Read Biblia Revisión Chuya Qellqa 1992 – Chuya Qellqa 1992 Éxodo 23 Bible Online

Éxodo 23 - Biblia Revisión Chuya Qellqa 1992 – Chuya Qellqa 1992 bible

Éxodo 23

¹Amam imatapas llullakuspaqa willakunkichu. Amataqmi falso testigo kanaykipaqqa mana allin runakunawanqa tanteanakunkichu.

²Mana allin ruwaqkunataqa achkallaña kaptinkupas amam qatinkichu; testigo kaspaykipas ama pimanpas sayapakuspam cheqap kaqllata rimanki, llulla rimaqmanqa achkallaña kaptinkupas amam sayapakunkichu;

³wakchaña kaptinpas amam sayapakunkichu.

⁴Enemigoykipa chinkaq toronta otaq asnontapas tarispaykiqa kutichipunkim.

⁵Cheqnisuqnikipa cargayuq asnon llasaywan urmaruqta rikuspaykiqa amam qawayllaqa qawankichu aswanqa sayarichiypim yanapaykunki.

⁶Wakcha runa quejapi kaptinqa allin arreglotam ruwaykunki.

⁷Llullakuspa yanqamanta tumpakuqmanqa amam hukllawakunkichu, amataqmi mana huchayuq runataqa wañuyman sentenciankichu. Huchayuqtaqa castigasaqpunim.

⁸Amam sayniyutaqa chaskikunkichu, sayniyuqa allin ruwaqkunatapas pantachinmi, allin ruwaq runakunapa cheqap rimasqantapas qewirunmi.

⁹Huklaw llaqtayuq runataqa amam ñakarichinkichu, qamkunapas yachankichikmi imaynam runapa llaqtanpi vida pasaytaqa. Qamkunapas huklaw llaqtayuq hinam Egipto nacionpi karqankichik.

¹⁰Soqta watam chakraykipi tarpuspa cosechanki,

¹¹qanchis watapiñataqmi samachinki, chaynataqa ruwanki llaqtaykipi wakchakuna pallapakuspan mikunankupaqmi, puchuqnin kaqtañataqmi purun animalkuna mikunqa; chaynallatam ruwanki uvas chakraykiwan chaynataq aceitunas chakraykiwanpas.

¹²Soqta punchawmi ruwaynikita ruwanki, qanchis kaq punchawpiñataqmi samanki, chaynapi toroykipas asnoykipas samananpaq. Chaynataq criadoykipas, wasikipi samapakuqpas kallpata hapinanpaq.

¹³Chaynaqa, tukuy nisqaykunatayá kasukuychik. Amam mañakunkichikchu nitaqmi rimankichikpaschu sapaq dioskunapa sutintaqa.

¹⁴Watapim kimsa kutita hatun fiestata ruwapuwankichik.

¹⁵Mana levadurayuq Tanta fiestatam ruwanki. Kamachisqayman hinam qanchis punchawpuni mana levadurayuq tantata mikunki. Chay fiestataqa Abib killapim ruwanki, chay killapim Egipto nacionmanta lloqsimurqanki. Mana imayuqqa amam pipas ñawpaqniyman asuykamunqachu.

¹⁶ Cosecha qallariy fiestatapas chaynataq cosecha tukuy fiestatapas ruwankim, chaytaqa sapa watam cosecha tukuyta ruwanki.

¹⁷Watapim kimsa kutita llapallan qarikuna ñoqa Tayta Diosman asuykamuwanqaku.

¹⁸Animalta sacrificaspaykiqa, amam yawarninta levadurayuq tantatawan kuskataqa ofrecewankichu, amataqmi paqarinnintin punchawkamaqa wirantapas puchuchinkichu.

¹⁹ Chakrapi tarpusqaykipa punta kaq allinnin ruruntam ñoqa Tayta Diospa wasiyman apamunki. Uña cabrachataqa amam mamanpa lechenpiqa yanunkichu.

²⁰Ñoqam ñawpaqnikita angelniyta kachani, risqaykipi waqaychasunaykipaq chaynapi allichapusqay sitioman chayachisunaykipaq.

²¹Paypa nisqanta uyarispa kasukuy hinaspa ama contranpiqa hatariychu; payqa ñoqapa rantiypim kachkan, mana kasukuptikichikqa manam pampachasunkichikchu.

²²Nisqanta uyarispayki tukuy kamachisqayta kasukuptikim ichaqa enemigoykikunapa enemigon kaspay paykunata ñakarichisaq.

²³Angelniymi puntaykita rispa amorreokunapa, heteokunapa, ferezeokunapa, cananeokunapa, hititakunapa hinaspa jebuseokunapa kasqanman pusasunki. Paykunataqa ñoqam puchukachisaq.

²⁴Paykunapa idolonkunapa ñawpaqninpiqa amam qonqorakunkichu nitaqmi yupaychankichu. Paykunapa ruwasqanta hinaqa amam qatipakunkichu, aswanqa ñutuspaykim lliwta puchukachinki.

²⁵Ñoqa Tayta Diosllatam yupaychawankichikqa, hinaptinmi mikunaykitawan yaku tomanaykita bendecisaq. Onqoykunatapas ñoqam qanmanta wischusaq.

²⁶Llaqtaykipiqa warmikunapas manam malparinqachu nitaqmi qolluqpas kanqachu, unaytam kawsachisqayki.

²⁷Ñawpaqnikitam manchakuyta kachasaq, yaykusqayki llaqtakunapi runakunatam sustocharusaq. Enemigoykikunapas manchakuymantam ñawpaqnikipi ayqenqaku.

²⁸Qampa ñawpaqnikitam wayliskunata kachasaq, chaynapim heveokunata, cananeokunata hinaspa heteokunata ñawpaqnikimanta wischusaq.

²⁹Manam huk watallapichu ñawpaqnikimantaqa wischusaq, watallapi qarqoruptiyqa allpam chunnirunman hinaptinmi purun animalkuna miraruspan dañota ruwasunkichikman.

³⁰Miranaykikamam chay runakunataqa as-asllamanta ñawpaqnikimanta wischusaq, hinaptinmi chay allpaqa qamkunapaqña kanqa.

³¹Qanman qosqay nacionpa linderonmi kanqa Puka lamar qochamanta qallarispa filisteokunapa lamar qochankama chaynataq chunniqmanta qallarispa Eufrates mayukama. Chay nacionpi runakunatam makikiman churani qayllaykimanta wischunaykichikpaq.

³²Paykunawanpas, idolonkuwanpas amam ima contratotapas ruwankichu.

³³Amam allpaykipipas yachanqakuchu, yanqañataq idolonkuta yupaychaspayki contraypi huchallikuwaq. Chayqa pantaymanmi aparusunkiman.