Read Biblia Revisión Chuya Qellqa 1992 – Chuya Qellqa 1992 Éxodo 14 Bible Online

Éxodo 14 - Biblia Revisión Chuya Qellqa 1992 – Chuya Qellqa 1992 bible

Éxodo 14

¹Moisestam Tayta Dios nirqa:

²Israelpa mirayninkunata nimuy, kutirispanku Pi-hahirotpa chimpanpi carpankuta sayachispa samanankupaq. Samanqakuqa Migdolmanta lamar qochaman rinapim, Baal-zefonpa chimpanpi. Lamar qochapa patanpi carpankuta sayachispa samachunku.

³Faraonmi ninqa: “Israelpa mirayninkunaqa purunpim pantaruspanku chunniqwan wichqarachikunku” nispa.

⁴Qatimusunaykichikpaqmi Faraonpa sonqonta rumiyarachisaq, hinaspam Faraonpa chaynataq tropankunapa qayllanpi atiyniyta qawachikusaq. Hinaptinmi Egipto runakuna yachanqaku ñoqa Tayta Dios kasqayta, nispa. Chaymi Israelpa mirayninkuna chaynata ruwarqaku.

⁵Israelpa mirayninkuna lloqsisqankutam Egipto nacionpi reyman willaykurqaku, hinaptinmi Faraonqa serviqninkunapiwan Israelpa mirayninkunapa contranpi tanteaspa nirqaku: Israelpa mirayninkunata kachaykuspanchikqa yanqatam ruwarunchik, ¿pitaq kunanqa serviwasunchik? nispanku.

⁶Chaymantam Faraón kamachikurqa carretanta caballokunaman watanankupaq, hinaspam tropankunata pusarikuspa pasarqa.

⁷Soqta pachak akllasqa carretakunawan chaynataq Egipto nacionpi llapallan carretakunawanmi pasarqa, sapa carretapim huk capitán rirqa.

⁸Tayta Diosmi Egipto nacionpi rey Faraonpa sonqonta rumiyarachirqa, hinaptinmi Israelpa mirayninkunata qatirqaku. Israelpa mirayninkunaqa atiywanmi lloqsirqaku.

⁹Egipto tropakunam caballokunawan, carretankunawan Israelpa mirayninkunata qatispa lamar qochapa hichpanpi samachkaqta hayparurqaku, Baal-zefonpa chimpan Pi-hahirotpa hichpanpi.

¹⁰Faraón hichpaykuptinñam, Israelpa mirayninkuna musyakururqaku Egipto runakuna paykunapa qepanta hamusqanta, chayraykum hatu-hatunta mancharikuspanku qaparispa Tayta Diosta mañakurqaku.

¹¹Hinaspam Moisesta nirqaku: ¿Manachu Egipto nacionpi sepultura karqa kay chunniqpi wañunaykupaq? ¿Imanasqataq kayta ruwawankiku? ¿Imapaqtaq Egipto nacionmanta hurqomuwarqankiku?

¹²¿Manachu Egiptollapiraq nirqaykiku: “Egipto runakunata servinaykupaq saqeykuwayku” nispa? Chunniqpi wañunaykumantaqa Egipto runakunata serviyniykum allinqa kanman karqa, nispanku.

¹³Chaymi runakunata Moisés nirqa: Ama manchakuychikchu, sayaychik hinaspa Tayta Diospa salvawasqanchikta kunan qawaychik. Wak Egipto runakuna qawasqaykichiktaqa manañam haykapipas rikunkichikñachu.

¹⁴Tayta Diosmi rantikichikpi peleanqa, qamkunaqa hawkalla kaychik, nispa.

¹⁵Hinaptinmi Moisesta Tayta Dios nirqa: ¿Imanasqataq ñoqataraq mañakamuwachkanki? Israelpa mirayninkunata ñawpaqman rinankupaq kamachiy.

