Read Biblia Revisión Chuya Qellqa 1992 – Chuya Qellqa 1992 Éxodo 8 Bible Online

Éxodo 8 - Biblia Revisión Chuya Qellqa 1992 – Chuya Qellqa 1992 bible

Éxodo 8

¹Moisestam Tayta Dios nirqa: Faraonpa kasqanman yaykuspa kaynata nimuy: Hebreo runakunapa Diosninmi kaynata nin: “Yupaychamuwananpaq llaqtayta kachariy.

²Sichum mana kachariyta munaptikiqa ñoqam lliw nacionnikita karyakunawan castigarusaq.

³Mayupi karyakuna miraruspanmi yaykunqa palacioykiman, puñunayki cuartoman, camaykiman, serviqnikikunapa wasinman, runaykikunapa wasinman, hornoykikunaman chaynataq artesaykikunamanpas.

⁴Chay karyakunam qespinqa hawaykiman, runaykikunapa hawanman chaynataq llapallan serviqnikikunapa hawanmanpas”, nispa.

⁵Chaymi Moisesta Tayta Dios nirqa: Aaronta kaynata niy: “Mayukunapa, yarqakunapa hinaspa qochakunapa hawanman tawnaykita haywariy, chaynapi chaykunamanta karyakuna lloqsimuspa Egipto nacionman huntananpaq”, nispa.

⁶Hinaptinmi makinta Aarón haywarirqa Egipto yakukunapa hawanman, chaymi karyakuna lloqsiramurqa Egipto allpata huntaykunankama.

⁷Layqakunapas chaynata ruwaspankum Egipto allpaman karyakunata lloqsichimurqaku.

⁸Chaymi Moisestawan Aaronta qayachispan Faraón nirqa: Tayta Diosta mañapuwaychik ñoqamantawan runaykunamanta karyakunata asuchinanpaq, hinaptinqa miraynikikunatam kacharisaq sacrificiokunata ofrecespa Tayta Diosta yupaychamunankupaq, nispa.

⁹Hinaptinmi Faraonta Moisés nirqa: Haykapitaq qampaqwan, serviqnikikunapaq hinaspa runaykikunapaq Tayta Diosta ruegapunayta munanki, chaynapi karyakuna qanmanta hinaspa palacioykikunamanta lloqsispa mayullapiña kananpaq, nispa.

¹⁰Hinaptinmi Faraón nirqa: Paqarinpuni chinkachichun, nispa. Chaymi Moisés nirqa: Tayta Dioslla, Dios kasqanta yachanaykipaqmi mañakusqaykiman hina ruwasqa kanqa.

¹¹Karyakunam qanmanta, palacioykimanta, serviqnikikunamanta hinaspa runaykikunamanta pasakunqa. Mayullapiñam kanqa, nispa.

¹²Chaymantam Faraonpa qayllanmanta Moiseswan Aarón lloqsirqaku. Chaymi Tayta Diosta Moisés mañakurqa, Faraonman kachasqan karyakunata chinkachinanpaq.

¹³Hinaptinmi Moisespa nisqanman hina Tayta Dios ruwarqa; chaymi wasikunapi, patiokunapi hinaspa chakrakunapi karyakuna wañururqa.

¹⁴Runakunañataqmi monto-montonta huñururqaku allpapas asnarinankama.

¹⁵Faraonmi ichaqa chaykunamanta libreña tarikuspan, sonqonta aswanraq rumiyarachispan Tayta Diospa nisqanta mana kasukurqachu.

¹⁶Tayta Diosmi Moisesta nirqa: Aaronta niy: “Tawnaykita hoqarispayki allpapa polvonta waqtay, chaynapi lliw Egipto nacionpi usaman tikrakunanpaq”, nispa.

¹⁷Paykunam chaynata ruwarqaku. Aaronmi tawnanta haywarispan allpapa polvonta waqtarurqa, hinaptinmi usa rikurirurqa, chaymi runakunatawan animalkunata intururqa. Allpapa polvonmi usaman tikrakururqa lliw Egipto nacionpi.

