Read Biblia Revisión Chuya Qellqa 1992 – Chuya Qellqa 1992 Job 39 Bible Online

Job 39 - Biblia Revisión Chuya Qellqa 1992 – Chuya Qellqa 1992 bible

Job 39

¹¿Yaqachum yachanki ima tiempopim purun cabrakunapa wachakunanta? ¿Luwichuta rikurqankichu wachakuchkaqta?

²¿Yaqachum wiksayakusqan killankunata yuparqanki? ¿yachankichum haykapim wachakunanta?

³Chay animalkunaqa chuychuykuspam wachakunku, wachakuruptinkuqa nanayninkupas samaykunmi.

⁴Wawankunapas poqopakunkum, pastota mikuspam wiñanku, chaymanta ripukuspaqa manañam kutimunkuñachu.

⁵Yachaptikiqa, ¿pitaq purun asnota munasqanpi purinanpaq kachaykurqa? ¿pitaq watunta paskarurqa?

⁶Ñoqam yachanankupaq chunniq lawkunata qorqani, yachanankupaqmi qollpakunapa kasqanta qorqani.

⁷Chay asnokunaqa llaqtapi chaqwakunamantapas asikunmi, arrieropa qaparisqantapas paykunaqa manam kasunkuchu.

⁸Orqokunapim pastota maskanku, verde pastokunata maskastinmi purinku.

⁹¿Yaqachu purun torowan servichikuwaq? ¿yaqachu corralnikipi puñurunman?

¹⁰¿Yaqachu yapunaykipaq chay torota yugoman wataruwaq? ¿Yaqachu surcota kichastin qepaykita qatisunkiman?

¹¹¿Yaqachu kallpasapa kasqanrayku chay toropi hapipakuwaq? ¿Yaqachu payman llamkaynikita saqeykuwaq?

¹²¿Yaqachu cosechaykita hoqarispa erapi huñunanta saqeykuwaq?

¹³¿Qamchu avestruzman raprankunata, purankunata qorqanki, raprankunawan kusisqallaña wachwa hina pawaykachananpaq?

¹⁴Avestruzqa runtunkunatapas allpapim saqerun, intipa rupayninwan toqyananpaqmi aqopi saqerun.

¹⁵Payqa manam tanteanchu pipas pakirunantaqa, manam yachanchu purun animal sarurunantaqa.

¹⁶Manapas wawanchu kanman hinam payqa wawankunatapas ñakarichin, chinkaptinpas manam imapas qokunchu.

¹⁷Paymanqa manam yachayta qorqanichu, nitaqmi yuyayniyuq kaytapas qorqanichu.

¹⁸Chaywanpas kallpananpaq sayarispanqa caballokunamantawan sillakuqkunamantapas asikunmi.

¹⁹¿Qamchu caballoman kallpanta qorqanki? ¿Qamchum matankanpi chukchankunata churarqanki?

²⁰¿Aqaruway uruta hinachu pawaykachachinki? ¿Qamchu senqanwan qorqoryaq caballota pawaykachachinki?

²¹Kallpanwan kusikuspanmi allpata aspin, mana manchakuspam guerramanpas kallpan.

²²Manchakuymantapas asikunmi, manam pitapas manchakunchu, wañuchinakuypipas manam mawlachu.

²³Flechakuna apananku taqraqyaptinpas manam manchakunchu, hatun lanzapa taksa lanzapa llipityayninwanpas manam manchakunchu.

²⁴Trompeta waqaykuptinqa manañam hawkaqa sayanñachu, samay chinkay kallpaspam pampataqa mikuypaq-mikuykun.

²⁵Trompeta waqaykuptinmi contestaq hinaraq weqeqeqen, karullamantaraqmi guerratapas musyarun, capitankunapa qapariynintapas uyarinmi.

²⁶¿Qampa yachaynikiwanchu wamanpas raprankunata sur lawman mastarispan pawan?

²⁷¿Qam kamachiptikichu ankapas altoman hoqarikuspan orqokunapi qesanta ruwakun?

²⁸Payqa qaqakunapim yachan, tutapas qaqakunapim puñun, orqopa puntankunapim wasichakun, mana seqay atinakunapim yachan.

²⁹Chaymantam mikunanta hapirunanpaq wateqamun, ñawinkunapas karumantaraqmi qawamun.

³⁰Mallqonkunapas yawartam soqon, payqa wañusqakunapa kasqanpim tarikun, nispa.