Read Biblia Revisión Chuya Qellqa 1992 – Chuya Qellqa 1992 Job 3 Bible Online

Job 3 - Biblia Revisión Chuya Qellqa 1992 – Chuya Qellqa 1992 bible

Job 3

¹Jobmi rimarispan nacesqan punchawta ñakaspan

²kaynata nirqa:

³¡Ñakasqayá kachun nacesqay punchawqa! ¡Ñakasqayá kachun qari wawam nacerun nisqanku tutaqa!

⁴¡Ima allincha kanman karqa chay punchaw tutayaruptinqa, Diospuni chay punchawta manaña kaqpaqpas hapiptinqa, chay punchaw manaña achikyariptinqa!

⁵¡Ima allincha kanman karqa chay punchawta wañuypa llantuynin pampaykuptinqa, yanay-yanay puyu wankuykuptinqa, manchakuypaq tutayay munaychakuruptinqa!

⁶¡Ima allincha kanman karqa chay tutata yanay-yanay tutayay munaychakuruptinqa, chay punchawta watapa punchawninkunapi killapa punchawninkunapi mana yuyaptinkuqa!

⁷¡Ima allincha kanman karqa chay tutapi mana pipas wiksayakuptinqa, kusikuymanta mana pipas chay tutapi qapariptinqa!

⁸¡Ima allincha kanman karqa chay punchawta ñakaqkuna ñakaptinkuqa, [1]Leviatanta rikcharichiy yachaqkuna ñakaptinkuqa!

⁹¡Ima allincha kanman karqa chay punchawpaq achikyaq chaskakunapas mana kanchaptinqa, suyasqanku achikyaypas manaña chayamuptinqa, chay punchaw manaña achikyarimuptinqa!

¹⁰Ñakasqayá kachun nacesqay tutaqa, ñakasqayá kachun kayna sasachakuykuna qawanayta mana harkakusqanmanta.

¹¹¿Imanasqataq mamaypa wiksallanpiraq mana wañururqanichu? ¿Imanasqataq mamaypa wiksanmanta lloqsimuchkaspay mana wañururqanichu?

¹²¿Imapaqtaq millqaypipas chaskiwarqaku? ¿Imapaqtaq ñuñutapas qowarqaku?

¹³Mana chayqa wañukuspaychá hawkaña samakuchkayman karqa, puñukuspaycha hawkaña kakuchkayman karqa,

¹⁴reykunawan, consejaqkunawan kuska; (paykunam kikinkupaq suma-sumaq wasikunata ruwakurqaku).

¹⁵Qorita qollqeta wasinman huntachikuq kamachikuqkunawan kuska.

¹⁶¿Imanasqataq sullusqa wawata hina, kay achkiy pachata mana rikuq wawata hina mana pamparuwarqakuchu?

¹⁷Wañuqkunapa kasqanpiqa mana allin ruwaqkunapas manañam imanatapas ruwankuñachu, mana kallpayuqkunapas chaypiqa samakunkuñam.

¹⁸Chaypiqa presokunapas samakunkuñam, capatazpa qaqchakuynintapas manam uyarinkuñachu.

¹⁹Chaypiqa taksapas hatunpas kuskam kachkanku, esclavopas patronninmanta libreñam kachkan.

²⁰¿Imanasqataq ñakariqman Diospas achkiyta qawachin? ¿Imanasqataq llakipa huntasqanman kawsayta qonraq?

²¹Wañuyta munaptinpas manam chayamunchu, pakata hinaña maskaspankupas manam tarinkuchu.

²²Paykunamanqa kusikuypas chayamunqa sepulturaman uraykuptinñam.

²³¿Imanasqataq Dios kawsachin maymanpas risqanta mana yachakuq runata? ¿Imanasqataq Dios kawsachin qenchawan hina wichqarusqan runata?

²⁴Ñoqapa mikunayqa llakillañam, tomanaypas nanaywan ñakariyllañam.

²⁵Imam manchakusqayraqmi chayaramuwan, aswan manchakusqayraqmi hamuruwan.

²⁶Manam samariytapas hawkayaytapas tariniñachu hawkayaypa rantinpipas ñakariyllatam tarini.