Read Biblia Revisión Chuya Qellqa 1992 – Chuya Qellqa 1992 Éxodo 15 Bible Online

Éxodo 15 - Biblia Revisión Chuya Qellqa 1992 – Chuya Qellqa 1992 bible

Éxodo 15

¹Chaymi Moiseswan Israelpa mirayninkuna kay takita Tayta Diosman takirqaku: Tayta Diosmanmi takisaq, hatun atiynintam qawachikurqa, caballokunatapas sillakuqnintintam lamar qochapi chinkarachirqa.

²Tayta Diosmi kallpanchaqniyqa, Tayta Diosmi salvawaqniyqa, chaymi payman takipusaq. Payqa ñoqapa Diosniymi, chayraykum yupaychasaq; payqa ñawpaq taytaykunapa Diosninmi, chayraykum hatunchasaq.

³Tayta Diosqa guerrapi peleaqmi, Tayta Diosmi sutinpas.

⁴Faraonpa carretankunatawan tropankunatam lamar qochapi chinkarachirqa, akllasqa capitanninkunatam Puka lamar qochapi chinkarachirqa.

⁵Rumi hinam chinkaykurqaku, lamar qocham paykunata pamparurqa.

⁶Dios Taytallayku, atiynikitam qawaykachikunki; Dios Taytallayku, alleq makikiwanmi enemigota ñutururqanki.

⁷Manchakuypaq atiynikiwanmi contraykipi hatariqkunata chinkarachinki, hatun piñakuynikiwanmi pajata hina ruparachinki.

⁸Piñakuywan pukuruptikim yakukunapas iskayman rakikururqa, lamar qochapa olankunam perqa hina sayarurqa.

⁹Enemigom nirqa: “Haypanaykamam qatisaq, qechusqaytam rakinakusaq, chayraqmi saksasqa hina kasaq, espadayta hurqospam chinkarachisaq”, nispa.

¹⁰Wayrata pukuykachiptikim lamar qocha paykunata pamparurqa, manchakuypaq yakupim titi hina tiyarurqaku.

¹¹Dios Taytalláy, qam hina huk diosqa manam kanchu, qam hina admirakuypaq chuya Diosqa manam kanchu. Qamqa admirakuypaq kaqkunatam ruwanki, qamqa hatun milagrokuna ruwaqmi kanki.

¹²Atiyniyuq alleq makikitam haywarirqanki, hinaspam allpawan paykunata millpurachirqanki.

¹³Kuyakuynikiman hinam kay librasqayki llaqtaykita pusawachkankiku, hatun atiynikiwanmi yachanayki wasiman pusawachkankiku.

¹⁴Llaqtakunam uyariruspa katkatatanqaku, filisteokunam nanaywan hapichikunqaku.

¹⁵Edom nacionpi kamachikuqkunam hukmanyanqaku, Moab nacionpi kamachikuqkunam katkatatanqaku, Canaán allpapi yachaqkunam hukmanyanqaku.

¹⁶Dios Taytallayku, paykunaqa mancharikuymanta katkatatachunku, hatun atiynikirayku rumi hina upallachunku; runaykikuna pasanaykukama upallachunku, kay rantisqaykikuna pasanaykukama upallachunku.

¹⁷Dios Taytallayku, qanmi yaykuchiwankiku akllakusqayki orqoman, yachanayki orqoman, santuarioyki kananpaq makikiwan allichasqayki orqoman hinaspam chaypi kawsachiwankiku.

¹⁸Tayta Diosmi wiña-wiñaypaq munaychakunqa, nispa.

¹⁹Faraonpa caballonkunawan, carretankuna hinaspa caballopi riqkuna lamar qochaman yaykuruptinmi, Tayta Dios paykunapa hawanman lamar qochata kutiykachirqa. Israelpa mirayninkunam ichaqa chaki allpallanta lamar qochapa chawpinta pasarqaku.

²⁰Chaymi Aaronpa panin María Diospa profetan kasqanrayku tinyanta hapiykurqa, llapa warmikunapas paypa qepantam tinyankuta tocastin, tusustin lloqsirqaku.

²¹Mariañataqmi takispan nirqa: Tayta Diosman takiychik, hatun atiynintam qawachikurqa. Caballokunatapas sillakuqnintintam lamar qochapi chinkarachirqa, nispa.

²²Moisesmi Israel runakunata Puka lamar qochamanta Shur sutiyuq chunniqman pasachirqa, kimsa punchawmi chayninta rirqaku, ichaqa manam yakuta tarirqakuchu.

²³Chaymi “[6]Mara” sutiyuq sitioman chayaruspanku qatqe yakuta tariruspa qatqe kasqanrayku mana tomayta atirqakuchu. Chayraykum Marawan suticharurqaku.

²⁴Chaymi runakuna Moisespa contranpi kaynata nirqaku: ¿Imatataq tomasaqku? nispa.

²⁵Hinaptinmi Tayta Diosta Moisés mañakuptin huk sachata qawaykachirqa, chay sachata yakuman wischuykuptinmi yaku miskiyarurqa. Chaypim Tayta Dios paykunata pruebarqa, hinaspam decretokunatawan imaynam kawsanankupaq kamachikuykunata qorqa.

²⁶Tayta Diosmi nirqa: Ñoqaqa Tayta Diosmi kani, sichu ñawpaqniypi allin kaqkunata ruwaspa kamachikuyniykunata uyariptikiqa chaynataq decretoykunatapas kasukuptikiqa, Egipto runakunaman apachisqay mayqannin onqoykunatapas manam apachimusqaykichu. Ñoqaqa hampiqniki Diosmi kani, nispa.

²⁷Chaymantam Elimman chayarurqaku chunka iskayniyuq pukyukunapa chaynataq qanchis chunka palmera sachakunapa kasqanman, hinaspam yakukunapa hichpanpi carpankuta sayachirqaku.