Read Biblia Revisión Chuya Qellqa 1992 – Chuya Qellqa 1992 Job 29 Bible Online

Job 29 - Biblia Revisión Chuya Qellqa 1992 – Chuya Qellqa 1992 bible

Job 29

¹Jobqa nirqataqmi:

²¡Ima allinraq kanman ñawpaq killakunapi hina rikuriruptiyqa! ¡Ima allinraq kanman Diospa waqaychawasqan punchawkunapi hina rikuriruptiyqa!

³Achkiyninwanmi payqa kanchaykuwarqa, kanchaykuwaptinmi tutayaypipas puriq kani.

⁴¡Chaynam warma kaspayqa purirqani! Diosmi wasiytapas waqaycharqa.

⁵Chay punchawkunapiqa Tukuy Atiyniyuq Diosmi ñoqawan karqa, churiykunapas muyuriqniypim tarikurqa.

⁶Lechepas puchu-puchum kakurqa, aceitepas qaqapa raqranmantam lloqsimurqa.

⁷Llaqtapa huñunakunanman riptiymi, chay huñunakuypi tiyaykuptiymi,

⁸jovenkunapas rikuykuwaspankum qayllaymanta pakakuqku, yuyaq runakunapas sayariykuspam chaskiykuwaqku.

⁹Ancha reqsisqa runakunapas rimachkaspankum upallaykuqku, siminkutapas makinkuwanmi tapakuqku.

¹⁰Kamachikuqkunapas rimachkaspankum upallaruqku, qallunkupas paladarninkumanmi laqakuruq.

¹¹Uyariwaqniykunam alabawaqku, qawaqniykunapas ñoqamantaqa allintam rimaqku.

¹²Wakchakunatawan mana tayta-mamayuqkunatam libraykuq kani, mana pipapas nanachikusqantam yanapaykuq kani.

¹³Wakchayayman chayaruq runakunapas graciastam qowaqku, viudakunapas yanapaykuptiymi kusikuywan takiqku.

¹⁴Allin arreglo ruwaywan allin kawsakuyqa sapa punchaw tapaykuqniymi karqa, chaykunam sapa punchaw pachaykuna hina karqa.

¹⁵Ñawsapa ñawinkuna hinam karqani, suchupa chakinkuna hinam karqani.

¹⁶Wakchakunapa taytanmi karqani, huklaw llaqtayuqkunatam nanachikurqani.

¹⁷Mana allin runakunapa simintam kakllaq kani, ima kachusqantapas kirunmantañam qechuq kani.

¹⁸Ñoqam piensarqani: Kawsasqay punchawkunaqa aqo hinaña kananta, yuyaqyaspayña hina wasillaypi wañukuyta.

¹⁹Yakupa patanpi tarpusqa sacha hina kasqayta, kallmaykunapas tuta sullapa nuyusqan kasqanta.

²⁰Sumaq kayniyqa chaynalla kananta, kallpaypas mana tukunanta.

²¹Llapallankum uyariwaqku, upallallam consejanayta suyaqku.

²²Rimayta tukuruptiyqa manam pipas kutipawaqchu, rimasqaykunaqa sulla hinam paykunaman chayaykuq.

²³Parata suyachkaq hinam paykunaqa suyawaqku, rupaypi parata suyachkaq hinam suyawaqku.

²⁴Ñoqam paykunapaq asiriq kani, ichaqa manam creewaqkuchu; kusisqa uyaymi ichaqa paykunata kallpanchaq.

²⁵Ñoqam paykunata kamachirqani, tropankunapa ñawpaqninta riq rey hinam imam ruwanankuta tantearqani; llakisqa kaptinkupas sonqonkutam tiyachiq kani.