Read Biblia Revisión Chuya Qellqa 1992 – Chuya Qellqa 1992 Job 2 Bible Online

Job 2 - Biblia Revisión Chuya Qellqa 1992 – Chuya Qellqa 1992 bible

Job 2

¹Huk punchawmi llapa angelkuna Tayta Diospa qayllanman rirqaku. Satanaspas Diospa qayllanmanmi rirqa.

²Chaymi Satanasta Tayta Dios tapurqa: ¿Maymantataq hamuchkanki? nispa. Satanasñataqmi nirqa: Allpa pacha patan-patan muyumusqaymantam hamuchkani, nispa.

³Hinaptinmi Tayta Dios nirqa: ¿Yaqachum rikumurqanki serviqniy Jobta? Kay allpa pachapiqa manam pipas pay hinaqa kanchu mana huchallikuspa munasqayman hina ruwaqqa, payqa kasuwaspam ima mana allinkunamantapas sapaqchakun. Yanqapuni paypa kapuqninkunata tukurachiwachkaptikipas hinallam payqa mana huchayuq kachkan, nispa.

⁴Chaymi Tayta Diosta Satanás, nirqa: Runaqa aychanta mana imanasqaqa hawkam kawsakun, vidanraykum ichaqa imatapas ruwanman.

⁵Sichum aychanpiwan tullunpi nanayta qoykuptikiqa uyaykipipunim ñakaykusunkiman, nispa.

⁶Hinaptinmi Satanasta Tayta Dios nirqa: Allinmi, munasqaykitayá paywan ruway, ichaqa amam wañuchinkichu, nispa.

⁷Tayta Diospa qayllanmanta lloqsiruspanmi Satanasqa Jobpa aychanta isuwan llumpa-llumpayta tukurachirqa chaki pampanmanta uma puyukninkama.

⁸Chaymi Jobqa uchpapa hawanpi tiyaykuspan pakisqa kallanawan siksikurqa.

⁹Warminñataqmi nirqa: ¿Hinallaraqchu iñiynikipi takyapakuchkanki? ¡Diosta ñakaspayki hukllata wañuy! nispa.

¹⁰Hinaptinmi Job nirqa: ¡Mana yuyayniyuq warmikuna hinam rimarunki! allin kaqkunata Diosmanta chaskichkaspaqa ¿manachum mana allin kaqkunataqa chaskichwan karqa? nispa. Tukuy chaykuna rimasqanwanpas Jobqa manam huchallikurqachu.

¹¹Jobpam kimsa amigonkuna karqa: Temán llaqtayuq Elifaz, Súah llaqtayuq Bildad hinaspa Naamat llaqtayuq Zofar. Paykunam Jobpa sasachakuyninta yacharuspanku sonqonta tiyaykachinankupaq watukuq rirqaku.

¹²Paykunam karullamantaraq qawarispanku Jobtaqa mana reqsiytapas atirqakuchu, chaymi qaparispa waqarqaku, pachankutapas llikikuspankum allpatapas umankuman machqekurqaku.

¹³Hinaspam Jobwan kuska pampapi tiyaykurqaku. Jobpa nanaynin llumpa-llumpay kasqanraykum paykunaqa mana imallatapas rimapayaspanku qanchis punchaw qanchis tuta chaynalla karqaku.