Read Biblia Revisión Chuya Qellqa 1992 – Chuya Qellqa 1992 Esdras 9 Bible Online

Esdras 9 - Biblia Revisión Chuya Qellqa 1992 – Chuya Qellqa 1992 bible

Esdras 9

¹Chaykuna ruwayta tukuruptinkum, llapa kamachikuqkuna asuykamuwaspa niwarqaku: Israel runakunawan sacerdotekuna hinaspa levitakunaqa manam rakikunkuchu millakuypaq ruwaq cananeokunamanta, heteokunamanta, ferezeokunamanta, jebuseokunamanta, amonitakunamanta, moabitakunamanta, egipciokunamanta hinaspa amorreokunamantaqa, aswanqa paykunapa millakuypaq ruwasqankutam qatipakunku.

²Paykunapas churinkupas chay nacionniyuq runakunapa warmi churinkunawanmi casarakurunku, chaynapim Diospa llaqtan huklaw llaqtayuq runakunawan chaqrukurunku. Kamachikuqkunawan gobernadorkunaraqmi puntataqa chay hucha ruwaytaqa qallaykurqaku, nispanku.

³Chayta yachaykuspaymi pachaytawan capayta llikiparqani, chukchaytawan barbaytapas chutakuspaymi sinchi llakisqa tiyarqani.

⁴Preso kasqankumanta kutimuqkunapa huchanrayku Israelpa yupaychasqan Tayta Diospa Chuya siminta manchakuqkunam ñoqaman huñunakamurqaku. Ñoqañataqmi tardeykuyta sacrificio ruwana horakama hina llakisqalla karqani

⁵Tardeykuyta Diospaq sacrificio ofrecena horatam llakisqa kasqaymanta hatarirqani, pachaypas chaynataq capaypas llikisqa, hinaspaymi makiykunata hoqarispay qonqoranpa Tayta Diosta mañakurqani,

⁶kaynata nispay: Dios Taytalláy, pantaypi hinaspa penqakuypa huntasqanmi kachkani, manam imayna asuykamuytapas atikichu. Diosnilláy, mana allin ruwasqaykum pasaypaqta mirarun, huchaykupas hanaq pachakamam chayarun.

⁷Taytaykupa tiemponmanta kunankamam hatun huchapi kawsachkaniku; chay huchaykuraykum ñoqaykupas, reyniykupas, sacerdoteykutapas huklaw nacionkunapa reyninkunaman qosqa karqaniku, chaynapim wañuchisqa, preso apasqa, suwasqa, hinaspa hatun penqaypi karqaniku, chaynam kunanpas kachkaniku.

⁸Chaywanpas Dios Taytallayku, kunanmi pisi tiempollapaqpas kuyapayakuynikita qawaykachiwankiku, hinaspam wakiqllaykutapas libreta puchuykachiwankiku, chaynapi chuya allpapi hawka kawsanaykupaq. Diosnillayku, qanmi ñawillaykuta kanchariykuwankiku, esclavo kachkaptiykum allin kawsaytaraq qoykuwankiku.

⁹Esclavo kachkaptiykupas manam esclavo kayniykupichu saqeruwarqankiku, aswanqa kuyapayawaspaykikum Persia nacionpa reyninkunawan llakipayarichiwarqankiku. Kawsaytam qoykuwarqankiku tuñichisqa temploykita musoqmanta hatarichinaykupaq, Judá nacionpi Jerusalén llaqtapi waqaychawanaykikupaq.

¹⁰Chaynaqa, Diosnillayku, tukuy mana allinkunata ruwachkaspaqa ¿imataraqtaq nikikuman? kamachikuynikikunatapas manam kasukurqanikuchu.

¹¹Profetaykikunawanmi kaynata nichiwarqankiku: “Munaychakunaykichikpaq yaykusqaykichik allpaqa, chaypi yachaq runakunapa qachachasqanmi kachkan, paykunaqa millakuypaq ruwasqankuwanmi kuchun-kuchun qachacharunku.

¹²Chaynaqa, amam warmi churikichiktapas paykunapa qari churinkuwanqa casarachinkichikchu, nitaqmi qari churikichiktapas warmi churinkuwanqa casarachinkichikchu, amam hawkallataqa saqenkichikchu, nitaqmi allin kanankutapas saqenkichikchu; chaynapi kallpasapa kanaykichikpaq, allpapa allin rurunta mikunaykichikpaq, miraynikichikmanpas wiñaypaq herenciata saqenaykichikpaq”, nispa.

¹³Mana allinkuna ruwasqaykurayku llumpa-llumpay huchaykurayku hatun sasachakuykuna hamuwachkaptinkupas, qamqa Diosnillayku, manam huchaykuman hinachu castigawarqankiku aswanqa wakiqllaykutapas libraykuwankikuraqmi.

¹⁴Chaynaqa, ¿huktawanraqchu kamachikuynikikunata mana kasukusaqku, hinaspa kay millakuypaq ruwaq runakunawan chaqrukusaqku? Manam chaytaqa ruwaymankuchu, chayta ruwaptiykuqa ñoqaykupaq piñakuruspaykichá llapallaykuta chinkarachiwankikuman.

¹⁵Israelpa yupaychasqan Diosnillayku, qamqa tukuy imapim yanapaykuwarqankiku, kunan qawasqaykupi hinapas, munakuynikiman hinam kay asllatapas kawsachiwachkankikuraq. Cheqaptapas qayllaykipiqa huchasapam kallaniku, chayraykum qampa ñawpaqnikimanqa mana asuykamunaykupaq hinachu kallaniku, nispa.