Read Biblia Revisión Chuya Qellqa 1992 – Chuya Qellqa 1992 Job 28 Bible Online

Job 28 - Biblia Revisión Chuya Qellqa 1992 – Chuya Qellqa 1992 bible

Job 28

¹Qollqeta hurqonapaqqa kanmi minakuna, qorita chuyanchanapaqqa kanmi sitiokuna.

²Fierrotaqa allpamantam hurqona, rumita chulluchisqañataqmi cobre lloqsin.

³Minerokunapaqqa manam maypas llumpay tutayayqa kanchu, paykunaqa uku-uku tutayay uchkukunata yaykuspam kuyayllapaq alhaja rumikunata hurqomunku.

⁴Runakunapa mana yachananpim, runakunapa mana purinanpim, minata toqonku. Runakunapa mana kasqanpim waskakunawan warkunakuspa llamkanku.

⁵Allpa pachaqa kawsaytam ruruchin, ukunmi ichaqa lenwachkaq nina kakuchkan.

⁶Qaqankunamantam zafiro rumita hurqonku, allpamantañataqmi qorita hurqonku.

⁷Chaykunaman riq ñantaqa wamankunawan ankakunapas manam reqsinkuchu.

⁸Manchakuypaq animalkunapas manam chaynintaqa purinkuchu, leonkunapas manam chaynintaqa pasankuchu.

⁹Rumillaña kaptinpas runaqa qaqata uchkuspam orqokunata sapinmanta wikutin.

¹⁰Qaqakunapi uchkuta ruwaspam imapas kuyayllapaq kaqkunata hurqonku.

¹¹Mayupa maymanta qallarimusqanta chakirachispam, pakasqa kaqkunata achkiyman hurqonku.

¹²Ichaqa ¿maymantataq yachayqa hamun? ¿Maypitaq yachayqa tarikun?

¹³Runaqa manam yachanchu mayna valorniyuqmi kasqantapas, yachayqa manam runakunapa kasqanpichu tarikun.

¹⁴Ukullay-uku uchkum nin: “Yachayqa manam kaypichu tarikun” nispa. Chaynataqmi lamar qochapas nin: “Kaypipas manam tarikunchu” nispa.

¹⁵Yachaytaqa manam qoriwanchu rantina, yachaytaqa manam qollqewanchu rantina.

¹⁶Yachaytaqa qoriwanpas manam rantiyta atiwaqchu, nitaqmi ónice rumiwanpas zafiro rumiwanpas rantiyta atiwaqchu.

¹⁷Qoripas cristalpas manam yachaymanqa igualanchu, qorimanta suma-sumaq alhajakunawanpas manam yachaytaqa truecachwanchu.

¹⁸Yachayqa coral alhaja rumimantapas aswan kuyayllapaqmi, cristal rumi perlaskunamantapas aswan kuyayllapaqmi.

¹⁹Etiopía lawpi topacio sutiyuq alhaja rumipas yachaymanqa manam igualanchu, suma-sumaq qoriwanpas manam rantiyta atiwaqchu.

²⁰Chaynaqa, ¿maymantataq yachayqa hamun? Chaynaqa, ¿maypitaq yachayqa tarikun?

²¹Yachayqa llapa kawsaqkunapa ñawinmanta pakasqam kachkan, yachayqa alton pawaq animalkunamantapas pakasqam kachkan.

²²Wañuywan ayakunapa kananpas ninkum: “Yachaymantaqa uyayllam-uyarirqaniku” nispanku.

²³Diosllam reqsin yachaypa ñannintaqa, payllam yachan maypim kasqantapas.

²⁴Payqa kay pachatapas kuchun-kuchunmi qawachkan, cielopa ukunpi kaqkunatapas rikuchkanmi.

²⁵Wayraman kallpata qospanqa, yakupaq maypi qocharayananta churaspanqa,

²⁶parananpaq kamachikuykunata qospanqa, llipyakunapa rayokunapa ñanninta kichaspanqa,

²⁷yachaytapas qawarirqam, mayna valorniyuqmi kasqanta qawaykuspanmi allinmi nirqa.

²⁸Hinaspam runata nirqa: “Yachayqa Diosta manchakuymi, yachayqa mana allinmanta rakikuymi” nispa.