Read Biblia Revisión Chuya Qellqa 1992 – Chuya Qellqa 1992 Job 22 Bible Online

Job 22 - Biblia Revisión Chuya Qellqa 1992 – Chuya Qellqa 1992 bible

Job 22

¹Temán lawmanta kaq Elifazñataqmi Jobta nirqa:

²¿Yaqachum runa mayna yachayniyuqña kaspapas Diosta imallapipas yanapanman?

³¿Yaqachu allin ruwaq kasqayki Tukuy Atiyniyuq Diospa allinninpaq kanman? ¿Yaqachu allin kawsakuq kayniki imallapipas kusichinman?

⁴¿Allin ruwaq kachkaptikichu Dios castigachkasunki? ¿Allin ruwaq kachkaptikichu juicioman pusasuchkanki?

⁵Cheqaptapas mana allin ruwasqaykikunaqa hatunmi, mana allin ruwasqaykikunaqa mana yupay atinam.

⁶Yanqamantam aylluykikunapa pachanta prendapaq qechurqanki, wakchakunapa pachantam qechurqanki.

⁷Yakunayasqa kaqmanpas manam tomaykachirqankichu, yarqaymanta kaqmanpas manam mikuykachirqankichu.

⁸Atiyniyuq kasqaykiman hinam, ancha reqsisqa kasqaykiman hinam, allpatapas munaychakuq karqanki.

⁹Viudakunatapas mana imayuqtam kutichirqanki, mana tayta-mamayuqkunatam ñakarichirqanki.

¹⁰Chayraykum kay hatun sasachakuy muyurusunki, chayraykum hatun manchakuy huntaykusunki.

¹¹Tutayaypi kaspam mana rikukunkichu, lloqllapa pampasqanmi kachkanki.

¹²¿Manachum Diosqa cielokunapa altonpiraq kachkan? Alto-altopi kaq chaskakunamantapas aswan altopiraqmi kachkan.

¹³Chaywanpas qanmi ninki: “¿Imatataq Dios yachan? ¿Imaynatataq Diosqa juzganman tutayay ukupiqa?

¹⁴Payqa cielokunatam patan-patan muyun, yanay-yanay puyukunam pampaykun chayraykum mana rikuwanchikchu”, nispa.

¹⁵¿Millay runakunapa ñawpaq kawsasqanta hinachu kawsayta munachkanki?

¹⁶Paykunaqa lloqllapa apasqan hinam chaylla wañururqaku.

¹⁷Paykunaqa Diostapas kaynatam nirqaku: “Ñoqaykumanta anchuriy, Tukuy Atiyniyuq Dios ¿imanawankikutaq?” nispanku.

¹⁸Chaywanpas Diosmi tukuy imakunawan wasinta huntaykachirqa, paykunapa mana allin umachakuyninwanqa manam apachikusaqchu.

¹⁹Allin ruwaq runakunam qawaspanku kusikunqaku, mana huchayuqkunam kaynata nispa burlakunqaku:

²⁰“Enemigonchikkunam chinkachisqa rikurirunqaku, paykunamanta puchuqtapas lliwtam nina ruparun”, nispanku.

²¹Hawkaña kawsanaykipaqyá Dioswan allinyanakuy, chaynata ruwaspaqa hawkayaytam tarinki.

²²Paypa yachachikuynintayá chaskikuy, palabrankunatayá sonqoykipi waqaychay.

²³Tukuy Atiyniyuq Diosman kutirikuspaqa hoqarisqam kanki, ñakariytapas wasikimantam suchurichinki.

²⁴Qorikitapas allpaman wischuptikiqa, allinnin qorikitapas mayupi rumita hina wischuptikiqa,

²⁵Tukuy Atiyniyuq Diosñam qorikipas kanqa, paytaqmi manaña tukuq qollqekipas kanqa.

²⁶Tukuy Atiyniyuq Diospim sinchillataña kusikunki, uyaykitapas Diosmanmi hoqarinki.

²⁷Imataña mañakuptikipas paymi uyarisunki, chaynataqmi qampas prometekusqaykita cumplinki.

²⁸Imaña ruway munasqaykipas cumplikunqam, purisqayki ñanpas kancharinqam.

²⁹Diosqa hatun tukuqkunatam uchuychan, uchuychakuqkunatam ichaqa hatunchan.

³⁰Mana huchayuq kaptikiqa Diosmi librasunki, chuya kaptikiqa Diosmi salvasunki, nispa.