Read Biblia Revisión Chuya Qellqa 1992 – Chuya Qellqa 1992 Éxodo 35 Bible Online

Éxodo 35 - Biblia Revisión Chuya Qellqa 1992 – Chuya Qellqa 1992 bible

Éxodo 35

¹Israelpa llapallan mirayninkunata huñuruspanmi Moisés nirqa: Qamkuna ruwanaykichikpaqmi Tayta Dios kamachiwarqa kaykunata:

²“Soqta punchawmi tukuy ruwayta ruwankichik, qanchis kaq punchawñataqmi ñoqapaq sapaqchaspa samankichik, pipas chay punchawpi llamkaqqa wañunqapunim.

³Maypiña yachaspapas, samana punchawpiqa amam ninallatapas ratachinkichikchu”, nispa.

⁴Moisesmi Israelpa mirayninkunata huñuykuspa Tayta Diospa kamachisqanta kaynata nirqa:

⁵Tayta Diospaq ofrendata huñuychik, tukuy sonqomantam Señorpaq apamunkichik: Qorita, qollqeta, bronceta,

⁶morado qaytuta, grosella qaytuta, guindo qaytuta, linomanta llañu qaytuta, cabrakunapa pelonta,

⁷carnerokunapa pukaman teñisqa qalasninta, fino qalaskunata, acacia qerukunata,

⁸achkikunapaq aceiteta, Diospaq sapaqchaspa tallinapaq kaq aceitepaqwan miski asnaq inciensopaq miski asnaqkunata,

⁹ónice alhaja rumikunata hinaspa efodmanwan pectoralman laqanapaq alhaja rumikunata.

¹⁰Qamkunamantam yachayniyuq maestrokuna hamunqa, hinaspam ñoqa Tayta Diospa tukuy kaykuna kamachisqayta ruwanqa:

¹¹Yachanay carpapa qatanta, corchetenkunata, tablankunata, qerunkunata, pilarninkunata, toqoyuq tiyanankunata,

¹²Arcata, Arcapa varillankunata, Arcapa tapanta, “Chuyay-chuyay” lugarmanta “Chuya” lugarta rakinaq velota,

¹³mesata, mesapa varillankunata llapallan servicionkunatawan chaynataq Diospa tantantapas,

¹⁴achkipaq candelabrota, servicionkunata, mecheronkunata hinaspa achkipaq aceitetapas,

¹⁵incienso kañana altarta varillankunatawan, Diospaq sapaqchaspa tallinapaq kaq aceiteta, miski asnaq inciensota chaynataq carpapa punkunpaq cortinatapas;

¹⁶broncemanta kañana altartawan rejillasninkunata, varillankunata llapallan servicionkunatawan; lavatoriotapas tiyanantinta,

¹⁷patiopa cortinankunata, pilarninkunata, toqoyuq tiyanankunata, patiopa punkunpa cortinankunata;

¹⁸yachanay carpapa estacankunata, patiopa muyuriqninpi estacakunata, waskankunata;

¹⁹“Chuya” lugarpi servikunanpaq awasqa pachakunata otaq sacerdote Aaronpa Tayta Diosta servinan pachankunata hinaspa sacerdote kanankupaq churinkunapa pachankunatapas, nispa.

²⁰Israelpa mirayninkunam Moisespa qayllanmanta lloqsirqaku.

²¹Chaymantam tukuy sonqomanta Tayta Diosman ofrenda qoqkuna ofrendankuta apamurqaku, chaynapi Diosman asuykuna carpata, tukuy servicionkunata hinaspa Diosta servina pachakunata ruwanankupaq.

²²Qarikuna warmikuna hamuspankum sonqomanta apamurqaku tipakunata, aretekunata, sortijakunata, brazaletekunata chaynataq qorimanta tukuy rikchaq alhajakunatapas. Sapakamam apamurqaku Tayta Diosman ofrecekusqanku qori ofrendankuta.

²³Chaynallataqmi morado qaytuyuqkunapas, grosella qaytuyuqkunapas, guindo qaytuyuqkunapas, llañu lino qaytuyuqkunapas, cabra peloyuqkunapas, carneropa qaran pukaman teñisqa qalasniyuqkunapas, chay qaytunkutawan qalasninkuta apamurqaku.

²⁴Pipas qollqemanta otaq broncemanta ofrecekuqqa Tayta Diosmanmi apamurqaku; acacia qeruyuqkunapas obrapi servikunanpaqmi apamurqaku.

²⁵Allin yachayniyuq warmikunamantapas haykam puchkay yachaqkunam puchkasqankumanta morado qaytuta, grosella qaytuta, guindo qaytuta hinaspa llañu lino qaytuta apamurqaku.

²⁶Haykam sonqonkupi ruway munaq warmikunaqa cabra pelotam puchkarqaku.

²⁷Kamachikuqkunapas ónice rumikunatam apamurqaku, apamurqakutaqmi efodmanwan pectoralman laqanapaq alhaja rumikunatapas,

²⁸achkipaq aceitetapas. Diospaq sapaqchaspa tallinapaq kaq aceitepaqwan miski asnaq inciensopaqpas miski asnaqkunatam apamurqaku.

²⁹Israelpa mirayninkunam, qaripas warmipas tukuy sonqonkumanta llapa imata apamurqaku, Moisesta Tayta Diospa kamachisqanman hina ruwanankupaq. Tayta Diosmami Tukuy sonqomanta ofrendankuta apamurqaku.

³⁰Israelpa mirayninkunatam Moisés nirqa: Tayta Diosmi Judá ayllumanta Hurpa willkan hinaspa Uripa churin Bezaleelta akllaykun.

³¹Tayta Diosmi espiritunwan Bezaleelta huntaykun chaynapi allin yachaywan, yuyaywan chaynataq allinta tanteaspa tukuy imata ruwananpaq,

³²dibujokunata umanmanta hurqospa qoripi, qollqepi hinaspa broncepi llamkaspa tukuy imata ruwananpaq.

³³Paytam churarqa alhaja rumikunata labraspa chaynataq tablakunata llaqllaspa tukuy rikchaq sumaq trabajokunata ruwananpaq.

³⁴Tayta Diosmi Bezaleelman chaynataq Dan ayllumanta kaq Ahisamacpa churin Aholiabmanpas yachayta qoykun yachachinankupaq.

³⁵Paykunamanmi yachayta huntaykurqa, chaynapi tukuy rikchaq ruwaykunata ruwanankupaq, dibujokunatapas umankumanta hurqonankupaq hinaspa morado qaytumanta, grosella qaytumanta, guindo qaytumanta, llañu lino qaytumanta bordanankupaq chaynataq tukuy rikchaq fino trabajokunatapas ruwanankupaq.