Read Biblia Revisión Chuya Qellqa 1992 – Chuya Qellqa 1992 Éxodo 38 Bible Online

Éxodo 38 - Biblia Revisión Chuya Qellqa 1992 – Chuya Qellqa 1992 bible

Éxodo 38

¹Bezaleelqa ofrenda kañana cuadrado altartapas acacia tablamantam ruwarqa, tawan lawninmi iskay metro cuartonkama karqa, sayayninñataqmi huk metro cuarton karqa.

²Chay altarpa tawan esquinanpim waqrachakunata ruwarqa. Altartawan waqrachankunataqa huk piezallanmantam ruwarqa. Chay altartam broncewan llusirqa.

³Ruwarqataqmi uchpa hoqarina mankankunatapas, palankunatapas, tazonninkunatapas, trinchenkunatapas chaynataq ninapaq kallanankunatapas. Chay serviciokunataqa lliwtam broncemanta ruwarqa.

⁴Malla hina rejillastapas broncemantam ruwarqa, chay rejillastam altarpa uku chawpinpi churarqa.

⁵Rejillaspa puntankunaman varillakunata ustuchinanpaqmi chulluchisqa broncemanta tawa anillokunata ruwarqa.

⁶Chay varillakunataqa acacia kaspimantam ruwarqa hinaspam broncewan llusirqa.

⁷Chay varillakunatam altarpa waqtanpi kaq anillokunapa ukunta pasachirqa, chaykunawan altarta apanankupaq; altarpa ukunqa uchkum karqa hinaspa tablamanta ruwasqam karqa.

⁸Diosman asuykuna carpapa punkunpi servikuq warmikunapa bronce espejonkunamantam huk lavatoriota Bezaleel ruwarqa, chay lavatoriopa tiyananpas hina broncellamantam karqa.

⁹Bezaleelqa ruwarqataqmi carpapa [20]pationtapas. Chay patiopa alleq lawninpi cortinankunatam kawpusqa linomanta tawa chunka pichqayuq metro sayayniyuqta ruwarqa.

¹⁰Iskay chunka pilarninkunatawan iskay chunka toqoyuq tiyanankunatapas broncemantam ruwarqa, pilarkunapa ganchonkunatawan varillakunatañataqmi qollqemanta ruwarqa.

¹¹Ichoq lawninpi patiopa cortinankunatapas tawa chunka pichqayuq metro sayayniyuqtam ruwarqa. Iskay chunka pilarninkunatawan toqoyuq tiyanankunatapas broncemantam iskay chunkata ruwarqa. Pilarkunapa ganchonkunatawan varillankunatapas qollqemantam ruwarqa.

¹²Carpapa qepan law otaq intipa seqaykunan law pationtañataqmi iskay chunka iskayniyuq metro parten sayayniyuqta ruwarqa. Cortinankunatapas hina chayna sayayniyuqllatam ruwarqa. Pilarninkunatawan toqoyuq tiyanankunapas chunkatakamam ruwarqa, pilarkunapa ganchonkunatawan varillankunatapas qollqemantam ruwarqa.

¹³Punku law otaq intipa qespimunan law patiopa cortinantañataqmi iskay chunka iskayniyuq metro partenta ruwarqa.

¹⁴Punkupa kaylaw waqtanpi kaq cortinakunataqa yaqa qanchis metrotam ruwarqa, pilarninkunatawan tiyanankunatapas kimsatakamam ruwarqa.

¹⁵Punkupa waklaw waqtanpi kaq cortinatapas qanchis metro sayayniyuqtam ruwarqa, pilarninkunatawan toqoyuq tiyanankunatapas kimsatakamam ruwarqa.

¹⁶Patiopa muyuriqninpi llapallan cortinakunataqa kawpusqa linomantam ruwarqa.

¹⁷Pilarkunapa toqoyuq tiyanankunatapas broncemantam ruwarqa, pilarkunapa ganchonkunatawan varillankunatapas qollqemantam ruwarqa, chay pilarkunapa puntantapas qollqewanmi llusirqa. Patiopa llapallan pilarninkunaqa moldurayuqkamam karqa.

¹⁸Patiopa punkunpi cortinatapas morado qaytumanta, grosella qaytumanta, guindo qaytumanta hinaspa kawpusqa linomanta suma-sumaq bordasqata ruwarqa, chay cortinapas isqon metro largoyuqmi karqa, sayayninñataqmi iskay metro parten, chay cortinakunatapas patiopa cortinankunapa sayaynin sayayniyuqtam ruwarqa.

¹⁹Pilarninkunatawan toqoyuq tawa tiyanankunatapas broncemantam ruwarqa, ganchonkunatawan anillonkunatapas qollqemantam ruwarqa, pilarkunapa puntantapas qollqewanmi llusirqa.

²⁰Carpapa estacankunatapas hinaspa patiopa muyuriqninpi estacakunatapas lliwtam broncemanta ruwarqa.

²¹Moisés kamachikuptinmi Leviypa mirayninkuna sacerdote Aaronpa churin Itamarpa yanapasqan, Diospa pacto ruwasqan Arcata waqaychana carpata ruwaypi hayka materialkunam yaykusqanta cuentata hurqorqaku.

²²Judá ayllumanta kaq Hurpa willkan hinaspa Uripa churin Bezaleelqa ruwarqa Moisesman Tayta Diospa lliw kamachisqanman hinam.

²³Bezaleeltam yanaparqa Dan ayllumanta kaq Ahisamacpa churin Aholiab. Aholiabmi karqa rumikunapi letrakunata ruwaq, dibujaq, morado qaytuwan, grosella qaytuwan, guindo qaytuwan hinaspa llañu lino qaytuwan bordadokuna ruwaq.

²⁴Carpata ruwananpaq qorimanta ofrenda qosqankum karqa isqon pachak soqta chunka pichqayuq kilo cuarton. Chaynaqa, santuariopi pesoman hinam karqa.

²⁵Runakunata yupaspa qollqe huñusqankuñataqmi karqa kimsa waranqa kimsa pachak chunka isqonniyuq kilo parte masnin. Chaynaqa, karqa santuariopi pesoman hinam.

²⁶Iskay chunka watayuqmanta hanaymanmi runakuna yupasqa karqaku soqta pachak kimsa waranqa pichqa pachak pichqa chunka. Paykunam sapakama qorqaku pichqa gramo parten qollqeta. Chayqa karqa santuariopi pesoman hinam.

²⁷Kimsa waranqa kimsa pachaknin kilo qollqetam chulluchirqaku santuariopaq chaynataq cortinapa toqoyuq tiyanankunata ruwanankupaq. Chay qollqemantam toqoyuq pachak tiyanakunata ruwarqa. Sapa tiyanam kimsa chunka kimsayuq kilo qollqeta llasarqa.

²⁸Chunka isqonniyuq kilo parten qollqewanñataqmi, pilarkunapa ganchonkunatawan varillankunata Bezaleel ruwarqa, hina chay qollqewantaqmi pilarkunapa puntankunatapas llusirqa.

²⁹Bronce ofrendañataqmi karqa iskay waranqa kimsa pachak kimsa chunka soqtayuq kilo masnin.

³⁰Chay broncemantam Diosman asuykuna carpapa punkunpa toqoyuq tiyanankunata, altarta, rejillanta hinaspa altarpa llapallan servicionkunata,

³¹patiopa toqoyuq tiyanankunata, patiopa punkunpa tiyanankunata, carpapa llapallan estacankunata hinaspa santuariopa muyuriqninpi llapallan estacakunatapas ruwarqa.