Read Biblia Revisión Chuya Qellqa 1992 – Chuya Qellqa 1992 Éxodo 26 Bible Online

Éxodo 26 - Biblia Revisión Chuya Qellqa 1992 – Chuya Qellqa 1992 bible

Éxodo 26

¹Huk [18]carpatam chunka cortinakunamanta ruwanki, chay cortinakunam kanqa kawpusqa linomanta chaynataq morado, grosella hinaspa guindo qaytumanta. Chay cortinapim iskay querubinkunata suma-sumaqta bordachinki.

²Sapa cortinapa largonmi kanqa chunka iskayniyuq metro parten, anchonñataqmi kanqa iskay metro. Llapan cortinakunam chayna sayayniyuqkamalla kanqa.

³Pichqa cortinakunatam sapakamata tinkispa siranki, chaynallatam wakin pichqa cortinakunatapas siranki.

⁴Hinaspam cordonmanta ojalkunata chay tinkisqa cortinakunapa patanpi churanki, chay ojalqa kanqa morado qaytumantam, chaynallatam wakin cortinakunapipas churanki.

⁵Ruwankitaqmi pichqa chunka ojalkunatapas, chaykunatam churanki tinkispa sirasqayki punta kaq cortinapa patanpi, chaynallatam qepata tinkispa sirasqayki cortinawanpas ruwanki; chay ojalkunaqa chimpa-chimpam kanqa.

⁶Ruwankitaqmi qorimanta pichqa chunka corchetekunatapas, chaykunawanmi punta kaq tinkinasqayki cortinata qepata tinkinasqayki cortinaman hukllawanki, hinaptinmi chay cortinakuna hukllaña kanqa.

⁷Ruwankitaqmi cabrakunapa pelonmanta chunka hukniyuq cortinakunatapas, chaykunam chay carpapa qatan kanqa.

⁸Chay cortinakunapa largonmi kanqa chunka kimsayuq metro parten, anchonñataqmi iskay metro kanqa.

⁹Pichqa cortinatam tinkinaspa siranki, puchuq soqta cortinakunatapas tinkinaspam chaynallata siranki; hinaspam qepa kaq sirasqayki cortinapa masyaqninta carpapa ñawpaqnin law patanman pataraykunki.

¹⁰Ruwankitaqmi pichqa chunka ojalkunatapas, hinaspam pichqata tinkinaspa puntata sirasqayki cortinakunapa patanpi churanki, chaynallatam ruwanki soqtata tinkinaspa sirasqayki cortinawanpas.

¹¹Ruwankitaqmi broncemanta pichqa chunka corchetekunatapas, chaykunawanmi ojalkunata hapichinki, chaymi iskaynin hukllaña kanqa.

¹²Carpapa cortinankunaqa hatun kasqanraykum puchuqnin carpapa qepan lawman warkurayanqa;

¹³carpapa alleq lawninmanmi parte metro warkurayanqa, ichoq lawninmanñataqmi parte metrotaq warkurayanqa, chaynapim chay carpata iskaynin lawta tapanqa.

¹⁴Ruwankitaqmi carneropa qalasninmanta pukaman teñisqa qatatapas, chaypa hawanpaqpas fino qalaskunamantam huk qatata ruwanki.

¹⁵Chay carpapaqmi acacia sutiyuq derecho tablakunamanta sayaq marconkunata ruwanki.

¹⁶Sapa marcopa largonmi tawa metro parten kanqa, anchonñataqmi parte metro masnin kanqa.

¹⁷Marcopura tupanachisqa kananpaqmi, sapa marcopa iskay espigankuna kanqa. Chaynatam ruwanki carpapa llapallan marconkunapi.

¹⁸Iskay chunka marcokunatam ruwanki carpapa sur lawninpaq.

¹⁹Ruwankitaqmi qollqemanta toqoyuq tawa chunka tiyanakunatapas, iskay toqom huknin marcopa iskay espigankunapaq kanqa, iskay toqoñataqmi huknin marcopa iskay espigankunapaq kanqa.

²⁰Chay carpapa norte lawninpaqpas iskay chunka marcokunatam ruwanki.

²¹Chay marcokunapaqpas qollqemantam tawa chunka tiyanankunata ruwanki iskay toqoyuqtakama, sapa marco iskay toqopi tiyananpaq.

²²Carpapa qepa lawninpaqmi otaq intipa seqaykunan lawninpaqmi soqta tablakunata ruwanki.

²³Carpapa qepa law esquinankunapaqñataqmi iskay tablakunata ruwanki.

²⁴Chay tablakunam huklla kananpaq pampanmanta alton puntankama huk anillowan tinkinasqa kanqa. Chaynallatam iskay tablakunawanpas ruwanki hinaspam iskaynin esquinakunaman churanki.

²⁵Chay pusaq tablakunam qollqemanta chunka soqtayuq toqokunapi tiyanqa, iskay toqom sapa tabla tiyananpaq kanqa.

²⁶Carpapa waklaw waqtanpi tablakunapaqmi pichqa listonkunata ruwanki, chay listonkunaqa acacia sachamantam kanqa.

²⁷Kaylaw waqtanpi tablakunapaqpas chayna pichqa listonkunatam ruwanki, hina chayna pichqa listonkunatataqmi qepa lawninpi otaq intipa seqaykunan lawninpi tablankunapaqpas ruwanki.

²⁸Chawpipi kaq listonmi tablakunapa chawpinta pasanqa kaylaw patanmanta waklaw patankama.

²⁹Chay tablakunatam qoriwan llusinki, hinaspam qorimanta anillonkunata ruwanki, chayninta qerukuna pasananpaq, listonkunatapas qoriwanmi llusinki.

³⁰Carpataqa sayachinki imaynam Sinaí orqopi qawachisqayman hinam.

³¹Ruwankitaqmi huk [19]velotapas, chaytaqa ruwanki morado qaytumanta, grosella qaytumanta hinaspa kawpusqa lino qaytumantam, hinaspam iskay querubinkunata bordachinki.

³²Chay velotam warkunki acacia kaspimanta qoriwan llusisqa tawa pilarkunaman. Chay pilarkunaqa qorimanta ganchoyuqmi kanqa, sayanqakuñataqmi qollqemanta toqoyuq tawa tiyanakunapi.

³³Chay velotam ganchokunaman warkunki, hinaspam chay velopa qepanman chunkantin kamachikuyniy waqaychana Arcata apaykunki. Chaynapim chay veloqa “Chuya” sutiyuq lugarmanta “Chuyay-chuyay” sutiyuq lugarta rakinanqa.

³⁴Chunkantin kamachikuyniy waqaychana Arcapa hawanmanmi tapata churanki, chaytaqa “Chuyay-chuyay” sutiyuq lugarpim churanki.

³⁵Chay velopa ñawpaqninpim otaq “Chuya” sutiyuq lugarpa norte lawninpim mesata churanki, sur lawninpiñataqmi Candelabrota churanki; chaynapim mesawan candelabro chimpa-chimpa kanqaku.

³⁶Carpapa punkunpaqñataqmi suma-sumaq bordasqa telamanta ruwanki; chay telataqa ruwanki morado, grosella, guindo qaytumantam hinaspa kawpusqa linomantam.

³⁷Chay telapaqmi acacia qerumanta pichqa pilarkunata ruwanki, chaykunaqa qoriwan llusisqam kanqa hinaspa qorimanta ganchoyuqmi kanqa, chay pilarkuna tiyananpaqmi bronceta chulluchispa pichqa toqoyuq tiyanakunata ruwanki.