¹⁸Layqakunapas chaynata ruwaspankum usata rikurichiypi karqaku, ichaqa manam atirqakuñachu. Usam runakunatawan animalkunata tukururqa.

¹⁹Chaymi Faraonta layqankuna nirqaku: Diosmantam kayqa, nispa. Ichaqa Faraonpa sonqonmi aswanraq rumiyarurqa, chaymi Tayta Diospa nisqanman hina mana kasukurqachu.

²⁰Moisestam Tayta Dios nirqa: Faraonmi mayuman paqarin lloqsinqa. Chaynaqa, tutapayta hatarispayki paywan tupanaykipaq riy. Hinaspam ninki, Tayta Diosmi kaynata nin: “Yupaychamuwananpaq llaqtayta kachariy.

²¹Sichum mana kachariptikiqa kachukuq tukuy rikchaq chuspikunatam kachaykamusaq, qampa hawaykiman, serviqnikikunaman, runaykikunaman hinaspa palacioykikunamanpas. Nana-nanaq chuspikunam Egipto runakunapa wasinman chaynataq sarusqanku allpamanpas huntanqa.

²²Ichaqa chay punchawmi llaqtaypa yachasqan Gosén allpata sapaqchasaq, chaynapi chay kachukuq tukuy rikchaq chuspikuna mana chayananpaq. Chaynapim yachanki ñoqa Tayta Dios kay nacionpi kasqayta.

²³Runaykunatam runaykikunamanta sapaqchasaq. Kay señalmi paqarin ruwasqa kanqa”, nispa.

²⁴Chaynatam Tayta Dios ruwarqa. Kachukuq tukuy rikchaq chuspikunam Faraonpa palacionta, serviqninkunapa wasinta chaynataq llapallan Egipto allpapa hawantapas lliw chiparurqa, chaymi Egipto nacionta chay chuspikuna pasaypaqta tukururqa.

²⁵Hinaptinmi Moisestawan Aaronta qayaspan Faraón nirqa: Rispayá Diosnikichikman sacrificiokunata ofrecemuychik, ichaqa ama kay nacionmanta lloqsiychikchu, nispa.

²⁶Chaymi Moisés nirqa: Manam kayllapiqa ruwaymankuchu. Tayta Diosman ofrecesqayku animalkunataqa kay Egipto runakunaqa millakunmi. Sichum qawachkaptinku ofreceptiykuqa rumiwanchá tukuruwanmanku.

²⁷Chayraykum chunniqman kimsa punchaw puriyta risaqku, hinaspam Tayta Diospaq sacrificiokunata ofrecespa yupaychamusaqku, chaynataqa ruwamusaqku paypa niwasqankuman hinam, nispa.

²⁸Chaymi Faraón nirqa: Ñoqam chunniqman rinaykichikpaq kachaykusqaykichik, chaynapi Diosnikichikman sacrificiokunata ofrecespa yupaychamunaykichikpaq, ichaqa amam llumpay karutaqa rinkichikchu, hinaspam ñoqapaqpas mañakamunkichik, nispa.

²⁹Hinaptinmi Faraonta Moisés nirqa: Qayllaykimanta lloqsiykuspallaymi Tayta Diostaqa mañakusaq, kachukuq tukuy rikchaq chuspikunata qanmanta, serviqnikikunamanta hinaspa runaykikunamanta paqarinpuni chinkachinanpaq. Ichaqa amaña engañawaykuchu, aswanqa Israelpa mirayninkunata kachariy, chaynapi Tayta Diosman sacrificiokunata ofrecenanpaq, nispa.

³⁰Chaymi Faraonpa qayllanmanta lloqsispan Tayta Diosta Moisés mañakurqa.

³¹Chaynapim Tayta Diosqa Moisespa mañakusqanman hina ruwaspan chay kachukuq tukuy rikchaq chuspikunata Faraonmanta qarqorurqa, serviqninkunamanta chaynataq runankunamantapas. Manam chullallapas puchurqachu.

³²Ichaqa Faraonmi sonqonta aswanraq rumiyarachispan Israelpa mirayninkunata mana kachariyta munarqachu.