Read Biblia Revisión Chuya Qellqa 1992 – Chuya Qellqa 1992 Éxodo 37 Bible Online

Éxodo 37 - Biblia Revisión Chuya Qellqa 1992 – Chuya Qellqa 1992 bible

Éxodo 37

¹Bezaleelmi acacia tablamanta huk arcata ruwarqa, largonmi karqa huk metro masnin, anchonñataqmi parte metro masnin, sayayninpas parte metro masninmi karqa.

²Hawantawan ukuntam qoriwan llusirqa, hinaspam muyuriqninpipas qorimanta moldurata churarqa.

³Qorita chulluchispam tawa anillokunata ruwarqa, chaykunatam tawan esquinapa waqtanman kaylawman waklawman iskaytakama churarqa.

⁴Ruwarqataqmi acacia kaspimanta varillakunatapas, chaykunatam qoriwan llusirqa.

⁵Chay varillakunatam arcapa waqtanpi anillokunaman ustuchirqa, chaykunawan arcata apanankupaq.

⁶Arcapa tapantapas qorimantam ruwarqa. Chay tapapa largonmi huk metro masnin karqa, anchonñataqmi parte metro masnin.

⁷Tapapa hawanpim iskaynin lawpi qorimanta iskay querubinkunata ruwarqa.

⁸Chay tapawan iskaynin querubinkunaqa huk piezallamanta ruwasqam karqa, huknin querubinmi kaylaw patanpi karqa, hukninñataqmi waklaw patanpi.

⁹Chay querubinkunapa raprankunam llantuchkaq hina tapapa hawanman kichasqa karqa, uyankunañataqmi kumuykuspa tapata qawarqaku.

¹⁰Bezaleelmi huk mesata acacia tablamanta ruwarqa, largonmi karqa huk metro, anchonñataqmi yaqa parte metro, sayayninñataqmi parte metro masnin karqa.

¹¹Chay mesatam qoriwan llusirqa, muyuriqninpiñataqmi qorimanta moldurata churarqa.

¹²Ruwarqataqmi mesapa muyuriqninpi adornotapas media cuarta masninta, chay adornopa muyuriqninpiñataqmi qorimanta moldurata churarqa.

¹³Ruwarqataqmi qorimanta tawa anillokunatapas, chaykunatam mesapa chakinpa waqtankunapi churarqa.

¹⁴Chay anillokunaqa churasqa karqa moldurapa urayninpim, chayman varillakunata ustuchispa mesata apanankupaq.

¹⁵Chay varillakunatam acacia kaspimanta ruwaspa qoriwan llusirqa.

¹⁶Mesapa hawanpi kaq servicionkunatapas, platonkunatapas, wisllankunatapas, aysakukunatapas hinaspa vino ofrenda tallinapaq tazonkunatapas lliwtam qorimanta ruwarqa.

¹⁷Bezaleelqa ruwarqataqmi martillowan labraspa qorimanta candelabrotapas, tiyananpas, sayaq chakintapas, copankunapas hinaspa umpanwan waytankunapas huk piezallamantam ruwarqa.

¹⁸Chay candelabropa waqtankunamantam soqta kallmakuna lloqsirqa, kaylaw waqtanmantam kimsa, waklaw waqtanmantañataq kimsa.

¹⁹Chay candelabropa tronconmanta lloqsiq soqta kallmakunapim sapakamapi kimsa copakuna karqa, chay copakunataqa ruwarqa almendras waytaman rikchakuqtam, sapakamam umpayuq hinaspa waytayuq karqa.

²⁰Candelabropa tronconpipas tawa copakunatam almendras waytaman rikchakuqta ruwarqa, chaykunataqa umpayuqtakama hinaspa waytayuqtakamam ruwarqa.

²¹Chay candelabropa kimsa pares kallmakunapa qallariyninpim sapakamapaq huk umpata ruwarqa, chay umpakunam hapirqa chay soqtantin kallmakunata.

²²Qorimantam umpakunatapas kallmakunatapas chulla piezallamanta martillowan labraspa ruwarqa.

²³Ruwarqataqmi qanchis mecherokunatapas, mecha limpianankunatapas chaynataq mecha limpianapaq platochankunatapas; chaykunapas qorimantam karqa.

²⁴Candelabrotawan servicionkunatam kimsa chunka kimsayuq kilo qorimanta ruwarqa.

²⁵Bezaleelqa incienso kañanapaq altartapas acacia tablamantam ruwarqa. Chay altarqa cuadradom karqa, tawan lawninmi yaqa parte metrokama karqa, sayayninñataqmi yaqa huk metro. Altartapas tawan waqrachankunatapas huk piezallamantam ruwarqa.

²⁶Hawantapas, muyuriqnin waqtankunatapas hinaspa waqrachankunatapas qoriwanmi llusirqa, muyuriqninpiñataqmi qorimanta moldurata churarqa.

²⁷Tawa anillokunatapas qorimanta ruwaspanmi chay moldurapa urayninpi kaylaw-waklaw waqtanpi iskaytakama churarqa, chaynapi varillakunata chay anillokunaman ustuchispa altarta apanankupaq.

²⁸Acacia kaspimanta varillakunata ruwaspanmi qoriwan llusirqa.

²⁹Bezaleelqa ruwarqataqmi Diospaq sapaqchaspa tallinapaq aceitetawan miski asnaq inciensotapas, chaykunataqa ruwarqa perfumekuna ruwaqpa ruwasqanta hinam.