Read Biblia Revisión Chuya Qellqa 1992 – Chuya Qellqa 1992 Ester 1 Bible Online

Ester 1 - Biblia Revisión Chuya Qellqa 1992 – Chuya Qellqa 1992 bible

Ester 1

¹Rey Asuerom India nacionmanta Etiopía nacionkama pachak iskay chunka qanchisniyuq provinciakunapi munaychakurqa.

²Chay munaychakusqan nacionpa capitalninmi karqa Susa llaqta.

³Kimsa wataña munaychakuchkaspanmi, kamachikuypi yanapaqninkunapaq hatun convidota ruwachispan, Persia nacionpa, Media nacionpa tropakunapa kamachiqninkunata chaynataq provinciakunapi kamachikuqkunatapas qayachirqa.

⁴Rey Asueroqa chayta ruwachirqa munaychakuyninpa imapas kapuqninkunata, hatun kayninta hinaspa atiyniyuq kayninta paykunaman qawachinanpaqmi. Chay fiestaqa soqta killantinmi karqa.

⁵Chay soqta killa pasaruptinpas qanchis punchawtawanraqmi convidota ruwachirqa palacionpa punkun huertapi, hinaspam Susa llaqtapi yachaqkunata, aputapas wakchatapas chay fiestaman qayachirqa.

⁶Chay patioqa yuraq hinaspa azul hatun toldokunawan adornasqam karqa, watunkunañataqmi karqa linomanta morado colorniyuqkama; chay watukunatam qollqe anillokunapa ukunta pasachispa mármol rumimanta pilarkunaman watarqaku. Tiyanankunapas qori-qollqemantam karqa, pampanpas suma-sumaq cheqchi, mármol, jacinto rumikunamanta ruwasqam karqa.

⁷Reypa munasqanman hinam vinotapas achkanpi qorimanta tukuy rikchaq vasokunapi upyarqaku.

⁸Ichaqa reymi llapallan mayordomokunata kamachirqa pitapas mana upyay munaqtaqa ama hikutanankupaq, aswanqa munasqankuman hinalla sapakama upyakunankupaq.

⁹Reina Vastipas warmikunapaqmi huk hatun convidota ruwarqa, rey Asueropa palacionpi.

¹⁰Qanchis kaq punchawpim, reyqa vino upyasqanwan kusisqallaña kaspan, Mehumanta, Biztata, Harbonata, Bigtata, Abagtata, Zetarta hinaspa Carcasta, kay qanchis serviqninkunata kamachirqa,

¹¹reina Vastita coronasqata reypa ñawpaqninman pusamunankupaq, chaynapi kamachikuqkunawan llapa runakuna buenamoza kasqanta qawanankupaq. Vastiqa ancha buenamoza warmim karqa.

¹²Ichaqa reina Vastim reypa serviqninkunatakama kamachimusqanta mana kasukurqachu. Hinaptinmi reyqa hukmanyaruspan sinchita piñakururqa. Llumpayta rabiakuspanmi

¹³qayachimurqa leykuna reqsiq runakunata. Reypa costumbrenmi karqa asuntonkuna allichananpaqqa leykunatawan allin arreglo ruwaymanta yachaqkunata tapukuy.

¹⁴Reypa confianzan runakunam karqa: Carsena, Admata, Tarsis, Meres, Marsena hinaspa Memucán. Paykunam Persia nacionmanta, Media nacionmanta karqaku. Reypa munaychakuyninpi hatun kamachikuqkunam karqaku.

¹⁵Paykunatam rey tapurqa: Leyman hina ¿imatataq reina Vastita ruwasunchik, serviqniykunawan qayachimuchkaptiy mana kasukuwasqanmanta? nispa.

¹⁶Hinaptinmi reypa qayllanpi chaynataq kamachikuqkunapa ñawpaqninpi Memucán nirqa: Reina Vastiqa manam reypa contrallanpichu huchallikurun, aswanqa llapa kamachiqkunapa chaynataq rey Asueropa munaychakusqan provinciankunapa contranpim.

¹⁷Reinapa ruwarusqanta llapa warmikuna yacharuspankum qosankuta mana kasuspanku ninqaku: “Reina Vastipas, rey Asuero ñawpaqninman qayachichkaptinmi mana kasurqachu”, nispanku.

¹⁸Persia nacionpi Media nacionpi kamachikuqkunapa warminkupas reinapa imam ruwarusqanta uyariruspankuchá qosankupa contranpi chaynata ruwanqaku, hinaspaqa sasachakuykunawan piñanakuykunatam apaykamunqaku.

¹⁹Reynilláy, allinpaq rikchakapusuptikiqa musoq kamachikuyta decretay, Persia nacionpa Media nacionpa leyninkunaman yapasqa kaspa mana haykapipas yanqachasqa kananpaq. Chayman hina reina Vasti amaña haykapipas qayllaykiman hamuchunchu, aswanqa paypa rantinpi huk warmiña reina kananpaq akllasqa kachun.

²⁰Chay decreto qosqaykiqa munaychakusqayki provinciakunapa yachasqanmi kanan, chaynapim llapa warmikuna apupas wakchapas qosankuta respetanqaku, nispa.

²¹Memucanpa rimarisqan reypaq chaynataq yanapaqninkunapaqpas allinpaq rikchakapuptinmi, reyqa chayman hina ruwaspan,

²²llapallan provinciakunaman cartakunata apachirqa; chay cartakunaqa karqa sapa provinciapa imaynam qellqasqankuman chaynataq rimayninkuman hinam, chaynapi llapa qarikuna warminkuwan kasuchikunankupaq.