Read Biblia Revisión Chuya Qellqa 1992 – Chuya Qellqa 1992 Éxodo 9 Bible Online

Éxodo 9 - Biblia Revisión Chuya Qellqa 1992 – Chuya Qellqa 1992 bible

Éxodo 9

¹Moisestam Tayta Dios nirqa: Faraonpa qayllanman yaykuspa kaynata nimuy, hebreo runakunapa Diosninmi kaynata nin: Llaqtayta kachariy yupaychamuwanankupaq.

²Mana kacharispa harkaptikiqa,

³ñoqa Tayta Diosmi manchakuypaq peste onqoywan llapallan campopi animalkunata castigasaq, hinaptinmi caballokuna, asnokuna, camellokuna, vacakuna hinaspa ovejakunapas wañunqaku.

⁴Ichaqa Tayta Diosmi Israelpa mirayninkunapa animalninkunata Egipto runakunapa animalninkumanta sapaqchanqa, manam chullallapas wañunqachu.

⁵Paqarinpunim kay nacionpi chaynata ruwasaq, nispa.

⁶Paqarinnintin punchawmi Tayta Dios chaynata ruwarqa. Egipto nacionpi animalkunam lliw wañururqa, Israelpa mirayninkunapa animalninkum ichaqa mana chullallapas wañurqachu.

⁷Faraonñataqmi Israel miraykunapa animalninkuta qawachimurqa, hinaptinmi chullallapas mana wañusqachu. Chaywanpas sonqon rumiyaruptinmi Faraonqa Israelpa mirayninkunata mana kachariyta munarqachu.

⁸Moisestawan Aarontam Tayta Dios nirqa: Hornomanta huk aptiyninka uchpata hoqariychik, hinaptin cielo lawman Faraonpa qayllanpi Moisés machqechun.

⁹Chay uchpam lliw Egipto nacionpa hawanpi polvoyaruspan chupukunata rikurirachinqa runakunapi chaynataq animalkunapipas, nispa.

¹⁰Moiseswan Aaronmi hornomanta uchpata hoqarispanku Faraonpa ñawpaqninpi sayaykurqaku, hinaptinmi cieloman Moisés machqeruptin runakunapipas chaynataq animalkunapipas chupu rikurirurqa.

¹¹Layqakunapas Moisespa ñawpaqninpiqa chupuwan kasqankuraykum mana aguantayta atirqakuchu. Chupum layqakunapi chaynataq lliw Egipto runakunapipas rikurirurqa.

¹²Ichaqa Tayta Diosmi Moisesman nisqanpi hina Faraonpa sonqonta rumiyarachirqa, hinaptinmi paykunata mana kasurqachu.

¹³Moisestam Tayta Dios nirqa: Tutapayta hatarispa, Faraonpa qayllanman yaykuspa kaynata nimuy; hebreo runakunapa Diosninmi kaynata nin: “Yupaychamuwanankupaq llaqtayta kachariy,

¹⁴kunanmi llapallan castigoyta kacharimusaq qanman, serviqnikikunaman hinaspa runaykikunaman, chaynapim yachanki tukuy kay pachapi ñoqa hina huk Diosqa mana kasqanta.

¹⁵Sichum qanmanwan runaykikunaman peste onqoyta kachaykamuptiyqa ñam kay pachamanta chinkaruwaqña karqa.

¹⁶Ichaqa manam chaytachu ruwarqani, aswanqa qanman atiyniyta qawachinaypaqmi kawsachirqayki, chaynapi sutiy lliw kay pachapi willakusqa kananpaq.

¹⁷¿Chaywanpas hinallaraqchu runaykunata mana kachariyta munanki?

¹⁸Paqarinmi kay horata nisyu-nisyu runtu parata chayachimusaq. Chayna paraqa Egipto nacionpa hatarisqan punchawmantapas manam karqachu.

¹⁹Chaynaqa, campopi animalnikikunata hinaspa tukuy imayki kaqkunata wasiki ukuman huñuchimuy. Runapas, animalpas wasiman mana yaykuspa hina campollapi qeparuqqa runtu parawanmi wañurunqa”, nispa.

²⁰Chaywanpas Faraonpa wakiqnin serviqninkunallam Tayta Diospa nisqanta manchakuspanku serviqninkunata chaynataq animalninkutapas wasi ukuman pusaykurqaku.

²¹Wakiqninmi ichaqa Tayta Diospa nisqanta mana kasukuspanku serviqninkutawan animalninkuta hina campopi saqeramurqaku.

²²Chaymantam Moisesta Tayta Dios nirqa: Makikita cieloman haywariy, chaynapi Egipto runakunapa, animalkunapa hinaspa campopi lliw qorakunapa hawanman runtu para chayamunanpaq, nispa.

²³Chaymi cieloman tawnanta Moisés haywarirqa, hinaptinmi rayokunata llipyakunata hinaspa runtu parata Egiptoman Tayta Dios chayachimurqa.

²⁴Chay llipyantin, rayontin runtu param mana samaykuspa chayamurqa. Chayna runtu paraqa Egipto nacionpa hatarisqanmantapas manam karqachu.

²⁵Chay runtu param lliw Egipto nacionpi tukuy ima kaqkunata, runakunata, animalkunata, tukuy qorakunata tukuparurqa; llapa sachakunatapas pakiparurqam.

²⁶Israelpa mirayninkunapa yachasqan Gosén allpamanmi ichaqa chay runtu para mana chayarqachu.

²⁷Chaymi Moisestawan Aaronta qayachispan Faraón nirqa: Kunanpas huchallikurunim. Tayta Diosqa allin ruwaqmi, ñoqam ichaqa runaykunapiwan huchasapa kaniku.

²⁸Tayta Diosta mañakuychik kay rayontin llipyantin runtu para pasananpaq. Ñoqaqa kachaykusqaykichikñam, manañam qepankichikñachu, nispa.

²⁹Chaymi Moisés nirqa: Kay pachaqa Tayta Diospa kasqanta yachanaykipaqmi, kay llaqtamanta lloqsispalla Tayta Diosman makiyta hoqarisaq, hinaptinmi rayokuna llipyakuna chaynataq runtu parapas taniramunqa, chaynapim yachanki kay pachaqa Tayta Diosllapa kasqanta.

³⁰Ichaqa yachanim qampas chaynataq serviqnikikunapas Tayta Diostaqa manaraq manchakunaykichikta.

³¹Linazatawan cebadatam paqwayta tukurun; cebadaqa espigayuqñam karqa, linazapas sisapiñam karqa.

³²Trigowan wakin kawsaykunam ichaqa allinlla qeparun, qepa tarpuyña kasqanrayku, nispa.

³³Chaymantam Faraonpa ñawpaqninmanta llaqtapa hawa lawninman Moisés lloqsirqa, hinaspam brazonta kicharispa Tayta Diosta mañakurqa. Chayraqmi chay rayokunapas llipyawan runtu parapas taniramurqa, manañam mastaqa paramurqachu.

³⁴Runtu parapas, rayokunapas llipyakunapas taniramusqanta qawaykuspanmi Faraonqa huktawan huchallikururqa, hinaspam paypas chaynataq serviqninkunapas sonqonkuta rumiyarachirqaku.

³⁵Faraonpa sonqonmi rumiyarurqa, chaynapim Israelpa mirayninkunata mana kacharirqachu, Moisesnintakama Tayta Diospa nisqanman hina.