Read Biblia Revisión Chuya Qellqa 1992 – Chuya Qellqa 1992 Job 16 Bible Online

Job 16 - Biblia Revisión Chuya Qellqa 1992 – Chuya Qellqa 1992 bible

Job 16

¹Jobñataqmi nirqa:

²Achka kutitam chay rimasqaykichikta hinaqa uyarirqani, llakipayaykuwanaykichik kachkaptinpas aswanraqmi piñachiwanchik.

³¿Haykapitaq tukunqa kay yanqa rimaynikichikqa? ¿Imataq kallpanchasunkichik kutipawanaykichikpaqa?

⁴Ñoqapa ñakarisqayta qamkuna ñakariptikichikqa ñoqapas qamkuna hinachá rimachkayman, Asikuq hinachá umayta kuyuchispay qamkunapa contraykichikpi rimachkayman.

⁵Ñoqaqa rimaspallaypas kallpanchaykichikmanmi, sumaq rimaykunawancha nanaynikichikta samaykachiyman.

⁶Ñoqapim ichaqa rimariptiypas nanayniyqa mana samaykunchu, upallaruptiypas nanayniyqa manam samaykunchu.

⁷Diosmi kallpayta chinkarachin, lliw amigoykunatam mancharachin.

⁸Tulluntawan qarallantañam saqeruwan, kuchuman qemiruwaspanmi contraypi hatarirun.

⁹Diosmi ñoqapaq llumpayta piñakurun, qatikachawaspanmi llikiparuwan; enemigonpaqñam hapiruwan, cheqnikuywan qawawaspanmi kiruntaraq kachupakun.

¹⁰Llapa runakunam contraypi huñunakurunku, burlakuwaspankum uyaykunapi laqyawanku.

¹¹Diosmi mana allin runakunaman qoykuwan, millay runakunapa makinmanmi churaykuwan.

¹²Hawka kawsakuchkaptiymi ñutuparuwan, kunkaymanta hapiruwaspanmi llikiparuwan, flechankunapa tuksinantam ruwaruwan.

¹³Kayninta chaynintam flechankunata kacharimuwan, mana llakipayarispam rurunllaytapas llikirun, hayaqniypas pampamanmi taqtakurun.

¹⁴Aychallaytapas kaypi chaypim kiriparuwan, guerrapi peleaq hinam pawaykamuwan.

¹⁵Llakipa pampasqanmi qachqa pachakunawan churakuruni, umaymanpas allpatam tallikuruni.

¹⁶Uyallaypas waqasqaypim punkirunña, ñawillaypas waqasqaypim tutayarunña.

¹⁷Mana huchayuq kachkaspaypas, allin sonqowan mañakullachkaspaypas, chaynam kallachkani.

¹⁸Allpa, amayá yawarllayta pampaykuychu, allpa, amayá qayakullasqayta pakaykuychu.

¹⁹Hanaq pachapim testigoy kachkan, chaypitaqmi abogadoypas kachkan.

²⁰Kutipawaqniykunaqa amigoykunallam, chaywanpas Diospa ñawpaqninpim ñoqallayqa waqallasaq.

²¹Ima allincha kanman Dioswan huk runa, runamasinwan hina kutipanakuptinqa.

²²Wataykunapas utqaymanmi pasachkan, manaña haykapipas kutimuq ripukunaymi hichpamuchkanña.