Read Biblia Revisión Chuya Qellqa 1992 – Chuya Qellqa 1992 Nehemías 5 Bible Online

Nehemías 5 - Biblia Revisión Chuya Qellqa 1992 – Chuya Qellqa 1992 bible

Nehemías 5

¹Chaykunapa qepantam, llapa runakuna, qaripas warmipas castamasinku judiokunapa contranpi llumpayta quejakurqaku.

²Wakiqninkum kaynata nirqaku: Ñoqaykupas chaynataq churiykupas achkallañam kaniku, chayraykum trigota prestakuruniku, yarqaymanta mana wañurunaykupaq, nispa.

³Wakinmi nirqaku: Yarqawaptinkum trigota rantinaykupaq chakraykuta, uvas chakraykuta chaynataq wasiykutapas prendakuruniku, nispanku.

⁴Wakinñataqmi nirqaku: Reyman impuestota paganaykupaqmi chakraykurayku, uvas chakraykurayku qollqeta prestakuruniku.

⁵Ichaqa ñoqaykupas paykunapas chay castallam kaniku, churiykupas paykunapa churinku hinallam. Chaywanpas ñoqaykum warmi churiykuta qari churiykuta serviqninku kananpaq paykunaman qorqaniku, chaynapim wakin warmi churiykuqa criadankuña kachkankupas, manam imayna kutichikuytapas atinikuchu, chakraykupas hinaspa uvas chakraykupas hukpa makinpiña kasqanrayku, nispanku.

⁶Tukuy chay quejankuta uyariykuspaymi llumpayta piñakururqani.

⁷Chaykunapi allinta yuyaymanaykuspaymi ancha reqsisqa runakunatawan kamachikuqkunata kaynata qaqcharqani: ¿Mirayniyuqpaqraqchu castaykichikmanpas prestankichik? nispay. Hinaspaymi chay asuntomanta rimanaykupaq llapa runakunata huñururqani.

⁸Hinaspam paykunata nirqani: Ñoqaykum atisqaykuman hina judío wawqenchikkunata nacionkunaman esclavo kanankupaq rantikusqa kasqankumanta hurqomurqaniku. ¿Qamkunañataqchu aylluykichikta rantikurunkichik ñoqayku kutichimunaykupaq? nispa. Chaymi paykuna upallakuspanku mana imatapas niwaptinku,

⁹kaynata nirqani: Manam allinchu chay ruwasqaykichikqa. Qamkunaqa Diosninchiktayá respetaychik, chaynapi enemigonchik nacionkuna ama burlakuwananchikpaq.

¹⁰Ñoqapas, aylluykunapas chaynataq criadoykunapas qollqetawan trigotam prestarqaniku, chaynaqa amañayá ima prestasqanchiktapas mañasunñachu.

¹¹Chaynaqa, kunanyá chakrankuta, uvas chakrankuta, olivos chakrankuta hinaspa wasinkutapas kutiykachipuychik. Trigomanta, vinomanta, aceitemanta hinaspa qollqepa miraynin debesusqaykichiktapas amaña mañaychikñachu, nispa.

¹²Hinaptinmi paykuna nirqaku: Niwasqaykikuman hinam ruwasaqku, lliwta kutichipuspaykum manaña imatapas mañasaqkuñachu, nispanku. Chaymi sacerdotekunata qayachispay, paykunapa qayllanpi jurachiptiy chaynata ruwanankupaq prometekurqaku.

¹³Pachaytapas taspispaymi kaynata nirqani: Pipas kay juramentota mana cumpliq runakunataqa, Diosyá kaynata taspichun, hinaspayá llapa imanta qechuspa wasinmanta hinaspa llamkayninmantapas qarqochun, nispay. Hinaptinmi llapallanku nirqaku: ¡Amén! nispanku. Chaymi Tayta Diosta yupaychaspanku chayman hina ruwarqaku.

¹⁴Rey Artajerjesmi iskay chunka wataña munaychakuchkaspan Judá lawpi gobernador kanaypaq churawarqa, chaymi gobernador karqani kimsa chunka iskayniyuq wata munaychakuyninkama. Ichaqa chay chunka iskayniyuq watapim ñoqapas nitaq aylluykunapas gobernadorninkunaman reypa qosqan mikuytaqa mana chaskirqanikuchu.

¹⁵Ñoqamanta punta kaq gobernadorkunam ichaqa, mana allin kamachikuqkuna kaspanku, mikunankupaqwan vino tomanankupaq sapa punchaw yaqa parte kilo qollqeta cobrarqaku; paykunapa yanapaqninkunapas llaqtatam ñakarichirqaku. Ñoqam ichaqa Diosta manchakusqayrayku mana chaynatachu ruwarqani.

¹⁶Kay muralla hatarichiypipas tupawaqniytam ruwarqani, manataqmi chakrakunatapas rantirqanikuchu. Llapa runaykunapas chay llamkaypim huk runa hinalla karqaku.

¹⁷Judiokuna kaspapas otaq kamachikuqkuna kaspapas, ñoqamantam mikuqku pachak pichqa chunka runakuna, ñoqamantataqmi mikuqku muyuriqniykupi kaq nacionkunamanta hamuq runakunapas, paykunaqa manam yupasqachu karqaku.

¹⁸Ñoqapa kaqtam mikunaykupaq sapa punchaw nakachirqani huk torota, soqta allinnin ovejakunata hinaspa raprayuq animalkunatapas; sapa chunka punchawmantam nana-nanaq vinota apachimuq kani. Kaynata ruwachkaspaypas manam gobernador kasqayrayku tupawaqniytaqa mañakurqanichu, chaynataqa ruwarqani llapa runakuna llumpay sasachakuypi kasqanraykum.

¹⁹Chaymantam Tayta Diosta mañakuspay nirqani: ¡Dios Taytalláy, kay runakunapaq tukuy ima ruwasqaytaqa amamá qonqarunkichu! nispay.