Read Biblia Revisión Chuya Qellqa 1992 – Chuya Qellqa 1992 Job 11 Bible Online

Job 11 - Biblia Revisión Chuya Qellqa 1992 – Chuya Qellqa 1992 bible

Job 11

¹Naamat llaqtayuq Zofarñataqmi Jobta nirqa:

²Chayna achkallaña rimaykunaqa contestasqam kanan. ¿Pipas achkallataña rimaspanchum mana huchayuqpaq hapisqa kanman?

³¿Achkallataña rimasqaykiwanchu runakunata upallarachiwaq? ¿Burlakuchkaptikichu mana pipas kutipasunkiman?

⁴Qanmi ninki: “Yachachisqaykunaqa allinpunim, ñoqaqa Diospa qayllanpipas chuyam kani”, nispa.

⁵Amalaya Diospuni contraykipi rimarinman.

⁶Diosqa pakasqa kaqkunatawan yuyayninchikpa mana haypanan kaqkunatam yachachisunkiman. Chaynapim yachawaq Diospa castigasqan kasqaykita, huchaykiman hina mana castigasqa kasqaykita.

⁷¿Yaqachu Diospa pakasqa kaqninkuna reqsiyta atiruwaq? ¿Yaqachu Tukuy Atiyniyuq Dios hina chuya kayta atiruwaq?

⁸Chaykunaqa cielokunamantapas aswan hatunmi, , hinaptinqa ¿imatataq ruwanki? Chaykunaqa wañuqkunapa kasqanmantapas aswan uku-ukuraqmi, hinaptinqa ¿imaynatataq reqsinki?

⁹Sayayninpas kay pachamantaqa aswan hatunmi, lamar qochamantapas aswan hatunmi.

¹⁰Sichum Dios hamuspan pitapas juzgaptinqa ¿pitaq payta harkakunman?

¹¹Payqa llulla runataqa reqsinmi, mana allin kaqkunatapas qawanmi, chaykunataqa manam qonqanchu.

¹²Mana yachayniyuq runaqa manam yachayniyuqmanqa tikrakurunmanchu asnomantaqa manam runaqa nacemunmanchu.

¹³Sichum sonqoykita Diosman kicharispaykiqa, sichum makikitapas Diosman haywarispaykiqa,

¹⁴makikimanta mana allin kaqkunata wischuspaykiqa, wasikimanta mana allin kaqkunata qarqospaykiqa,

¹⁵mana penqakuspam umaykita altoman hoqarinki, mana imatapas manchakuspam hawka kakunki.

¹⁶Ñakariynikitapas qonqarunkim, yuyarispapas yuyarinki pasaruq yakuta hinallam.

¹⁷Kawsaynikipas chawpi punchawpi inti hinaraqmi kancharinqa, sasachakuynikiqa tutayay hinaña kaspanpas pacha achikyay hinaraqmi kanqa.

¹⁸Diosman hapipakuspam hawka kawsakunki, pay waqaychasuptikim hawka puñukunki.

¹⁹Puñuykuptikipas manam imapas manchachisunkichu, achkaqmi yanapakuyta maskaq qanman hamunqaku.

²⁰Mana allin runakunam ichaqa yanapakuytapas yanqa maskanqaku, amparakunankutapas manam tarinqakuchu, paykunaqa wañuyllatañam suyanqaku, nispa.