinaspa kay perqakunatapas qespichinaykichikpaq kamachisurqankichik? nispanku.

⁴Kaqmantam tapurqaku: ¿Pikunataq kay templo hatarichiqkuna kachkan? nispanku.

⁵Ichaqa Tayta Diosmi ancianokunata waqaycharqa, chaynapim mana harkakuyta atirqakuchu, rey Darioman cartata apachiptinku huk cartawan contestamunankama.

⁶Kaymi Eufrates mayupa waklawninpi munaychakuq Tatnaipa, Setar-boznaipa hinaspa kamachikuqmasinkunapa rey Darioman carta apachisqanku:

⁷Reynillayku Darío, hawkayay qanwan kachun.

⁸Kunanmi reynilláy willamuykiku, ñoqaykum Judá lawman rispayku Atiyniyuq Diospa templon ruwasqankuta rikuramuniku, perqankunatapas labrasqa hatun rumikunawanmi hatarichichkanku, vigankunapas churasqañam kachkan, utqayllamanña ruwaspankum qespiykachichkankuña.

⁹Chaymi kamachiqninkunata kaynata tapurqaniku: “¿Pitaq kamachisurqankichik kay templota chaynataq perqankunatapas hatarichinaykichikpaq?” nispayku.

¹⁰Paykunapa sutinkunatapas qanman willamunaykupaqmi tapurqaniku, chaynapi sutinkuta qellqaykuspa apachimunaykupaq.

¹¹Hinaptinmi paykuna niwarqaku: “Ñoqaykuqa kaniku hanaq pachapipas kay pachapipas munaychakuq Diospa serviqninkunam. Kay musoqmanta hatarichisqayku temploqa ñawpaqmantaraqmi ruwasqa karqa, chaytaqa Israelpa hatun reyninmi ruwachispan qespichirqa.

¹²Ichaqa ñawpaq taytayku hanaq pachapi munaychakuq Tayta Diosta piñachisqankuraykum paykunata Caldea lawpi Babilonia nacionpa reynin Nabucodonosorman qoykurqa. Chay reymi kay templota tuñirachispan paykunata Babiloniaman presota aparqa.

¹³Chaywanpas Babilonia nacionpa reynin Cirom munaychakuyta qallarisqan watapi, Tayta Diospa templon musoqmanta ruwasqa kananpaq kamachikurqa.

¹⁴Rey Nabucodonosormi Jerusalenpi Diospa templonmanta hurqorurqa qorimanta qollqemanta serviciokunata, hinaspam Babilonia llaqtapi templonman churarurqa. Chay serviciokunatam Babiloniapa templonmanta rey Ciro hurqoruspan Sesbasarman qoykachirqa, paytam gobernador kananpaq churarqa.

¹⁵Sesbasartam rey Ciro kamachirqa: Jerusalenman rispaykiyá Tayta Diospa templonta musoqmanta maymi kasqanpi hatarichimuy, hinaspayá chay temploman kay serviciokunata churamuy, nispa.

¹⁶Chaymi Sesbasar rispan, Diospa templonpa cimientonkunata Jerusalenpi churarqa, chaymantapunim kunankama temploqa perqachikuchkan, ichaqa manaraqmi qespinraqchu”, nispanku.

¹⁷Chaynaqa, reynillayku, allinpaq rikchakapusuptikiqa, reykunamanta willakuq librokunapiyá maskachiy, chay librokunaqa Babilonia llaqtapim kachkan, cheqapchus icha manachus rey Ciro kamachikusqa kay Jerusalén llaqtapi Diospa templon musoqmanta hatarichisqa kananpaq. Chaynaqa, reynillayku, cheqap kasqanta yachaykuspaykiyá imam tanteasqaykita willaykachimuwayku, nispanku.