Read Biblia Revisión Chuya Qellqa 1992 – Chuya Qellqa 1992 Job 19 Bible Online

Job 19 - Biblia Revisión Chuya Qellqa 1992 – Chuya Qellqa 1992 bible

Job 19

¹Jobñataqmi nirqa:

²¿Haykapikamataq qamkuna llakichiwankichik? ¿Haykapikamataq rimasqaykichikwan hukmanyachiwankichik?

³Yapa-yapamantam insultawankichik, ¿manachu kamiwayta penqakunkichik?

⁴Cheqaptaña pantaruptiypas huchayqa ñoqallatachá ñakarichiwanman.

⁵Qamkunaqa ñoqamantapas allinpaq hinaraqmi hapikunkichik, sasachakuypi kasqaytam uyaypiraq rimakunkichik.

⁶Chaynaqa, yachaychikyá Diospuni wichirachiwasqanta, paymi trampaman wichiykachiwan.

⁷“Wañuchiwachkankum” nispa qayakuptiypas manam pipas uyariwaqniyqa kanchu, yanapakuyta mañakuptiypas manam pipas allin arreglotaqa ruwaykuwanchu.

⁸Diosmi mana pasanaypaq purinay ñanta wichqarun, purinay ñantam tutayarachin.

⁹Llapa imaytam qechuruwan, umaymantam coronayta hurqorun.

¹⁰Kaylawniymanta waklawniymantam tuñirachiwan, sachata sapinmanta pelachkaq hinam ima munasqaytapas chinkarachin.

¹¹Piñakuynintam contraypi kachaykamun, enemigonpaqñam hapiruwan.

¹²Tropakunapas contraypim kallparamunku, wasiypa muyuriqninpi churakuruspankum paykunaqa atacawanankupaq churakurunku.

¹³Payqa wawqeykunatawan amigoykunatam ñoqamanta karuncharachin, paykunañataqmi mana reqsisqa hinaraq ñoqamanta karunchakunku.

¹⁴Aylluykunapas saqeruwankum, reqsisqaykunapas qonqaruwankum.

¹⁵Wasiypi samakuqkunawan criadaykunapas manañam reqsiqpas tukuwankuñachu, paykunaqa huklaw llaqtayuqta hinañam qawawanku.

¹⁶Criadoyta qayakuptiypas, manañam contestawanchu, sumaq simiywan ruegakuptiypas, manañam kasuwanchu.

¹⁷Warmiypas simiypa samayniytam millakurunña, churiykunapas lliwmi millakuruwankuña.

¹⁸Warmakunapas despreciawanmi, paykunaman rikuriykuptiymi asikuwanku.

¹⁹Kuyasqay amigoykunapas cheqniruwankuñam, sinchi kuyasqaykunapas contraypim rikurirunku.

²⁰Tulluywan qarallanñam rikuriruni, tulluykunapas kiruy hinañam rikukuchkan.

²¹Amigollaykuna ñoqallayta llakipayariykuwaychik Diospa piñakuyninmi wichiykullawan.

²²¿Imanasqataq Dios hinaqa ñakarichiwankichik? ¿kachuwaspaykichikpas manachu aminkichik?

²³¡Ima allincha kanman nisqaykuna qellqasqa kaptinqa! ¡Ima allincha kanman rimasqaykuna libropi qellqasqa kaptinqa!

²⁴¡Ima allincha kanman fierromanta cincelwan, titimanta tablapi otaq rumipi pipas wiñaypaq qellqaruptinqa!

²⁵Ñoqaqa yachanim Salvawaqniypa kawsasqanta, payqa wañuyta venceruspanmi mana huchayuq kasqayta niykuwanqa.

²⁶Kay aychayña lliw wichiriruptinpas, kikiypunim Diosta rikuykusaq.

²⁷Ñawiywanpunim rikuykusaq, manam hukchu qawanqa, sonqoymi ukuypi tukukuchkan chay rikuykuymanta.

²⁸Qamkunam ninkichik: “¿Imaynatataq qatikachachwan?” “Kikinpa huchanmanta ñakarichkaptinqa”, nispa.

²⁹Chaynaqa, qamkunayá espadata manchakuychik, hucharayku Diospa apamusqan espadatayá manchakuychik, ichaqa allin arreglo ruwaq juez kasqantayá yachaychik, nispa.