Read Biblia Revisión Chuya Qellqa 1992 – Chuya Qellqa 1992 Job 36 Bible Online

Job 36 - Biblia Revisión Chuya Qellqa 1992 – Chuya Qellqa 1992 bible

Job 36

¹Huktawan rimarispanmi Eliú kaynata nirqa:

²Tumpata suyaykuway ñoqam yachachisqayki, Diospa allinninpi rimarinaypaqqa kachkanraqmi.

³Allin yachasqaykunatam rimarisaq, unanchaqniypa cheqap kasqantam qawachisqayki.

⁴Cheqaptapunipas rimasqaykunaqa manam llullachu, qayllaykipiqa hatun yachayniyuq runam kachkani.

⁵Diosqa ancha atiyniyuqmi, yachayninpas hatu-hatunmi, mana huchayuqtaqa nanachikunmi.

⁶Mana allin runataqa manam kawsachinqachu, ñakariqkunapaqmi ichaqa allin arreglota ruwaykapunqa.

⁷Allin ruwaq runakunataqa nanachikunmi, reykunatapas munaychakuyninpim yanapan, ancha reqsisqatam ruwan.

⁸Cadenawanña chaqnasqa kachkaptinkupas, waskakunawanña watasqa kachkaptinkupas,

⁹Diosqa mana allin ruwasqankutam paykunaman reqsichin, hatun tukuq kasqankutam qawachin.

¹⁰Wanakunankupaqmi paykunata rimapayan, mana allinkunata saqenankupaqmi qaqchan.

¹¹Sichum Diosta kasukuspa servispankuqa, kawsanankukamam allinllaña kanqaku, wañunankukamam kusisqallaña kanqaku.

¹²Mana kasukuspankum ichaqa guerrapi wañuchisqa kanqaku, mana yachayniyuq kayninkupim wañunqaku.

¹³Iskay uya runakunaqa piñakuyninkutam sonqonkupi waqaychanku, castigasqa kachkaspankupas Diospa yanapakuynintaqa manam mañakunkuchu.

¹⁴Chayna runakunaqa kallpallankupiraqmi wañukunkupas, millakuypaq kaqkunata ruwachkaspam tukunqakupas.

¹⁵Runataqa ñakariynintakamam Diosqa qayan, runaqa nanaywanraqmi yuyayta hapin.

¹⁶Qamtapas paytaqmi tukuy sasachakuymanta hurqoykusunki, mana ima sasachakuypa kasqanman, manaña llakikuypa kasqanman, mikunaykipaqpas tukuy imatam qoykusunki.

¹⁷Ichaqa qanmi chaskikurunki mana allin runakunapa juzgasqa kananta, juzgasqa kaywan sentenciasqa kaymi chaqnarusunki.

¹⁸Chaynaqa, cuidakuyá, yanqañataq qori-qollqeta chaskikuruspa rantirachikuwaq, yanqañataq regalokunata chaskikuruspa pantayman wichiykuwaq.

¹⁹Sasachakuymantaqa qaparisqaykipas manam librasunkichu, tukuy atiynikipas manam librasunkichu.

²⁰Chaynaqa, amayá suyaychu tuta chayamunantaqa, tutapiqa llaqtakunapas qonqayllatam chinkarun.

²¹Waqaychakuyá mana allin ruwaymanqa amaña kutiriychu, chay ñakariywan pruebasqa kachkaspaqqa.

²²Diosqa hatu-hatun atiyniyuqmi, ¿yaqachu maynaña allin yachachikuqpas payman igualanman?

²³Manam pipas ninmanchu “kaynata ruway” nispaqa, manam pipas ninmanchu “pantarunkim” nispaqa.

²⁴Diospa ruwasqankunataqa lliw runakunam hatunchanku, chaynaqa qampas tukuy ruwasqankunamantayá yupaychay.

²⁵Llapa runakunam paytaqa qawanku, karullamantaña kaspapas qawankum.

²⁶Diosqa hatu-hatunmi, chayraykum mana entiendeyta atichwanchu, watankunatapas manataqmi yupayta atichwanchu.

²⁷Diosmi altoman yakuta waspichispa mayukuna kallpananpaq parachimun.

²⁸Paraqa puyumantam chayamun, llumpaytam kay pachaman tallikamun.

²⁹¿Pitaq entiendenman puyukunapa mastarikusqanta? ¿Pitaq entiendenman cielopi rayokuna toqyasqanta?

³⁰Diosqa llipyatapas lamar qochapa hawanmanmi mastarirun, lamar qochapa ukuntañataqmi pakaykun.

³¹Chaynatam Diosqa nacionkunaman mikuchin, achkallaña mikuytam paykunaman qon.

³²Payqa llipyatapas makinpim hapiykun, llipyatapas mayman chayananpaqmi kamachin.

³³Rayopa toqyayninqa paramunantam willakun, animalkunapas wayra-para chayamunantaqa musyankum.