Read Biblia Revisión Chuya Qellqa 1992 – Chuya Qellqa 1992 Éxodo 25 Bible Online

Éxodo 25 - Biblia Revisión Chuya Qellqa 1992 – Chuya Qellqa 1992 bible

Éxodo 25

¹Moisestam Tayta Dios nirqa:

²Ofrendakunata apamuwanankupaq Israelpa mirayninkunata niy. Haykam voluntadwan chaynataq sonqomanta apamusqankutam chaskinkichik.

³Paykunamantam kaykunata chaskinkichik: Qorita, qollqeta, bronceta,

⁴morado qaytuta, grosella qaytuta, guindo qaytuta, linomanta llañu qaytuta, cabrakunapa pelonta,

⁵carneropa pukaman teñisqa qalasninkunata, fino qalaskunata, acacia sutiyuq qerukunata,

⁶achkikunapaq aceiteta, Diospaq sapaqchaspa tallina aceitepaq miski asnaq qorakunata, kañanapaq inciensota,

⁷[14]efodpaq hinaspa [15]pectoralpaq ónice rumita chaynataq cornalina rumikunatapas.

⁸Hinaspam huk santuariota ruwapuwanki qamkuna ukupi yachanaypaq.

⁹Yachanay santuariotawan chaypi llapallan serviciokunataqa ñoqapa qawachisqayman hinam ruwanki.

¹⁰Huk Arcatapas acacia sutiyuq tablamantam ruwanki. Largonmi kanqa huk metro masnin, anchonñataqmi kanqa parte metro masnin, sayayninñataqmi kanqa parte metro masnin.

¹¹Chay Arcapa ukuntawan hawantam qoriwan llusinki hinaspam patanpa muyuriqninpipas qorimanta moldurata churanki.

¹²Qorita chulluchispam Arcapaq tawa anillokunata ruwanki, hinaspam tawan esquinanman churanki, kaylaw-waklaw waqtanmanmi iskaytakama churanki.

¹³Varillankunatapas acacia kaspimanta ruwaspam qoriwan llusinki.

¹⁴Chay varillakunatam Arcapa waqtanpi anillokunaman ustuchinki, chaykunawan Arcata apanankupaq.

¹⁵Chay varillakunaqa Arcapa anillonkunamanta mana hurqonam kanqa.

¹⁶Chay Arcapim waqaychanki chunkantin kamachikuykuna qosqayta.

¹⁷Chay Arcapaqmi huk [16]tapata qorimanta ruwanki, largonmi kanqa huk metro masnin, anchonñataqmi parte metro masnin.

¹⁸Ruwankitaqmi qorimanta iskay [17]querubinkunatapas, chaytaqa ruwanki martillowan llaqllaspam, hinaspam chay tapapa iskaynin law patanpi churanki.

¹⁹Chay tapawan iskaynin querubinkunaqa huk piezallamanta ruwasqam kanqa. Huknin querubinmi kaylaw patanpi kanqa, hukninñataqmi waklaw patanpi.

²⁰Chay querubinkunapa raprankunam llantuchkaq hina tapapa hawanman kichasqa kanqa, uyankuñataqmi kumuykuspa tapata qawanqaku.

²¹Chay tapatam Arcapa hawanman churanki; Arcamanñataqmi ñoqapa qosqay chunkantin kamachikuykunata churanki.

²²Chaypim qanman rikurisqayki, hinaspam chay tapapa hawanmanta, pacto ruwasqay Arcapa hawanpi kaq querubinkunapa chawpinmanta rimapayasqayki; chaypim Israelpa mirayninkunapaq kamachikuykunata willasqayki.

²³Huk mesatapas acacia sutiyuq tablamantam ruwanki, largonmi kanqa huk metro, anchonmi kanqa yaqa parte metro, sayayninñataqmi kanqa parte metro masnin.

²⁴Chay mesatam qoriwan llusichinki, muyuriqninpiñataqmi qorimanta moldurata churanki.

²⁵Ruwankitaqmi mesapa muyuriqninpi adornotapas media cuarta masninta, chay adornopa muyuriqninpim qorimanta moldurata churanki.

²⁶Ruwankitaqmi qorimanta tawa anillokunatapas, chaykunataqa mesapa tawan chakinpa waqtankunapim churanki.

²⁷Chay anillokunam churasqa kanqa moldurapa urayninpi, chayman varillakunata ustuchispa mesata apanankupaq.

²⁸Chay varillakunataqa acacia sutiyuq kaspimantam ruwanki, hinaspam qoriwan llusichinki, chaykunawanmi mesata apanqaku.

²⁹Ruwankitaqmi mesapa platonkunatapas, wisllankunatapas, aysakunkunatapas hinaspa vino ofrenda tallinapaq tazankunatapas; chaykunataqa qorimantam ruwanki.

³⁰Chay mesamanmi mana pisiyta ñoqapaq sapaqchasqaykichik tantata churanki.

³¹Huk candelabrotam martillowan llaqllaspa qorimanta ruwanki; tiyananpas, tronconpas, copankunapas hinaspa umpankunawan waytankunapas huk piezallamanta ruwasqam kanqa.

³²Chay candelabropa waqtankunamantam soqta kallmakuna lloqsinqa, huknin waqtanmantam kimsa kallma lloqsinqa, kimsañataqmi huknin waqtanmanta.

³³Chay candelabropa tronconmanta lloqsiq soqtantin kallmankunapim sapakamapi kimsa copakuna kanqa, chay copakunapa rikchayninqa almendras wayta hinam kanqa, sapakamam umpayuq hinaspa waytayuq kanqa.

³⁴Candelabropa tronconpipas tawa copakunam kanqa, chay copakunapa rikchayninqa almendras wayta hinam kanqa, chaykunaqa sapakamam umpayuqkama hinaspa waytayuqkama kanqa.

³⁵Chay candelabropa kimsa pares kallmakunapa qallariyninpim sapakamapaq huk umpa kanqa, chay umpakunam hapinqa chay soqtantin kallmakunata.

³⁶Umpankunawan kallmankunapas chulla piezallamantam kanqa, martillowan llaqllasqa qorimanta.

³⁷Ruwankitaqmi qanchis mecherokunatapas, chaykunatam ñawpaqman achkinanpaq churanki.

³⁸Mecha limpianakunatapas chaynataq platochankunatapas qorimantam ruwanki.

³⁹Candelabrotawan servicionkunataqa kimsa chunka kimsayuq kilo qorimantam ruwanki.

⁴⁰Chaykunataqa ruwanki Sinaí orqopi qawachisqayman hinam.