¹⁶Qamñataq tawnaykita hoqarispa lamar qocha kichakunanpaq haywariy; lamar qocha kichakuruptinmi Israel runakuna chaki allpanta pasanqaku.

¹⁷Ñoqam Egipto runakunapa sonqonta rumiyarachisaq qepaykichikta qatiykamusunaykichikpaq, chaynapim Faraonpi, lliw tropankunapi, carretankunapi hinaspa caballopi riqkunapi atiyniyta qawachikuspay hatunchasqa kasaq. Chayraqmi Egipto runakuna yachanqaku ñoqa Tayta Dios kasqayta.

¹⁹Hinaptinmi Israelpa mirayninkunapa ñawpaqninta riq Diospa angelninwan sayanpa puyupas, qepankumanña churakuykurqa.

²⁰Egipto tropakunapa campamentonpa hinaspa Israel tropakunapa campamentonpa chawpinpim chay puyu churakuykurqa, chaymi Egipto runakunapaq tutayay karqa, Israel runakunapaqñataq achkiy; chaynapim chay tuta, israel runakunata Egipto tropakuna mana haypayta atirqakuchu.

²¹Moisesmi lamar qochapa hawanman makinta haywarirqa, hinaptinmi tukuy tuta intipa qespimunan lawmanta Tayta Dios sinchi wayrawan lamar qochata iskayman rakinarurqa, hinaptinmi chaki allpa rikurirurqa.

²²Chaymi Israelpa mirayninkuna lamar qochapa chawpinta, chaki allpanta pasarqaku, yakukunam alleq lawninkupi hinaspa ichoq lawninkupi perqa hina karqa.

²³Egipto runakunapas paykunapa qepantam qatiykurqaku. Faraonpa llapallan caballonkuna, carretankuna hinaspa caballopi riqkunam lamar qochapa chawpinkama yaykururqaku.

²⁴Yaqa pacha achikyaqtañam Egipto runakunapa tropanta, sayanpa ninamantawan puyumanta Tayta Dios qawarispa chaqwanarachirqa,

²⁵chaymi carretankunapa ruedanta wichirirachirqa, hinaptinmi qatiyninkupi sasachakuspanku Egipto runakuna nirqaku: Israel runakunamanta ayqekusunchik, Tayta Diosmi ñoqanchikpa contranchikpi peleachkan, nispa.

²⁶Chaymi Moisesta Tayta Dios nirqa: Lamar qochapa hawanman makikita haywariy, chaynapi Egipto runakunata, carretankunata hinaspa caballopi riqkunata, yaku maymi kasqanman kutiykuspa pamparunanpaq, nispa.

²⁷Hinaptinmi lamar qochapa hawanman makinta Moisés haywariykuptin achikyaykuchkaqtaña lamar qocha imaynam kasqanman kutiykurqa, chaymi Egipto runakuna ayqechkaspanku yakuwan tupanakururqaku. Tayta Diosmi lamar qochapa chawpinpi Egipto runakunata chinkarachirqa.

²⁸Yakum maymi kasqanman kutiykuspan carretakunata hinaspa caballopi riqkunata pamparurqa. Israel runakunapa qepanta lamar qochaman qatiykuq Faraonpa tropankunaqa manam chullallapas lluptirqakuchu.

²⁹Israelpa mirayninkunam ichaqa lamar qochapa chawpinta, chaki allpanta pasarurqaku. Yakukunam alleq lawninkupi hinaspa ichoq lawninkupi perqa hina karqa.

³⁰Chaynatam Tayta Dios chay punchawpi Israel runakunata salvarurqa Egipto runakunamanta. Israel runakunam Egipto tropakunata rikurqaku lamar qochapa patanpi wischu-wischu wañusqata.

³¹Israel runakunaqa Tayta Diospa hatun atiyninwan Egipto runakunapa contranpi ruwasqanta qawaykuspankum Tayta Diosta manchakurqaku, hinaspam Tayta Diosman chaynataq serviqnin Moisespipas hapipakurqaku.