Read Biblia Revisión Chuya Qellqa 1992 – Chuya Qellqa 1992 Job 24 Bible Online

Job 24 - Biblia Revisión Chuya Qellqa 1992 – Chuya Qellqa 1992 bible

Job 24

¹Sichum tiempokuna Tukuy Atiyniyuq Diospa reqsisqallan kaptinqa ¿imanasqataq reqsiqninkunaqa mana rikunkuchu?

²Mana allin runakunaqa linderokunatam kuyuchinku, paykunaqa animalkunatam suwakuspa michikunku.

³Mana tayta-mamayuqpa asnontam qechunku, viudapa torontapas prendapim apakunku.

⁴Wakchakunatam ñanmanta karunchanku, wakchakunapas paykunamantaqa pakakunkum.

⁵Wakchakunaqa purun asnokuna hinam mikuy maskaq lloqsinku, chunniqmantam wawa-churinkupaq mikuyta apamunku.

⁶Hukpa chakranpim kawsayta pallapakunku, mana allin runakunapa uvasnintam maskapakunku.

⁷Mana ima qatayuqmi tukuy tuta puñullanku, chirimanta tapakuykunankupaqpas manam imallankupas kanchu.

⁸Orqopi parapas pasaypaqtam paykunataqa nuyurun, qaqakunamanñam ustuykullanku llantukunankupaq.

⁹Viudakunamantam ñuñuq wawankuta qechunku, wakchakunamantapas prendakunatam mañanku.

¹⁰Wakchakunam mana pachayuqña purinku, trigota qepisqankupim yarqaymanta wañunku.

¹¹Molinowan chamchaspam aceiteta hurqonku, vinota hurqonankupaqmi uvasta sarunku, chaykunata ruwasqankupim yakumanta wañunku.

¹²Wañunayaqkunam llaqtapi waqanku, wañuypa patanpi kaqkunam qaparinku, Diosmi ichaqa mañakuyninkuta mana uyarinchu.

¹³Wakin runakunam achkita cheqninku, chaymi achkimanta rakikunku.

¹⁴Runa wañuchiqmi wakchata wañuchinanpaq tutapayta hatarin, tutañataqmi suwakun.

¹⁵Waqllikuq runam tutaykunanta suyan, uyanta sumaqta tapakuruspam nin: “Manam pipas rikuwanqachu”, nispa.

¹⁶Suwakunaqa tutallam wasiman yaykunku, punchawqa lliwmi pakakurunku, paykunaqa achkitapas cheqninkum.

¹⁷Paykunapaqqa achikyaypas pasaypaq tutayay hinam, paykunaqa manchakuypaq tutayaytam kuyanku, nispa.

¹⁸Mana allin runaqa yakupa apasqanmi kanqa, chakrankupas ñakasqam kanqa, uvas chakrankupipas manañam pipas llamkapakunqachu.

¹⁹Imaynam usyawan rupay ritita chullurachispa chinkarachin, chaynapunim huchallikuqkunapas sepulturapi chinkarunqaku.

²⁰Paykunataqa mamankupunipas qonqarunqam, paykunataqa urukunam mikurunqa, manañam pipas yuyarinqachu. Sacha hinam kuchusqa kanqaku.

²¹Mana wachakuqtawan viudatapas ñakarichirqam, paykunataqa manam haykapipas yanapaykurqachu.

²²Diosmi ichaqa atiyniyuqkunata kallpanwan qarqorun, pay hatariptinqa, manam pipas vidantaqa rantirqachu.

²³Diosqa hawkallata saqeykuspanpas imaynam kawsasqankutam qawachkan.

²⁴Paykunaqa ratollam hoqarikunku, ichaqa chayllam chinkarunku. Chutasqa wayta hinam qawirunku, rutusqa trigo hinam rikurirunku.

²⁵Mana chayna kaptinqa ¿pitaq llullapaq kunan hapiwanman? Mana chayna kaptinqa ¿pitaq rimasqaykunata yanqachanman? nispa.