Read Biblia Revisión Chuya Qellqa 1992 – Chuya Qellqa 1992 Job 7 Bible Online

Job 7 - Biblia Revisión Chuya Qellqa 1992 – Chuya Qellqa 1992 bible

Job 7

¹Kay pachapi runapa vidanqa serviciopi kaq soldadopa vidan hinallam, kawsasqan punchawkunapas llamkapakuqpa punchawnin hinallam,

²esclavopa llantukuy munasqan hinallam, pagon suyaq llamkapakuqpa hinallam.

³Chaynam ñoqapa kawsayniypas killan-killan mana valeqlla, tutankunapas ñakariylla.

⁴Camaypi waqtapaykuspaymi nini: Haykapiraq hatarisaq, nispay. Ichaqa tutapas manaña achikyariptinmi camaypi qochpastin achikyani.

⁵Aychaypas urukunapa tukusqanmi kachkan, isuymantapas qeyam suturichkan, heridaypas llillirispanmi qeyallaña suturichkan.

⁶Punchawniykunapas awaqpa kallwanmantapas aswan apurawmanraqmi kallpachkan, manañam kawsaytaqa piensaniñachu.

⁷¡Diosnilláy, yuyarillaway! Kawsayniyqa pasaruq wayra hinallam kusikuytaqa manañachá haykapipas rikusaqñachu.

⁸Qawawaqniykunapas manañam rikuwanqakuñachu, qawariykuwaptikim wañukusaq.

⁹Imaynam puyu waspiruspa chinkarun, chaynam sepulturaman uraykuqpas pasaypaqña chinkarun.

¹⁰Wasinmanqa manañam haykapipas kutinqañachu, ayllunkunapas manañam rikunqañachu.

¹¹Chayraykum mana upallaykuspay rimasaq, llakipa intusqan sonqoywanmi rimasaq, sonqoypas nanasqam rimasaq.

¹²¿Lamar qochachu karqani, lamar qochapi manchakuypaq animalchu karqani cuidachiwanaykipaq?

¹³Ñoqaqa “camaypichá samarisaq, puñuspaychá llakiykunata qonqarisaq” niptiypas,

¹⁴aswanraqmi muspachiwaspa manchachiwanki, manchakuypaq mosqoykunatam qoykuwanki.

¹⁵Ñoqapaqqa allinqa kanman teqoruwaynikim, kawsanaymantaqa wañuymi aswan allinqa.

¹⁶Ñoqaqa kawsakuytapas amiruniñam, kawsaytapas manañam munanichu, saqeruwayña, kawsayniyqa waspiy hinallam.

¹⁷¿Pitaq runaqa karqa hatunchanaykipaqqa? ¿Pitaq runaqa karqa paymanta sonqoykipi yuyarinaykipaqqa?

¹⁸¿Pitaq runaqa karqa sapa tutapayta watukunaykipaqqa? ¿Pitaq runaqa karqa ñataq-ñataq pruebanaykipaqqa?

¹⁹¿Haykapitaq ñoqamanta ñawikita asurichinki? ¿Haykapikamataq toqayllaytapas millpunayta mana saqewankichu?

²⁰Runakuna waqaychaq Diosnilláy, huchallikuruspayqa ¿ima mana allintataq contraykipi ruwaruni? ¿Imanasqataq flechaykikunapa tuksipananta ruwaruwanki? ¿Ima sasachakuytataq qanman qoyki?

²¹¿Manachum huchallayta pampachaykuwankiman? ¿Manachum mana allin ruwasqaymanta mayllaykuwankiman? Ñoqaqa chayllam allpaman kutiykusaq, maskawaptikipas manañam tariwankiñachu.