Read Biblia Revisión Chuya Qellqa 1992 – Chuya Qellqa 1992 Éxodo 33 Bible Online

Éxodo 33 - Biblia Revisión Chuya Qellqa 1992 – Chuya Qellqa 1992 bible

Éxodo 33

¹ Moisestam Tayta Dios nirqa: “Egiptomanta hurqomusqayki runakunawan prometesqay allpaman riychik, chay allpataqa juraspam prometerqani Abrahampa, Isaacpa hinaspa Jacobpa mirayninkunaman qonaypaq.

²Angelniytam kachamusaq ñawpaqnikita rispa cananeokunata, amorreokunata, heteokunata, ferezeokunata, heveokunata hinaspa jebuseokunata wischunanpaq.

³Llapa imakunapa kanan chaynataq lliw kawsaykunapa qespinan allpaman riychik. Ñoqam ichaqa manaña qamkunawan riymanñachu, yanqam rumi sonqo kasqaykichikrayku risqaykichikpi wañurachikichikman”, nispa.

⁴Chay mana allin noticiata uyariruspankum llapa runakuna alhajankutapas hurqokuspanku llakisqallaña karqaku.

⁵Tayta Diosmi Moisesta nirqa, Israelpa mirayninkunata kaynata ninanpaq: Qamkunaqa rumi sonqo runakunam kankichik, chawpikichikman qonqayta chayaramuspayqa wañurachikichikmanmi. Kunanyá alhajaykichikkunata hurqokuychik, chayñam yachasaq qamkunawan imam ruwanaytapas, nispa.

⁶Chayraykum Israelpa mirayninkunaqa Horeb orqomantapuni alhajanku churakuyta saqerurqaku.

⁷Moisesmi carpata campamentomanta karupi sayachirqa, hinaspam “Diosman asuykuna carpa” nispa suticharqa. Chaymi pipas Tayta Diosta maskay munaqqa campamentopa hawa lawninpi Diosman Asuykuna carpaman riq.

⁸Diosman asuykuna carpaman Moisés riptinmi lliw runakunañataq carpankupa punkunpi sayarqaku. Carpaman yaykunankamam Moisesta qawarqaku.

⁹Carpaman Moisés yaykuptinmi sayanpa puyu uraykamuspan carpapa punkunpi sayaykuq, chaynapim Moiseswan Tayta Dios rimaq.

¹⁰Carpapa punkunpi sayaq puyuta qawaspankum llapa runakuna hatariqku, hinaspam sapakama carpankupa punkunpi qonqorakuykuspa yupaychaqku.

¹¹Tayta Diosqa lado-ladollam Moiseswan rimaq, imaynam pipas runamasinwan rimachkaq hina. Chaymantam Moisés campamentoman kutiq. Yanapaqnin Nunpa churin joven Josueymi ichaqa carpamanta mana asuriqchu.

¹²Moisesmi Tayta Diosta nirqa: Qanmi niwachkanki: “Kay runakunata pusay”, nispa; ichaqa manam reqsichiwankichu pim ñoqawan rinantapas. Qamqa niwankitaqmi allinta reqsiwaspayki kuyapayawasqaykitapas.

¹³Chayna kaptinqa mañakuykim munasqaykita yachachiwanaykipaq, chaynapi qamta reqsinaypaq hinaspa yanapakuynikita tarinaypaq. Amayá qonqaychu kay runakunaqa qampa runaykikuna kasqanta, nispa.

¹⁴Chaymi Dios nirqa: Ñoqam qanwan risaq hinaspam samachisqayki, nispa.

¹⁵Hinaptinmi Moisés nirqa: Kikiki ñoqaykuwan mana rispaykiqa amayá kaymanta hurqowaykuchu.

¹⁶Ñoqaykuwan mana riptikiqa ¿imaynataq yachasaqku llaqtaykita chaynataq ñoqatapas yanapawasqaykikutaqa? ¿Imapitaq ñoqapas hinaspa runaykikunapas kay pachapi runakunamanta rakisqa kasaqku? nispa.

¹⁷Chaymi Tayta Dios nirqa: Kay nisqaykitapas ruwasaqmi, favorniy qanwan kasqanraykum ñoqaqa sumaqta reqsiki, nispa.

¹⁸Hinaptinmi Moisés nirqa: Kanchariq kaynikita qawaykachiway, nispa.

¹⁹Chaymi Tayta Dios nirqa: “Lliw kuyakuyniytawan allin kayniytam qawachisqayki, ñawpaqnikipim sutiyta rimasaq. Ñoqaqa kuyapayay munasqaytam kuyapayasaq, hinaspam llakipayay munasqayta llakipayasaq.

²⁰Uyaytam ichaqa mana rikuwankichu, pipas rikuwaqniy runaqa manam kawsanmanchu”, nispa.

²¹Huktawanmi Tayta Dios nirqa: Kay waqtaypi lugarta qaway, kay hatun rumipa hawanpi sayay

²²kanchayniy ñawpaqnikita pasanankama, hinaptinmi hatun rumipa raqranman churasqayki, hinaspam pasarunaykama makiywan pakasqayki.

²³Hinaptinmi makiyta suchuriykachiptiy wasayta rikunki, uyaytam ichaqa mana rikunkichu, nispa.