Read Biblia Revisión Chuya Qellqa 1992 – Chuya Qellqa 1992 Éxodo 31 Bible Online

Éxodo 31 - Biblia Revisión Chuya Qellqa 1992 – Chuya Qellqa 1992 bible

Éxodo 31

¹Moisestam Tayta Dios nirqa:

²Judá ayllumantam Hurpa willkan hinaspa Uripa churin Bezaleelta akllani.

³Bezaleeltam espirituywan huntaykuni chaynapi yachaywan, yuyaywan, allinta tanteaspa tukuy imata ruwananpaq,

⁴dibujokunata umanmanta hurqospa qoripipas, qollqepipas hinaspa broncepipas llamkananpaq.

⁵Paytam churani alhaja rumikunata labraspa chaynataq tablakunata llaqllaspa tukuy rikchaq sumaq obrakunata ruwananpaq.

⁶Bezaleelta yanapananpaqmi Dan ayllumanta kaq Ahisamacpa churin Aholiab sutiyuq runata qoni. Llapallan maestrokunamanmi yachayta qoni, chaynapi qanman tukuy kamachisqayta ruwanankupaq.

⁷Paykunam ruwanqaku ñoqaman asuykuna carpata, pacto ruwasqay Arcata, Arcapa tapanta, carpapa llapallan servicionkunata,

⁸mesata, mesapa servicionkunata, qorimanta candelabrota servicionkunatawan, incienso altarta,

⁹kañana altarta servicionkunatawan, lavatoriota tiyanantinta,

¹⁰ñoqata serviwananpaq sacerdote Aaronpa chuya pachankunata, sacerdoteykuna kanankupaq churinkunapa pachankunata,

¹¹ñoqallapaqña sapaqchanapaq tallina aceiteta, “Chuya” lugarpaq miski asnaq inciensotapas. Chaykunataqa ruwanqaku qanman kamachisqayman hinam, nispa.

¹²Moisestam Tayta Dios nirqa:

¹³Israelpa mirayninkunata kaynata nimuy: Samana punchawniykunapiqa samankichikpunim, chaymi qamkunapaqpas chaynataq miraynikichikkunapaqpas señal kanqa ñoqa Tayta Diosllapaqña sapaqchasqa kasqaykichikmanta.

¹⁴Samana punchawpiqa samankichikpunim, chay punchawqa ñoqallapaqña sapaqchanaykichik punchawmi kanqa, pipas chay punchawpi mana samaqqa wañunqapunim. Pipas chay punchawpi imapas ruwaqqa ayllunmanta chinkachisqam kanqa.

¹⁵Soqta punchawmi llamkankichik, qanchis kaq punchawpiñataqmi samankichik, chay punchawqa ñoqapaq sapaqchasqa kasqanraykum pipas chay punchawpi llamkaqqa wañunqapuni.

¹⁶Llapallan Israelpa mirayninkunam samana punchawpiqa samanqaku, chaymi miraynikichikkunawanpas wiñaypaq pactoy kanqa.

¹⁷Ñoqa Tayta Diosmi soqta punchawpi cielokunatawan kay pachata ruwarqani, qanchis kaq punchawpiñataqmi ruwanayta tukuspay samarqani. Chaymi ñoqawan Israelpa mirayninkunapaq wiñaypaq señal kanqa.

¹⁸Sinaí orqopi Tayta Dios rimayta tukuruspanmi Moisesman iskay tabla rumikunapi chunkantin kamachikuyta qoykurqa, chaykunaqa Diospa dedonwan qellqasqam karqa.