Read Biblia Revisión Chuya Qellqa 1992 – Chuya Qellqa 1992 Job 35 Bible Online

Job 35 - Biblia Revisión Chuya Qellqa 1992 – Chuya Qellqa 1992 bible

Job 35

¹Eliuqa nirqataqmi:

²Chaynaqa, Job, ¿allinpaqchu hapinki “Diospa qayllanpiqa mana huchayuqmi kani” nisqaykita?

³Qamqa Diostam kaynata nirqanki: ¿Imataq qokusunki huchallikusqayqa? ¿Imanasunkitaq huchallikusqayqa? nispayki.

⁴Chaynaqa, qamtapas amigoykikunatapas ñoqam yachaywan contestasqaykichik.

⁵Cielota qawariy, puyukunaqa qanmantapas aswan altopim kachkan.

⁶Huchallikusqaykiqa Diostaqa manam imananchu, maynataña huchallikuspaykipas paytaqa manam imanankichu.

⁷Ima allintaña ruwaspaykipas ¿imatataq Diosman qowaq? ¿Imatataq qanmanta pay chaskinman?

⁸Mana allin ruwasqaykiqa qam hina runallatam qachachan, allin ruwaynikipas runallatam yanapan.

⁹Runakunaqa llumpayta ñakarispankum qayakunku, paykunaqa munaychakuqkunapa makinmanta librasqa kanankupaqmi qayakunku.

¹⁰Ichaqa manam unanchaqninku Diosta maskankuchu, tutayaypi kallpa qokuq Diostaqa manam maskankuchu.

¹¹Diosqa purun animalkunamantapas aswan yachayniyuqtam ruwawanchik, alton pawaq animalkunamantapas aswan yuyayniyuqtam ruwawanchik.

¹²Qayakuptinkupas Diosqa manam contestanchu, hatun tukuq kaspa mana allin ruwaq kasqankurayku.

¹³Cheqaptapunipas Tukuy Atiyniyuq Diosqa manam uyarinqachu yanqa qayakusqankutaqa.

¹⁴“Diostaqa manam rikunichu” nichkaspaykipas ichaqa pacienciawanyá suyaykuy, sasachakuynikiqa paypa ñawpaqninpim kachkan.

¹⁵Qanmi ninki, payqa manam piñakunchu nitaqmi castigakunchu, maynataña huchallikusqapas manam cuentatapas qokunchu, nispayki.

¹⁶Chaynaqa, Job, qamqa yanqakunatam rimachkanki, muspaypi hinam mana pasaqkunata rimachkanki.