Read Biblia Revisión Chuya Qellqa 1992 – Chuya Qellqa 1992 Nehemías 8 Bible Online

Nehemías 8 - Biblia Revisión Chuya Qellqa 1992 – Chuya Qellqa 1992 bible

Nehemías 8

¹Chaykunapa qepantam huk runa hinalla llapallanku huñunakamurqaku Yakuwan sutichasqa pukyupa ñawpaqnin plazaman. Hinaspankum sacerdote Esdrasta nirqaku Israelpa mirayninkunaman Moisesnintakama Tayta Diospa qosqan kamachikuy librota apamunanpaq.

²Qanchis kaq killapa qallariynin punchawpim, qarikuna, warmikuna hinaspa warmakunamanta yuyayniyuq kaqkuna huñunasqa kachkaptinku, kamachikuy librota sacerdote Esdras apamurqa.

³Hinaspanmi achikyaqmanta chawpi punchawkama librota leerqa, yakuwan sutichasqa punkupa ñawpaqnin plazapi, chaymi llapallan huñunasqa runakuna Diospa kamachikuyninta tukuy sonqonkuwan uyarirqaku.

⁴Chay huñunakuypaqmi tablakunamanta huk tabladillota ruwarqaku, chaypa hawanpim Esdras sayarqa, alleq lawninpim sayarqaku Matatías, Sema, Anías, Urías, Hilcías hinaspa Maasías, ichoq lawninpiñataqmi sayarqaku Pedaías, Misael, Malquías, Hasum, Hasbadana, Zacarías hinaspa Mesulam.

⁵Chaymi sacerdote Esdras, kamachikuy librota llapallan runakunapa qawasqanta kicharqa, payqa tabladillopi kasqanraykum llapallan runakunamanta altoniqpi kachkarqa, librota kichaykuptinmi llapallanku sayarirqaku.

⁶Hinaptinmi Tukuy Atiyniyuq Tayta Diosta sacerdote Esdras yupaycharqa. Llapa runakunañataqmi makinkuta hoqarispanku nirqaku: ¡Amén, Amén! nispanku. Hinaspankum pampakama kumuykuspanku Tayta Diosta hatuncharqaku.

⁷Levitakunamanta Josueywan Bani, Serebías, Jamín, Acub, Sabetai, Hodías, Maasías, Kelita, Azarías, Jozabed Hanán hinaspa Pelaiañataqmi Diospa kamachikuyninta llapa runakunapa rimayninman tikraspa sumaqta entiendechirqaku. Llapa Runakuna maymi kasqankupi qasillalla sayaptinkum

⁸paykunañataq Tayta Diospa kamachikuynin librota kallpawan leespanku sumaqta entiendechirqaku.

⁹Hinaptinmi Diospa kamachikuyninta uyarispanku llapa runakuna waqakurqaku, chaymi gobernador Nehemiaswan sacerdote Esdras hinaspa levitakuna, llapa runakunata kaynata nirqaku: Amayá llakikuychikchu nitaq waqaychikchu, kunanqa yupaychasqanchik Tayta Diospaq sapaqchasqa punchawmi, nispanku.

¹⁰Chaymantam Esdras nirqa: Rispaykichikyá allinnin mikuykunata mikuspa miskin vinota tomamuychik, hinaspayá mana mikunayuq kaqkunamanpas apachiychik. Kunan punchawqa Señorninchikpaq sapaqchasqa punchawmi. Ama llakikuychikchu, Tayta Diospa kusikuyninmi kallpanchikqa, nispa.

¹¹Llapa levitakunapas, waqaqkunata consuelaspankum kaynata nirqaku: Ama waqaychikchu, kunanqa Diospaq sapaqchasqa punchawmi, nispanku.

¹²Chaynapim llapa runakunaqa Tayta Diospa kamachikuyninkunata sumaqta yachaykuspanku, kusisqa ripukurqaku mikuspa tomaspa mana mikunayuqkunamanpas mikuyta haywanankupaq.

¹³Paqarinnintin punchawñataqmi, ayllukunapa kamachiqninkuna, sacerdotekuna hinaspa llapa levitakuna, sacerdote Esdraswan huñunakururqaku, chaynapi Tayta Diospa kamachikuyninta sumaqta estudianankupaq.

¹⁴Chay qellqasqa yachachikuypim tarirurqaku Moisesnintakama Diospa kamachikuyninta, qanchis kaq killapa hatun fiestanpi Israelpa mirayninkuna ramadakunapi yachanankupaq.

¹⁵Chaymi Jerusalenman chaynataq llapa llaqtakunamanpas kaynata willachimurqaku: Orqokunaman rispaykichik olivospa, purun sachapa, arrayanpa, palmerapa hinaspa llapallan sachakunapa kallmankunata apamuychik, chaynapi kamachikuy libropi qellqasqaman hina ramadakunata ruwananchikpaq, nispanku.

¹⁶Hinaptinmi llapa runakunaqa rispanku kallmakunata apamurqaku, hinaspam wasinkupa qatankunapi, wasipa pationkunapi, Diospa templonpa pationkunapi, Yakuwan sutichasqa punkupa ñawpaqnin plazapi chaynataq Efrainpa punkun plazapipas sapakama ramadakurqaku.

¹⁷Preso apasqa kasqankumanta kutimuqkunam ramadakunata ruwaspanku chaypi yacharqaku. Israelpa mirayninkunaqa, Nunpa churin Josueypa tiemponmantaraqmi manaña chaynataqa ruwarqakuñachu. Chaymi hatun kusikuy karqa.

¹⁸Qanchis punchawmi chay fiestata ruwarqaku, sacerdote Esdrasñataqmi chay fiesta qallariyninmanta tukupaynin punchawkama Diospa kamachikuynin librota leerqa. Pusaq kaq punchawpiñataqmi, costumbrenkuman hina hatun huñunakuyta ruwarqaku.